Storia del Sahara Ocidentale

Da Wikipedia, l'ençiclopedia libara.

La Storia del Sahara Ocidentale la xe la storia de l’unica nasion che no la xe mai stà organizada come no Stato in tuta l’Africa. El Sahara Ocidentale la xe anca l’ultima colonia in Africa. La storia del popolo saharawi la se confonde de frecuente co quela de i popoli che vive de rente de lori: marochini e mauritani. El Sahara Ocidentale el xe stà na colonia spagnola dal 1884 al 1975. Da alora, el xe stà aneso dal Maroco. Le Nasion Unie el le considera on teritorio non autonomo.

Preistoria[canbia | canbia el còdaxe]

Come tuti i paexi de l’area sahariana e saheliana, anca el Sahara Ocidentale el xera abità in tenpi preistorici da varie popolasioni. A quel tenpo, 10 000 ani a.C, el deserto el xera fertile e rico de acqua. Da i ricatamenti paleontologici se sa che ghera na etnia nera, probabilmente i bafour che i vivea anca in Mauritania, ma anca on etnia bianca originaria del nord Africa. Co l’arivo del l’olocene (2000 a.C.) el Sahara el ga scominzià a desertificarse, parando via i animali e spinzendo le popolasion verso el sud. I berberi i xe vegnù zo dal nord a scominsiar dal 1000 a.C. I fenici i ga costruio de le picole colonie so le coste.

Islam[canbia | canbia el còdaxe]

L’islamizasion del Sahara Ocidentale la xe scominsià in tal VIII secolo ma la xe rimsata superficiale. L’Islam el xe rivà co i marcanti berberi, lori stesi i seguia na forma de Islam che la gavea tanti aspeti de cristianesimo e de religioni animiste. Dal X secolo, varie tribù berbere le ga conquistà el control del Sahara Ocidentale. I zentei inte le oasi e sità mercantile del nord; i malekiti el sentro e l’ovest; i lemtuna el sud. Da Sijilmassa, in tel nord, partia la pi grande strada carovaniera che, pasando par Aoudaghost e Lemtuna, la andava fin al regno del Ghana. Par sta via i marcanti i ghe portava el sal a le poplasion de l’interno e i le scanbiava co oro e avorio.

I almoravidi[canbia | canbia el còdaxe]

Conquiste almoravidi, in verde.

En tel 1030 i almoravidi che controlava el Maroco i ga scominsià a strenzar de le aleanse co le tribù berbere che le vivea in tel Sahara Ocidentale. I almoravidi i xe rivadi così a controlar parte del apexe, sensa mai darghe na unità aministrativa. Dopi i almoravidi, i almohaidi e i marinidi i ga continuà el proceso de arabizasion. Le tribù arabe de origine yemenita mandade da i fatimidi egisiani le ga influensà la cultura fin che ancò se parla oncora el dialeto arabo de origine yemenita. L’arabizasion de i saharawi la xe ndà vanti fin al 1400 sirca.

Eoropei[canbia | canbia el còdaxe]

I primi eoropei che i xe rivà so le coste del Sahara Ocidentale i xe stà i doe navigatori genovexi Vandino e Ugolino Vivaldi in tel 1291. Dopo de lori, portoghexi e francexi i xe pasà so le coste, ma nisun el ga fato de le esplorasion a l’interno. Verso el 1400, i portoghexi i ga scominsià a pasar regolarmente longo la costa africana e a costruir de le baxi fise. Da la Mauritania, i portoghexi i ga anca verto de i contati comerciali co le tribù costiere del Sahara Ocidentale.

En tel 1449 el re Giovani II de Castilia el ga dà a Juán de Guzman le tere da Cao Ghir a Cao Bojador. De fato, i spagnoli i xe rivà sol continente solo che in tel 1476 co i ga costruio on forte de cui se ga perso ogni tracia. En te i primi ani, i spagnoli i ga usà el fore come baxe de partensa par caturar sciavi. La scoperta de l’America la ga fato perdar la voja de conquista in Africa e spinto i spagnoli verso l’ovest. En tel 1496, la confederasion berbera de la region de Messa la ga acolto na delegasion spagnola e streto legami de comercio co lori.

I portoghexi i ga costruio el forte de Santa Croxe de Cao Aguer in tel 1505. I spagnoli i ga costruio on secondo forte a Santa Cruz de Mar Pequeña. El forte el xe stà atacà da i berberi de Massa in tel 1516 e 1517, e ditruto in tel 1524. Anca el forte portoghexe el xe stà distruto in tel 1541. Da alora, i portoghexi i ga rinforsà la presensa in Senegal e inte i altri porti a sud de Dakar.

