Storia de l'Uganda

Da Wikipedia, l'ençiclopedia libara.
Mapa de l'Uganda

La Storia de l’Uganda la scominsia co le prime testimonianse scrite de i viagiatori arabi. Ma no bisogna desmentegarse del longo pasato del paexe che se pol documentar solo co testimonianse indirete.

Preistoria[canbia | canbia el còdaxe]

Na olta tuta l’Uganda la xera cuerta da foreste e i primi abitatori serti xe stà grupi pigmei. I pigmei i ga scominsià a moverse verso sud co l’arivo de zente de origine cushita, alevatori, che vegnea zo dal nord. Stà prima migrasion la xe de domila ani fa. Verso el X secolo, le migrasion bantu le xe rivà anca in Uganda. I bantu i se sa integrà co le popolasion pre-esistenti.

I regni[canbia | canbia el còdaxe]

El primo regno che se conosa el xe quelo de la dinastia Batenbuzi, co cavedal a Bigo Bya Mugeny. Dopo de lori i xe rivà i Bachwezi (secolo XIV) che i ga portà el café, la laorasion del fero e nove raze de bestie, come i ankole. El regno de Kitara (XIV e XV secolo) el ga poco a poco lasà spasio al regno de Bunyoro, che pol considerarse la so continuasion. El regno de i bunyoro el se sa svilupà inte l'ovest del paexe, longo el Lago Alberto. Dal XVII secolo el regno de i buganda el ga scominsià a rinforzarse inte la zona do ancò ghe Kampala. El Kabaka – re de i buganda – el controlava el marcà de avorio e scaivi co i arabi che vegnea su da la costa. Regni minori i xera quei de i ankole e de i toro. El kabaka el xera anca el garante de la tera che governava traverso i Bakungu, i nobili che a so olta usava i membri de i Batongole, l’aristocrasia minore, par governar i vilagi. I titoli i no xera ereditari e el Kabaka el podea ciamar che volea lu.

En tel nord del paexe, le migrasion luo le ga dato vita a vari popoli: alur, acholi, e i lango. I lango i parla na lengoa luo ma secondo alcuni studiosi i no saria luo in origine, ma ateker (on grupo vegnù zo da l’Etiopia). Altri studiosi i dixe che i lango i xe luo ch ei ga lasà el Sudan prima de i acholi e co i sa ritrovà in Uganda i sa scontrà e mantegnu on level de inimicisia fin ancò. En te l’est del paexe se cata grupi nilotici come i karimojong e i pokot. Sti grupi etnici i xe vegnù zo dal Sudan in tel XVI-XVII secolo e i se sa diviso dopo le lote interne che ga dato origine anca a i turkana e i maasai del Kenya, e i toposa del Sudan.

Uganda moderna[canbia | canbia el còdaxe]

File:Burton Street, Kampala.jpg
Sentro de Kampala

I primi contati co l’eoropa i xe rivà a la metà del secolo XIX. I esploratori John Hanning Speke e James Augustus Grant, che volea catar le fonti del Nilo, i ga visità el Kabaka Mutesa I in tel 1862. En tel 1875, Henry Morton Stanley el xe rivà inte la zona de Kampala. En tel 1877 i primi misionari anglicani i ga fato visita al Kabaka, i catolici i xe rivà do ani pi tardi. El Kabaka el volea i misionari par fermar l’intrusion de l’Islam, che el no ghe piasea. A lo steso tempo, el re no volea che la zente la se fasese cristiana. Mutesa el sperava che l’amicisia co i cristiani la se trasformase in sostegno militare a so favor. Intanto, l’Inghiltera rivendicava el teritorio de l’Uganda a la Conferensa de Berlino.

A la morte de Mutesa I in tel 1884, Mwanga II el xe salìo al trono. I cai locali i scominsiava a domandar pi poter e manco centralizasion. En stò periodo, el re el ga ordinà de copare on vescovo, James Hannington, e vari misionari convertiti – i martiri d’Uganda – sia anglicani che catoleghi. En tel 1888, cristiani e musulmani i ga fato on colpo de stato e deposto Mwanga II. I musulmani i xe stà boni de parar via i cristiani da Kampala, i catoleghi a Masaka, in tel sud, e i anglicani al nord. Dopo vari tentativi e cambi de governo, el re Mwanga II el xe ritornà sul trono in tel 1890 co el sostegno de l’Inghiltera.

En tel 1893, l’Uganda la diventava on protetorato britanico co cavedal a Entebbe. El re Mwanga II el ga firmà on tratato par jutare i inglexi a conquistar i regni de Toro, Ankole, Busoga e Bunyoro. I inglexi i xe anca ndà al nord par ocupar el teritorio de i acholi. En tel 1896, el protetorato el xera tuto soto el controlo inglexe. El Kabaka el se sa aleà co el Kabalega, el re de i bunyoro. L’aleansa la xe stà sconfita in tel 1900 e i do re mandé in bando a le Seicele. I inglexi i ga meso sul trono el fiol de Mwanga II, Daudi Chwa II, che el gavea on ano.

