Storia del Sudafrica

Da Wikipedia, l'ençiclopedia libara.
Va a: navigasion, serca
Mapa del Sudafrica

La Storia del Sudafrica la xe ona de le pi interesanti de l’Africa moderna. La xe na storia de invasioni, lote, coragio e razismo. Ma anca na storia par el riconosimento de i diriti umani e de la costrusion de na società verta al futuro.

Preistoria[canbia | canbia sorxente]

Rente de Johannesburg e en altre zone del Sudafrica, i ricatamenti paleontologici i ne dixe che ominidi e i primi omeni i vivea en Sudafrica. I xera i disendenti de i ominidi del primo Homo sapiens che el se sera svilupà en te la Rift Valley. I ricatamenti i mostra anca che ghe stà on periodo co el omo moderno nol xera presente en Sudafrica.

Pigmei[canbia | canbia sorxente]

Grupi de pigmei (usemo sto nome par indicar zente de basa statura, no se pol usare sto nome par indicar na etnia spesifica) i gha visù en Sudafrica fin da i tempi pi remoti. Le piture rupestri che se cata en tuto el Sudafrica le xe stà datade da 25 000 a 2 000 ani fa. Da i ricatamenti e da lo studio del DNA, se sa che grupi de khoikhoi i xe vegnù zo da l’Africa Sentrale longo la costa atlantega 2 500 ani fa. I portava co lori el bestiame e le tecniche de alevamento. Co i sa incontrà co i popoli de la region del Capo – i san -, i se sa miscià co lori dando vita a i khoisan. La presensa de le vache la gha introdoto el conceto de propietà privada, chel no l’era presente tra i san. Anca la strutura de la società la xe cambià co l’introdusion de i capi. I san che vivea a l’interno i gha continuà co la loro cultura. I khoisan i xe rimasti su la costa en te la region del Capo e en quela che ancà la xe la Namibia.

Bantu[canbia | canbia sorxente]

Dopo i khoikhoi, anca i bantu i xe vegnù zo da la zona del Niger. I bantu i xe rivà co ondate diverse e i se sa stabilì en tuto el Sudafrica. Anca se no ghe prove serte, se pensa che anca grupi picinini de nilotici i sia vegnù zo da la region de i Grandi Laghi. I bantu i gha introdoto alcune bestie domestiche e l’agricoltura. El fato che alcune lingue bantu le gha incorporà el sistema de i clic (sciochi fati co la lengoa) tipico de le lengoe khoikhoi e san, e el ricatamento de ogeti san ne i resti de ilagi bantu, ne fa pensar che ghera on bon livel de scambio tra i do grupi.

Storia[canbia | canbia sorxente]

Co l’arivo de i portoghexi se pol scominsiar a parlar de storia. I portoghexi i sercava na via par rivar a le Indie par el mar. I gha scominsià a navigar longo le coste de l’Africa en tel 1400. En tel 1486, i xe stà boni de pasar el Capo de Bona Speransa, che el xe el punto pi a sud ovest de l’Africa (el punto pi a sud de l’Africa el xe Capo Agulhas) e do i oceani Indiano e Atlantego i se incontra. I portoghexi i gha fondà de le colonie so la costa tuto en torno a l’Africa, ma i no gha mai meso su na colonia ne la zona del Capo.

I olandexi[canbia | canbia sorxente]

El arivo de Jan van Riebeeck

I olandexi i xe rivà en te la region del Capo en tel XVI secolo. I vaseli i se fermaa qi par tor l’acqua e fruta. En tel 1647 na nave olandexe la xe afondà rente a la Baia de Table Mountain. I marinai i gha costruio on forte e i xe rimasti n’ano prima de esar salvai. La Compania Olandexe de le Indie Orientali, ona de le pi grandi companie de comercio del tempo, la gha deciso de costruir on porto ne la region del Capo par rifornir le navi de acqua, fruta e carne ne i so viagi da e par l’oriente.