Dominio marochino[canbia | canbia el còdaxe]

I Saadiani[canbia | canbia el còdaxe]

Conquêtes des Saadiens

Co l’arivo al potere de la dinastia saadiana in Maroco, l’influensa del paexe nordafricano so el Sahara Ocidentale la xe divegnuda forte. I saadieni i rivavi a controlar el deserto fin quasi a Timbuctù e la costa fin al Senegal. L’esercito de Ahmed al Mansur Saadi el ga vinto la bataja de Djouder (1591), che la ga segnà la fin del regno de Songhai e esteso el so dominio in Africa. Co la morte de al-Mansur (1603), i fioi i se sa diviso el regno che a so olta el sa spacà in tanti feudi. El controlo marochino el xe presto spario in tuto el Sahel. En tel 1632, Gao e Timbuctù le xera indipendenti. Anca in tel Sahara Ocidentale, le tribù berbere le xera libare dal controlo marochin.

I Alouiti[canbia | canbia el còdaxe]

Moulay Ismail

En tel 1644, le tribù sanhadja le se sa reoltà contro le tribù hassaniya, da do vegnea i saadiani. Dopo trent’ani de guera, i arabi i xe tornà in control del deserto. Moulay Ismail, de la dinastia alouita, el ga comandà tante incursion in tel deserto (1724 – 1727) par rinforsar el controlo marochin. Dopo la so morte, i marochini i ga n’antra olta perso el control direto de la region. En tel 1767 el sultan Mahammed III el ga firmà el tratato de Marakech co el re Carlo III de Spagna do el riconose che le Ixole Canarie le xe de la Spagna che la povea anca controlar el teritorio a sud del uadi Noun, el testo arabo del tratato el xe diverso da quelo spagnolo e ghe daria manco libartà a i spagnoli.

I sultani alouiti i ga de frecuente tentà de fermar i eoropei che i ga costruio de le baxi comerciali inte la region a sud de l’uadi Noun. Inportante xe la question anta contro el scoseze Donald McKenzie. Mc Kenzie el controlava na strisia de costa de 12 km par 3 rente del Cao Juby che el gavea conprà in tel 1879 da Mahammad Bayruk, el cao de i souss. El sultan Moulay Hassan el ga mandà el so esercito par parar via McKenzie in tel 1880 sensa riusirghe. En tel 1882, el sultan el ga tentà de sotometar la tribù de i souss, anca staolta sensa suceso. El xe solo in tel 1886 che i marochini iriese a metar le mane so la tera de McKenzie, ma i ga dovesto pagare na conpensasion a l’omo d’afari. El Maroco el continua la so espansion a sud e in tel 1893 el pol afermar la so autorità so la region.

En tel 1895, i inglexi i ga tentà de tor el Cao Juby co on tratato, ma el tentatio el xe falì. El tratato firmà el 13 marso 1895 el dixe che ‘nesuna potensa la podarà pretendar de verghe diriti su la tera da l’uadi Draa al Cao Bojador parché ste tere le xe del Maroco’. El Maroco el ga usà sto tratato par dimostrar i so diriti su la region, teoria respinta da la Corte Internasional de Giustisia parché el tratato el xe on documento che indica solamente che el Regno Unio nol gavaria moso de le pretese so la region e no che dimostra l’apartenensa del Sahara Ocidentale al Maroco.

Colonia[canbia | canbia el còdaxe]

El Sahara spagnolo

I pescadori spagnoli de le ìzołe Canarie i ga costruio varie baxi tenporanee so le coste del Sahara Ocidentale longo i secoli. En tel 1881, la Sociedad Pesquerías Canario-Africanas la ga ostruio on inbarcaredo so la Ponta Durnford. En tel 1884, Emilio Bonelli y Hernando de la Sociedad Española de Africanistas y Colonistas el ga firmà on tratato co i cai saharawi che i ga cedù la penìzoła del Rio de Oro, do ancò se cata la sità de Dakhla. El 26 dicembre 1884 la Spagna la proclama el protetorato del Rio de Oro dal Cao Bojador al Cao Bianco. La Conferensa de Berlin la riconose le rivendicasion spagnole. El protetorato el vien esteso el del 1887 fin a Seguia el Hamra so la costa e par 240 km a l’interno. En tel 1900, Fransa e Spagna le firma el tratato de Parigi (27 giunio) par defenir el confin tra Rio de Oro e Mauritania. El 4 otobre 1904 la Convension de Parigi la fisa anche el confin a nord tra Rio de Oro e Maroco Spagnolo.

