Fronte Polisario

Da Wikipedia, l'ençiclopedia libara.
Va a: navigasion, serca

El Fronte Polisario, Fronte Popolare par la Libarasion de Saguia el Hamra e el Rio de Oro, el xe on movimento che el combate par l’indipendensa del Sahara Ocidentale dal Maroco e l’autoderterminasion del popolo saharawi.

Storia[canbia | canbia sorxente]

En tel 1971, on grupo de studenti universitari saharawi en Maroco i ga scominsià a encontrarse par formar on movimento de libarasion del so paexe. I ga anca tentà de farse riconosar da paexi arabi de la region. Algeria e Maroco i ga rifiutà, Libia e Mauritania i ga mostrà poco interese. El movimento el se sa alora spostà en tel Sahara Ocidentale par tacar la guerilia.

La costitusion ufisial del grupo la xe vegnuda el 10 magio 1973. El primo obietivo el xera quelo de parar via i spagnoli. El primo Segretario Generale el xe stà El-Ouali Mustapha Sayed. El 20 magio 1973, Sayed el ga direto el primo ataco militare del Fronte Polisario contro la postasion de khanga. I spagnoli i gavea meso su na milisia locale. Questi i ga scominsià a disertar par unirse al Polisario, co i disertava i portava via le so armi e munisioni. Dopo on par de setimane, i guerilieri Polisario i xera za pi de 800. Simeon Aké, comisario de le Nasioni Unie, el ga visità el paexe en tel gunio 1975 e el ga constatà che la popolasion la volea l’autodeterminasion, sensa parlar de integrasion en tel Maroco o la Mauritania.

Ritiro spagnolo[canbia | canbia sorxente]

I spagnoli i volea lasar la colonia e, en te l’estate 1975, i ga scominsià na negosiasion co el Maroco e la Mauritania che la ga portà a la firma de i Acordi de Madrid. Co el ritiro de la Spagna, el Maroco se aneteva el Saguia El Hamra (el nord del paexe) e la Mauritania el Rio de Oro (el sud).

El Fronte Polisario, co el sostegno de l’Algeria, el ga proclamà l’indipendensa. Da la so baxe en Tindouf, el Fronte Polisario el xe stà bon de conbatar contro la Mauritania e rivar fin a Nouakchott. Na olta parà via i mauritani dal teritorio, el Polisario el se sa concentrà contro i marochini, che i gavea on esercito pi preparà e mejo eqipagià.

Situasion anbigua[canbia | canbia sorxente]

La progresion del muro

El Maroco el xe stà bon de tegnar i guerilieri del Polisario en tel deserto grasie a la costrusion de na serie de mura a difesa de le sità e de le zone produtive del paexe. I guerilieri i no ga podesto vinsar contro n’esercito ben preparà, el Maroco el ga dovù spendar some enormi par mantegnar el control del paexe. El Polisario el controla on terzo del paexe, ma el xe el terzo del teritorio sensa valor economico.

Le trupe de le Nasioni Unie, el MINURSO, le controla el cesate el fogo ragiunto en tel 1991. I acordi i xera par verghe on referendum so l’autodeterminasion en tel 1992. Da alora, el Maroco el ga senpre trovà de le scuse par rimandar el referendum.

La Republica Democratica[canbia | canbia sorxente]

El 27 febraro 1976, el Polisario el ga proclamà l’indipendensa de la vecia colonia spagnola. El governo el vive en exilio. La Republica Araba Saharawi Democratica (RASD) la ga on ramo giudisiario e on parlamento. Tute le struture le se cata en Algeria. La Costitusion la prevede na democrasia multipartitica. Mohamed Abdelaziz el xe stà presidente de la republica par i ultimi trent’ani. La RASD la xe menbro de l’Unità Africana ma no de le Nasioni Unie. La xe reconosuda da 43 nasioni de l’Africa e de l’America Latina. La RASD la ga la baxe a Tindouf, ma la cavedal sinbolica la xe Bir Lehlou, na sitadina en tel nord est del paexe. La cavedal oficial la rimane El Ayun.

Strutura del Polisario[canbia | canbia sorxente]

El Fronte Polisario el xe direto da on Segretario Generale. El primo el xe stà El Ouali Mustapha Sayed, e dopo de lu, Mahfoud Ali Beiba. Dal 1976 el capo el xe Mohamed Abdelaziz, che el xe anca presidente de la republica. El Segretario Generale el xe eleto da el Congreso Generale Popolare (CGP) che el se tien ogni quatro ani. I rapresententi al CGP i vien da tuti i canpi, da le organizasioni de le done, de i zoeni, de i lavoradori, e da i delegati militari de i militari. EL CGP el xe el pi alto livel decisionale de la RASD. En tel periodo tra do diversi incontri, le decisioni le vien tolte da el Segretariato Nasional de 41 rapresentanti.

En tel 2004, on grupo de disidenti el ga proclamà la costitusion de el Fronte Polisario Khat al Shahid. Co el novo Fronte la politica de l’unità par la libartà la se sa roto. El Fronte Polisario el ga da afrontar stà situasion par evitar de indebolirse en lote interne prima ancora de rivar al referendum.