El 6 avril 1652, Jan van Riebeeck el xe rivà a la Baia de la Table Mountain par scominsiar stà colonia. De i agricoltori olandexi i gha scominsià a laorar la tera ne le vali rente al Capo pra produsar gran, vin, agrumi e verdure. Dopo on pochi de ani, Ugonoti francexi, e calvinisti todeschi i xe rivà al Capo e i se sa unio a i olandexi. I olandexi i gha anca fato rivar de i sciavi da el Madagascar e da la Malesia. Tanti de questi i sa sposà o i gha vù fioi da i olandexi. I disendenti de sto grupo i vien ciamà ‘Cape Coloured’, i metici del Capo. Co l’aumento de la popolasion, la zona controlà da la colonia del Capo la xe diventà pi granda e la zente la gha scominsià a scontrarse co la popolasion locale, i khoisan. Dopo na guerilia che la xe continuà fin al XIX secolo, i khoisan i xe stà quasi tuti copà o integrà ne la colonia, dando vita al groso de la popolasion meticia (coloured) del Sudafrica de ancò.

I boeri[canbia | canbia sorxente]

Primi boeri

I ofisiali de la Compania Olandexe de le Indie Orientali i no volea che i coloni i ndese masa lontan e fora da el loro control. Ma alcuni de i bianchi de la colonia i gha scominsià a vivar na vita nomade. I gavea on caro cuerto, fusili, la Bibia e i ndava in giro co le so vache. I vivea secondo i detati calvinisti. De tanto en tanto i se faxea na casa de fango cuerta co la paia. I vegnea ciamadi trekboers – contadini vaganti – e presto el nome el xe stà scurtà en boeri. I boeri i parlava olandexe che el se stava svilupando en te na nova lengoa, el afrikaans.

I inglexi[canbia | canbia sorxente]

L’Olanda, intanto, la xera drio perdar la so potensa navale. I inglexi i xe intevegnudi par tor el posto de i olandexi. En tel 1795 i xe rivà a la colonia del Capo e par el 1815 i xera i novi paroni. I inglexi i volea el control del Capo par la posision strategica e i no gavea interese a slargar la colonia. I boeri e i xhosa i xera a i feri corti par via de i confini. I inglexi i gha dovesto intervenir. I no xe stà boni de trovar na solusion, ma i gha rinforsà la so presensa e el so dirito su l’interno del paexe. Poco a la olta, i abitanti de le sità longo la costa i xe diventà inglexi o i parlava inglexe. A l’interno se catava i boeri, che i parlava afrikaans e i no gavea na educasion formale. Politega, finansa, marcà e controlo de le atività minerarie el xera en te le mai de la minoransa de lengoa inglexe. Co la fin de la sciavitù (1833), i boeri i se sa catà sensa na forsa laoro par mandar vanti le so fatorie e i xe diventà ancora pi poareti.

Difaqane e Mfecane[canbia | canbia sorxente]

Shaka Zulu

A l’inisio de el 1800, i popoli che parlaa lengoe nguni e che i vivea en te la region de el kwaZulu Natal, i xera separà in clan tegnù insiema da tanti re. El capo Shaka Zulu, fiol de on capo poco importante, el gha scominsià quel lu el ciamava mfecane, schisar, ma che le altre etnie i ciama difaqane, migrasion forzada.

Shaka el gha cambià la società divisa en ono stato militare e sentralizà. I so grupi armati (impi) i gha scominsià a consquistar terea da i popoli rente de i zula par permetar la espansion del regno de Shaka. I sotho e i swazi i gha reagì formando i regni del Lesotho e del Swaziland.

I altri popoli i se sa spostà, co i tswana e i ndebele che i xe ndà a nord de el fiume Vaal. Co la morte de Shaka en tel 1828, el regno zulu el gha perso forsa. La cresita de la potensa inglexe, la scoperta de oro e diamanti in varie zone del paexe e el movimento de i boeri i xe tuti fatori che portarà a la distrusion del regno de Shaka.

