Stòria de l'eSwatini

Da Wikipedia, l'ençiclopedia libara.
Cheło che te ghè schcià el rimanda a sta voxe, parché el xe on so sinònemo o el vien esplegà cuà drento. rimandamento da Storia de lo Swaziland
Mapa del eSwatini

Come tuti i paexi de l’Africa Australe, la region che la costituise el regno del eSwatini la xera abità da grupi de caciatori-catadori za 200 000 ani fa. Sti grupi i ga dato vita a i Khoisan che vive oncora in tuto el Sudafrica e paexi confinanti.

Verso el IV-V secolo d.C., altri grupi i xe imigrà dal nord e i ga portà la tecnologia del fero. Verso el XI secolo, grupi bantu i xe riva inte la region.

I swazi – el grupo che ancò el xe majoritario – i xe on grupo bantu che el xe rivà dal Mozanbico in tel XVIII secolo. I swazi i se cata ancò in Mozanbico, Sudafrica (do vive la majoria de la etnia) e in eSwatini. El clan de i Dlamini el xe stà bon de controlare i vari cai inte la region del eSwatini e, col re Sobhuza I, formar on regno unico. El re Mswati II (regno 1840-1865) el ga espanso el teritorio e stabilizà el confin co i zulu del Natal (ancò Kwa Zulu-Natal).

Colonia[canbia | canbia el còdaxe]

El re Mswati el ga domandà a i inglexi de jutarlo contro le invasioni de i zulu. El re Mswati el ga anca tratà co i boeri del Transvaal so i confini e l’uso de le risorse. Co i boeri i ga roto i pati, i inglexi i xe intervegnudi, dandoge protesion al regno del eSwatini dal 1894 al 1899. E tel 1902 i inglexi i xe ritornà e i ga inposto el governo coloniale. El governatore inglexe el ga governà acordandose co el governatore del Sudafrica, i bianchi ch ei vivea in eSwatini e scoltando anca la casa reale.

En tel 1921, Sobhuza II el xe rivà al trono. I inglexi i volea portar el eSwatini rentro al Sudafrica, ma la casa reale la ga protestà. En tel 1960 el re e i so colaboratori i ga formà el Movimento Nasionale Imbokodwo che el ga vinto le prime elesioni del 1964. Na olta al governo, ma oncora soto el control coloniale, el re el ga fato varie richieste e praticamente inposto la creasion de on comitato par la preparasion dela Costitusion. El eSwatini el xe diventà indipendente el 6 setenbre 1968 come na monarchia costitusionale.

eSwatini moderno[canbia | canbia el còdaxe]

En tel aprile 1973, el re Sobhuza el ga abolì la Costitusion. En tel 1979 on novo parlamento el xe stà verto co rapresentanti eleti dal re. Sobhuza II el xe morto in tel 1982 e la regina Dzeliwe la xe diventà regent par on ano. En tel 1984 la regensa la xe pasà a la regina Ntombi. El fiol de Ntombi, principe Makhosetiwe, el xe diventà re co el nome de Mswati III el 25 aprile 1986. El so primo ato regale el xe stà de abolire el Liqoqo, el consilio speciale del re.

El re Mswati III el xe al sentro de varie polemiche:

  • che el nol vol democratizar el paexe e continua a governar come on sovrano asoluto
  • che nol se interesa al ben de i citadini e chel vive na vita da sior co la majoria de la popolasion la vive soto el livel de la povertà
  • che continuando la celebrasion de la dansa de le cane e seliendo nove mojere ogni altro ano el xe on cativo esenpio a I swazi de ancò
  • che nol fa niente par fermar l’infesion de AIDS che la colpise on gran numaro de suditi.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Stòria_de_l%27eSwatini&oldid=1099784"