Storia de la Tanzania

Da Wikipedia, l'ençiclopedia libara.
Mapa de la Tanzania
Mapa de la Tanzania

La Storia de la Tanzania la fonda le so raixe ne la preistoria pi antica. En tempi pi recenti, la Tanzania la xe in comunicasion co i paexi axiàteghi e, dal tempo de le colonie, co l’Eoropa. Ne i ani ’70 la ga aiutà i movimenti de liberasion de Uganda e Sudafrica.

Preistoria[canbia | canbia el còdaxe]

La Tanzania la xe traversà da la Rift Valley. En sta val imensa, i paleontologi i ga fato ricatamenti importanti de i primi esari umani. A Olduvai Gorge, i studiosi de la fameja Leakey i ga trovà fosili de ominidi de do milioni de ani fa e a Laetoli le pi vecie peste de antenati de i esari umani. En tuta la Tanzania se cata segni de i primi abitanti moderni. Se trata de popoli pigmei, probabilmente Khoikhoi. Verso el do mila prima de Cristo, i popoli cushiti che i migrava verso sud i xe rivà in sta region e i ga inblobà i pigmei. I bantu i xe rivà da l’ovest co varie migrasion a partir dal I secolo de la nostra era. I ultimim a rivare i xe stà i niloticiluo longo el Lago Vitoria, e maasai su le piane de i Serengeti – in tel XVIII secolo.

Mondo arabo[canbia | canbia el còdaxe]

Verso el X secolo, i marcanti arabi e persiani che i laorava longo la costa africana i xe rivà anca su le coste de la Tanzania. Da el matrimonio de axiàteghi co le popolasion bantu de la costa la xe nata el popolo e la cultura swahili. I swahili i ga costruio sità e fortini su la costa, so le ìzołe, specialmente Mafia, Zanzibar, Pemba e Kilwa. La comunità swahilil la gavea on bon comercio co l’Oman, la Persia, l’India e la Cina. Sto periodo el xe conosù come l’Era Shirazi. I primi eoropei a rivar so le coste de la Tanzania in tempi moderni i xe stà i portoghexi. En tel 1498, Vasco de Gama el ga visità Kilwa e par el 1525 i portoghexi i gavea el control de la costa. Dopo varie guere co i omaniti, i portoghexi i ga perso el control de la zona swahili e i omaniti i ga stabilì on sultanato a Zanzibar. Da Zanzibar, el sultan el controlava la costa dal sud de la Somalia al nord del Mozanbico, e le trate comerciali de l’interno de l’Africa che rivava su le coste de l’Oceano Indian.

Colonialismo[canbia | canbia el còdaxe]

Bataja de Tanga

Co el novo interese de l’Eoropa su l’Africa in tel XIX secolo, misionari e esploratori i xe rivà in Africa Oriental par catar le fonti del Nilo e disegnar le mape de l’interno. Le potense eoropee no gavea interesi culturali, e guardava a l’Africa par le materie prime. La Società Todesca par la Colonizasion, fondà da Karl Peters, la ga mandà de i rapresentanti par contratar la ‘protesion’ oferta da la Germania a i cap locali (1884 in poi). En tel 1891, el governo todesco el ga sostituì la Compania de l’Africa Oriental Todesca ne l’aministrasion de i teritori del Tanganica e el ga meso la cavedal a Dar es Salaam.

I todeschi i ga investio tanto inte la colonia. I ga introdoto nove coltivasioni, la ferovia e na rete de strade. I volea anca costruir on canal par potar l’acqua dal Lago Vitoria a le pianure rente de Morogoro. La zente la ga resistio sti cambi e dal 1905 al 1907 i todeschi i ga dovù combatar na guera co le tribù del sud (rivolta de i Maji Maji).

Co lo scopio de la Grande Guera, i todeschi i sa catà a combatar i inglexi del Kenya. I ga fermà el tentativo de invasion co la bataja de Tanga. El general Paul von Lettow-Vorbeck el ga organizà la guerilia che ga tegnù i inglexi impegnà so tuto el confin. Co la Germania ga perso la guera, el Tanganica el xe pasà al controlo fiduciario soto i inglexi, prima par mandà de la Lega de le Nasioni, e dopo par quel de le Nasion Unie.

Indipendensa[canbia | canbia el còdaxe]

En tel 1954 Julius Nyerere, on maestro e ono de i soli do che gavea studià a l’università in tuto el Tanganyika, el ga fondà el partio Tanganyika African National Union (TANU) – Union Africana Nasionale del Tanganica. En tel 1961 Nyerere el xe diventà el Primo Ministro del paexe durante el periodo de autonomia, e on ano dopo el Presidente del Tanganica. El Tanganica el xe diventà indipendente el 9 dicembre 1961.

Zanzibar[canbia | canbia el còdaxe]

L’ìzoła de Zanzibar e le altre de l’arcipelago le xe stà abitade da secoli da pescadori de origine bantu. Co l’arivo d ei arabi e de i persiani, Zanzibar la xe diventà on sentro comerciale importante. Dopo esar pasà soto el control portoghexe, la xe stà presa definitivamente da i omaniti, che ga portà qua la cavedal de on sultanato. Zanzibar la xe diventà presto el sentro pi importante de l’Oceano Indiano par el comercio de le spezie e de i sciavi. El sultanato de Zanzibar el xe continuà fin a la fin de la seconda guera mondiale, ma de fato i inglexi i ga comandà su l’ìzoła dal 1890.

El 26 aprile 1964, Zanzibar la sa unio al Tanganica par formar la Republica Unita de la Tanzania.

Nyerere el ga fondà el pensiero de la ujamaa – comunità – on socialismo africano. La Tanzania no la podesto sviluparse come altri paexi de la region, ma la ga sempre vu on livel de vita suficente par tuta la popolasion. Fata ecesion par le tension a Zanzibar de i ultimi ani e la breve guera co l’Uganda, la Tanzania ga sempre vù na vita tranquila e la democrazia la xe ben solida. Nyerere el xera anca el presidente del partio unico Partio Rivolusionario (Chama cha Mapinduzi), fondà dopo l’union co Zanzibar. Nyerere el xe restà presidente dal 1961 al 1985. Dal 1995 ghe el multipartiismo. El presidente atuale Jakaya Mrisho Kikwete xe stà eleto inte el 2005.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Storia_de_la_Tanzania&oldid=1032391"