La Grande Migrasion[canbia | canbia sorxente]

A lo steso tempo de la difaqane, i boeri de la region de el Capo i se sa stancà de i inglexi. I no podea acetar la proclamasion de l’egualiansa de le raze e el control politego de la loro libartà. I boeri i gha deciso de spostarse a l’intero par catar novi posti do vivar secondo i loro gusti. Alcuni i volea andar in Tera Santa par poder vivar la religion en pace. I migranti (trekkers) i gha traversà el deserto del Karoo e i xe presto rivà en zone libare. Lori i no savea de la lota de i zulu, e che tante regioni le xera vude parché le tribù iriginarie le se sera spostà par scampar a la guera. Na olta rivà oltre el fiume Orange – confine orientale de la Colonia del Capo – i boeri i sa tolto le tere che i catava, e i no fazea fatiga a copar i africani che i se oponeva. I boeri i no xe stà boni de vinsar contro i ndebele e i sotho del re Moshoeshoe I.

Guerieri Zulu

La grande migrasion de i boeri la sa fermà a Thaba Nchu, rente a Bloemfontein de ancò. Dopo on poco, i capi de i boeri igha litigà e on grupo el sa moso a est, al de la de i monti Drakensberg en tel Natal. El capo de i boeri, Piet Retief, el xe andà a visitar el re de i zulu Dingaan, el fratelastro de Shaka che lo gavea copà par tor el so posto. I zulu i no se gha fidà de Retief e i le gha imprisonà. Co i gha risevù le bestie par pagar la so libarasion, i zulu i gha atacà el campo de i boeri, copando 280 boeri e 250 lavoradori africani. I boeri i gha tentà de vendicar i morti co la batalia de Itala, ma i gha perso.

La guera tra boeri e zulu la xe rivà al so culmine el 16 dicembre 1838. I boeri i gha costruio on campo provisorio longo el fiume Ncome, dove ghera on gomito co le rive sabiose. CO i zulu i gha atacà, i boeri i sa difeso sparando nel mucio. Dopo na giornata de guera, i boeri i gavea on centinaro de feriti, i zulu sete mila morti. El color de l’aqua el xe divantà roso par i tanti morti e la batalia la xe conosuda come la Batalia del Fiume de Sangue [Bloody River Battle]. (I numari esati i no xe sicuri. I boeri i gha sempre vù el interese de far vedar sta batalia come on segno divino al loro dirito a la tera, i zulu i no gha mai avù la posibiltà de lasar na testimoniansa storica. Studi recenti i dixe che ghe stà morti anca tra i boeri e che i zulu no poda esar setemila). La vitoria de i boeri no la xe durà tanto. I inglexi i gha aneso el teritorio del Natal en tel 1843.

Natal[canbia | canbia sorxente]

I inglexi i gavea bisogno del zucaro e i gha deciso de far le coltivasioni en Natal. El nome vien dal portoghexe e vol dir Nadal, el giorno che i portoghexi i xe rivà en te la baia de Durban. I zulu i no volea i inglexi e i sa difeso da sta invasion. En tel 1879, i inglexi i gha perso la batalia de Isandlwana. 1400 soldati inglexi i xe morti anca se i gavea i fusili moderni e tute le munisioni che ghe volea. I zulu i gha continuà la guera ma a la fine i inglexi i gha vinto. Visto che i zulu no volea laorar en te le piantagioni, i inglexi i gha ciamà lavoradori indiani. 150 000 indiani i xe vegnù in Sudafrica en 50 ani, dando vita a la pi grande comunità indiana fora da l’India. Tra de lori anca el Mahatma Gandhi.

Guere boere[canbia | canbia sorxente]

El posto do i gha scoperto l’oro for a de Johannesburg.