La colonia[canbia | canbia el còdaxe]

El protetorato britanico in tel 1926

I inglexi i xera pi interesadi a l’Uganda che al Kenya. La ferovia, parò, la xera tuta in Kenya, da Mombasa a Kisumu. Merci e pasegeri i vegnea embarcà a Kisumu par esar menà fin a Entebbe o altri porti longo el Lago Vitoria. EL completamento de la ferovia fin a Kampala el xera importante par lo svilupo de l’agricoltura. I novi metodi agricoli i xe stà subito resepidi da i cai, che gavea otenù el control de la tera dopo la caduta del Kabaka e de i altri re. En tel 1920 la colonia inglexe la gavea za ragiunto l’autosuficensa.

I misionari cristiani i costruiva scole in tuto el paexe. La popolasion la cresceva semprre pi rivolta al cristianesimo, i muslmani invece, che no podea entrar ne le scole cristiane, i xe stà mesi da parte on poco a la olta. La proibision la xera stà mesa da i inglexi. Le scole le ga avù on altro efeto negativo. Mentre le difarense etniche le diventava manco marcade, la diferensa tra catoleghi e protestanti la se fasea pi forte. Al momento de l’indipendensa, e anac pi tardi, tante rivalità sociali le xera basà propio su la diferensa tra le cexe cristiane.

L’indipendensa[canbia | canbia el còdaxe]

El 9 otobre 1962 l?uganda la xe diventà indipendente. La zente la gavea votà on catolego come primo ministro, ma la regina Elisabeta II de Inghiltera no la ga riconosù el risultato de le votasioni. El re de i buganda el xe stà fato presidente e primo ministro el xe diventà Milton Obote on anglican del nord. En tel 1966, Obote el ga fato on colpo de stato contro el Kabaka e el se sa proclamà presidente.

Amin[canbia | canbia el còdaxe]

Par savèrghene de pì, vardarse ła voxe Guera ugandexe tanzaniana.


El cao de stato magiore de l’esercito, Idi Amin Dada, originario de Arua, in tel nord-ovest, el ga organizà on colpo de stato in tel 1971. Na olta al poder, el ga fato copar i uficiali del nord e espulso tuti i ugandexi de origine axiatica. I indiani i gavea in man tuto el comercio, e el paexe el ga scominsià a sofrir par la mancansa de beni de primo consumo. En tel 1979, Amin el ga invaso la Tanzania, che la ga risposto subito e in pochi dì i tanzaniani i xe rivà a Kampala. L’esercito ugandexe el se sa ritirà al nord, mentre che Amin – che el xera on musulmano – el xe scapà in Arabia. I tanzaniani i xe salii al nord, ma sensa forzar la marcia. El resultà el xe stà na longa guera co atrocità e distrusion al nord. Obote el xe tornà a far el presidente. En tel 1980 Yoweri Kaguta Museveni el ga fondà el National Resistance Army, l’Esercito de Resistensa Nasional. El presidente Obote el ga risposto a l’oposision armata co el genocidio. Pi de 300 000 persone le xe stà copà durante ‘l’Operasion Boananza’. Museveni el xe riusì a catura la caveda in tel 1986.

LRA[canbia | canbia el còdaxe]

Subito dopo la fin de la guera al nord, Alice Auma Lakwena – na dona acholi – la ga dito de esar poseduda da lo Spirito Santo. La Lakwena la ga fondà el Esercito Mobile de lo Spirito Santo e prometeva la salveza a ci la seguiva. Bisognava seguir i diexe comandamenti e combatar contro i opresori del sud. En tel 1987, le forse de l’esercito ugandexe le xe riuside a dividar i ribeli de la Lakwena, ela la x scampà in Kenya. Subito dopo, on neodo, Joseph Kony, de la Lakwena el ga dito de esar el novo comandante ciamà da Dio a continuar el laor de so amia. Kony el ga fondà el Esersito de libarasion del Signor (Lord’s Resistance Army) o LRA.

I ribeli de l’LRA i ga atacà i vilagi del nord robando e copando. I ga anca atacà le scole par rapir i buteleti. I buteleti i le faxea diventar soldai, le butelete le dovea laorar e far da mojere a i soldai pi grandi. I bambini soldato i xera costreti a mutilar, torturar e violentar la zente durante i atachi. Dal 2006 el governo el ga provà a far i acordi de paxe co i ribeli de Kony. La discusion la va avanti a Juba, in tel Sud Sudan.

I ultimi ani[canbia | canbia el còdaxe]

A sinistra Yoweri Museveni, al sentro Mwai Kibaki del Kenya e a destra Jakaya Kikwete de la Tanzania

En tel 1995 el parlamento el ga aprovà la nova costitusion. El multipartitismo el xe scominsià solo inte el 2005. In sti ani, l’esercito ugandexe el ga combatù inte la Republica Democràtega del Congo e in Rwanda. Museveni el se sa fato elezar oncora in tel 2005 e el ga fato arestar Kizza Besigye, el cao de l’oposision, prima de le elesion co n’acusa de violensa carnale che la xera falsa.

L’Uganda la xe cresù ne i ultimi ani grasie a la paxe. El nord el rimane distruto da i ani de guera sivile causà da l’LRA e da la mancansa de reasion del governo. L’AIDS – che el sembrava soto controlo – el xe tornà a esar na minacia par la società.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Storia_de_l%27Uganda&oldid=1037138"