I spagnoli no ga mai da tanta inportansa a la esplorasion de la colonia e al so sfrutamento. I francexi, invese, i ga de frecuente sconfinà in tel Sahara Spagnolo durante le so guere co le tribù nomadi de la Mauritania. La sità de El Aaiún la xe stà fondà in tel 1940. De sto periodo el xe anca la prima esplorasion fata da i spagnoli e le conseguenti legi par el svilupo de i saharawi.

Tension[canbia | canbia el còdaxe]

El «Grande Maroco»

El Maroco el xe diventà indipendente in tel 1956. I pi radicali i ga voluo subito riconquistar i teritori che i xe aprtegnùal Maroco in tel pasà par ricrear el «Grande Maroco». I marochini i volea che la Spagna la ghe dese la colonia del Sahara Spagnolo e che i francexi i ghe dese la Mauritania. El Maroco el se sa oposto a l’indipendensa de la Mauritania e a la so entrade inte le Nazioni Unie. En tel 1956 el Maroco el ga creà la Armata de Liberasion del Maroco del Sud par parar via i spagnoli da l’enclave de Ifni. L’Armata la ga vinto le prime bataje ma la xe stà respinta da i spagnoli jutà da i francexi ent el febrar 1958. La Spagna la ga restituì la Strisia de Tarfay al Maroco in tel 1958 ma la reunise tuti i teritori de la region soto el nome Colonia Del Rio de Oro e Saguia el-Hamra co cavedal a El Ayun.

E tel 1963, el Maroco el ga domandà a le Nasion Unie che el Sahara Spagnole el vegnese restituio a lori. Le Nasion Unie le ga senpre sotegnù el dirito a l’autoderminasion del popolo saharawi.

En tel 1969 la Spagna la ga restituio al Maroco la region de Ifni. El 10 magio 1973 vari grupi de oposision a la Spagna e in favor de la autoderterminasion i fonda el Fronte Polisario. En tel 1974, la Spagna la ga anuncià on referendum par l’autodeterminasion de la colonia. El Maroco el se sa meso d’acordo co la Mauritania de dividarse el teritorio del Sahara Spagnolo, mente che le Nasion Unie el 13 dicembre 1974 le riafirmava el dirito de i saharawi a l’autodeterminasion. El 14 novembre 1975 la Spagna la ga firmà n’acordo co Maroco e Mauritania par dividar la colonia, in canbio la otiene lo sfrutamento de i fosfati de Bou Craa e i diriti de pesca inte le acque de la colonia. La zente de la colonia no la xe stà consultà.

Guera[canbia | canbia el còdaxe]

Trupe del Polisario.

El 11 dicembre 1975 le trupe marochine le ga ocupa El Ayun, el 20 dicembre i mauritani i ga ocupà el sud del teritorio. El 12 genaro 1976 le ultime trupe spagnole le lasa la colonia. I ocupanti i scominsia subito a arstar la zente, torturar i ativisti politeghi e a usar el napalm contro i sivili. El Fronte Polisario, sostegnù da l’Algeria, el scominsia la guera contro i ocupanti. El exercito marochino riese a parar via i guerilieri, mentre che el esercito mauritano el ga perso el confronto. En tel febraro el Fronte Polisario el proclama la Republica Araba Saharawi Democràtega che la vien reconosuda da l’Algeria. El Fronte Polisario el ga subito ocupà la zona de Bou Craa e impedio lo sfrutamento econòmego de i fosfati. La majoria de la popolasion la xe scampà a Tindouf in Algeria do la vive in canpi profughi. Dopo le prime perdite contro i marochini, i guerilieri i canbia la situasion fin al punto de atacar i soldadi marochini in Maroco.

Costrusion de le mura

En tel 1980, par fermar le incursion de i guerilieri, el Maroco el scominsia a costruir le mura in tel deserto. Le mura le xe fate de sabia e piere e le xe altre tri metri, co el fil spinà in sima. Le mura, finie in tel 1987, le riese a tegnar fora i guerilieri, ma la ferma anca el svilupo del teritorio.

Co la morte de Hassan II (1999), re marochino ditatore e conservatore, i saharawi i sperava che la guera la finise e che se posa finalmente fare el referendum par la autoderterminasion. El novo re, Mohammed VI, el ga smeso la guera direta contro i saharawi ma el se sa anca oposto a on referendum de i saharawi. El re el vol che anca i marochini che vive in tel Sahara Ocidental i posa votar. En tel lulio 2007 on primo giro de negosiasion el sa verto a Manhasset, rente de New York in America par metare d’acordo Marochini e rapresentanti de i saharawi.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Storia_del_Sahara_Ocidentale&oldid=1161534"