I boeri i gha stabilio do republiche la Republica Sudafricana, o Transvaal; e l’Orange Free State, el Stato Libaro de l’Orange. En tel 1869, i diamanti i xe stà catà rente a Kimberley. La zona la xera de i griqua, ma i boeri de le do republiche i dixea che la xera loro teritorio. I inglexi i xe intervegnù e i gha aneso la regione. En poco tempo, eoropei e africani i xe rivà a Kimberley par laorar a la ricerca de i diamanti. I vivea en sitadine, misciadi su sensa problemi. I boeri i gavea on risentimento par stà situasion parché i gavea perso i schei ma anca parché i no asetava che bianchi e neri fuse mesi a lo steso livel.

Done e putei boeri en te i campi de concentramento.

En tel 1880, la prima guera boera la gha scominsià en Transvaal. I boeri i gha vinto la batalia de Majuba el 27 fevrar del 1881 e i gha subito eleto el primo presidente de la so republica, Paul Kruger. I inglexi i gha deciso de crear la federasion de le varie colonie sudafricane par contrastar i boeri, che i xera bianchi e i xera la majoria en te le loro republiche. En tel 1886, l’oro el xe stà catà en tel Witwatersrand, na zona poco fora Johannesburg. La popolasion de la sità l’è cresuda de 100 000 persone in pochi mesi. I boeri i sa catà par la seconda volta mesi da parte ne la corsa a la richeza. I xera anca rabià a vedar i neri che guadagnava schei, e lori che i no gavea niente. Co nel 1895 on grupo de soldati inglexi rinegati i gha tentà de conquistar el Witwatersrand, el presidente Kruger el sa n’acorto che i boeri i no pdea resistar a i inglexi e el gha fato n’aleansa co l’Orange Free State.

En tel 1899, i inglexi i gha domandà che i bianchi che vivea en tel Traansval i gavese el dirito al voto anca se i no iera boeri. Kruger el gha dito de no e el gha dichiarà la seconda guera boera. Le sità principali le xe cascà tute en mano inglexe nel primo ano de guera. L’ultima la xe stà Pretoria. La guera la xe ndà vanti par altri do ani co la guerilia. I inglexi i gha serà su done e putini en te i campi de concentramente do 26 000 de lori i xe morti de fame, malatia e fredo en do ani. El 31 magio 1902, i boeri i gha firmà la fin de la guera riconosendo la sovranità inglexe so la republiche.

Union del Sudafrica[canbia | canbia sorxente]

Dopo la guera, i inglexi i gha ricostruì le infrastruture e fate de le nove. En tel 1907, el Sudafrica el produsea on terso de l’oro del mondo. I boeri i sa visto mesi da parte, sensa la posibiltà de frutar da le miniere del so teritorio e a combatar par conservr la so identità. I inglexi i sercava de imor el inglexe come lengoa da usare sol laoro. El risultà el xe stà na società polarizada tra boeri e altri bianchi. I neri, i indiani e i metici i no xera tolti en considerasion.

En tel 1909, le colonie del Capo, del Natal e i do Stati boeri del Transvaal e de l’Orange i x stà mesi insieme par formar l’Union Sudafricana. I boeri i gavea autonomia governativa. Le lengoe ufisiali le xera l’inglexe e el olandexe Fin al 1925), e solo i bianchi i podea votar e esar votadi. I neri podea poseder tera solo en serte zone (7% de l’area totale). Co el Canada, l’India e la Nova Zelanda el Sudafrica el xera el quarto teritorio a verghe no stato paritario co el Regno Unio. Sto raporto el xe stà confermà durante le do guere mondiali. I sudafricani i gha partecipà en tute e do le guere a fianco de l’Inghiltera.

Diriti[canbia | canbia sorxente]

Fin da l’inisio, solo i bianchi e – pi tardi – i coloured (metici) del Capo i podea votar. I neri i xe sempre stà lasadi fora, così come anca i axiatici. El primo governo de l'Union Sudafricana el xera ne le mane de Louis Botha, Jan Smuts el xera el so vice. El Partito Nasional del Sudafrica (SAP) el xera alineà co i interesi inglexi. A l’oposision ghera el Partito Nasional (NP) che difendeva i interesi de i boeri e de i altri bianchi sudafricani e i volea l’indipendensa da l’Inghiltera.

I neri, anca se i xera el 75% de la popolasion, i no gavea diriti. En te i primi ani el governo el gha fato pasar le legi opresive che vietava a i neri de votar, de scioperar, de verghe laori de on bon livel, e altre limitasioni. En tel 1913 el parlamento el gha aprovà la lege su le tere par i africani (Native’s Land Act). En sto modo, i bianchi, che i xera el 20% de la popolasion i gavea el 90% de le tere del paexe. I neri no podea poseder, afitar o anca solo condividare la tera fora da le riserve.

I ideatori de l’apartheid co la mapa de le sità par i neri

I neri e i metici i gha scominsià a protestar. En tel 1923, i leader neri i gha fondà el Congreso Nasionale de i Nativi Africani, che poi el diventarà el Congreso Nasional Africano (African National Congress – ANC). Mahatma Ghandi el gha organizà la popolasion indiana del Natal par domandar pi diriti sivili.

A lo steso tempo, i boeri – che i se fasea ciamar afrikaaner – i gha spinto per continuar la segregasion de le raze, co i neri costreti a vivar en sità satelite a quele de i bianchi. Dopo la seconda guera mondiale, en tel 1948, el National Party, partito nasional, el gha pasà le legi che fasea de l’apartheid (svilupo separà) la strutura portante de la società. L’apartheid la durerà fin al 1994. La popolasion nera, ma anca i metici, i axiatici e parte de la popolasion bianca, la se sa oposto a l’apartheid. I leader neri, Nelson Mandela, Oliver Thambo, e altri, i gha asetà la prison o l’esilio par lotar contro la mancansa de libartà.

Democrasia[canbia | canbia sorxente]

Dopo deceni de presion politega, de sansioni internasionali e de lota interna, el governo del Sudafrica el gha deciso de pasar a la mediasion politega par rivar a la democrasia. El presidente F.W. de Klerk el gha libarà Nelson Mandela el 2 fevrar 1990. El 17 marso 1992 i sudafricani i gha votà el referendum par metar fin a l’apartheid. El 26 – 29 avril 1994 tuti i sudafricani i gavù la posibilità de votar a le elesioni nasionali. Mandela el xe diventà el primo presidente e Thabo Mbeki vice presidente co F.W. de Kleerk. La nova Costitusion la xe stà aprovada en tel 1996.

Comision Verità e Riconciliasion[canbia | canbia sorxente]

En tel 1995, soto la diresion del arcivescovo angliacano Desmond Tutu, la Comision Verità e Riconciliasion la scominsià a investigar el passà par metar fine a le ingiustisie e aprire la strada a on novo Sudafrica. Le vitime le podea dir la so esperiensa, e i colpevoli i podea confesar le so colpe. La Comision la xe stà on modo par portar el paexe a l’unità.

Ancò[canbia | canbia sorxente]

En tel 1997 Nelson Mandela el se sa ritirà a vita privada e ancò el vive a Maputo, Mozanbico, co la so mojere, Graça Machel. Thabo Mbeki el xe diventà presidente al so posto. L’ANC el xe el pi importante partito, ma la popolasion la xe stanca e a le ultime votasioni locali, 2005, la majoransa la xe stà risicata. El Sudafrica el gha on groso problema co la disocupasion e la criminalità. L’AIDS la xe estesa sopratuto en te le sità. En tel 2010, el Sudafrica el ospitarà la Copa del Mondo de Calcio.