Àfrica

Da Wikipedia, l'ençiclopedia libara.
Va a: navigasion, serca
L'Africa

L'Africa ła xé el secondo continente par estensiòn e popołasiòn (dopo l'Axia). Ła só superfisie, pari a 30 065 000 km², ła xe el 20,3% de łe tere emerse del pianeta, i soi abitanti (oltre 800 000 000) i costituise un sètimo de ła popolasiòn mundiałe. L'Africa ła xe dełimità a nord dal Mar Mediteraneo, a òvest da l'Oceano Atlantico, a Sud da l'Oceano Antartego e a est da l'Oceano Indiàn. A nord-est ła xe separà da l'Axia dal Canałe de Suez che l'è artifiçiałe. Ła xe traversà da l'Equator e caraterizà da na gran varietà de climi.

Miłioni de ani fa, ła gera tuto un bloco de tera insieme col Sud-Amèrica e pian pian łe sa ga divixo co l'Atlàntego in mezo.

Al dì de ancó ła xe divixa pułitegamente in 64 Stati, pi dó enclave spagnołe su la costa del Maroco, cioè łe do sità de Ceuta e Melilla, e l'isola de Réunion che la fa parte giograficamente de l'Africa ma politicamente la xe soto de la Francia.

Giografia[canbia | canbia sorxente]

L'Africa vista dal satelite

El continente africano ga n'andamento nord sud. El xe de forma pi o meno triangolare co la parte setentrionale pi larga de quela australe. Al nord se cata el Mar Mediteraneo, a est el Mar Roso e l'Oceano Indiano, a ovest l'Oceano Atlantico. L'Africa l'è separà da l'Eoropa da lo Streto de Gibiltera e da el Canal de Sicilia; l'è unia a l'Axia da la penisola del Sinai.

El punto pi a nord xe Ras ben Sakka, in Tunisia, el punto pi a sud xe Cape Agulhas en Sudafrica, co na distansa de 8 000 km. El punto pi a ovest xe le Isole de Capo Verde e quelo pi a est Ras Hafun en Somalia, co na distanza de 7 400 km. Lo Stato pi grande xe l'Algeria, e el pi pecenin le Seychelles.

L'atitudine media del continente xe de 600 metri sul livel del mar. Grosomodo, el nord del continente xe baso e pianegiante, mentre al sud se cata i altipiani. Le montagne pi alte xe el Kilimanjaro (5895 m), el Kenya (5199 m ), el Ruenzori (5110 m). Questi xe monti che confina co la Rift Valley e xe de origine vulcanica. El monte Camerun (4070 m) xe l'unica alta montagna lontana da la Rift Valley.

En tel nord se cata el deserto del Sahara, el pi grande del mondo (9 000 000 km²). El Sahara el xe pianegiante, ma ghe anca de le catene de montagne. Importante xe la catena de l'Atlante, che separa el deserto da la costa marochina a ovest. A sud del Sahara ghe na fasia semi-desertica ciamada Sahel.

Se se guarda a l'area del continente, l'Africa ga na costa curta. L'Eoropa, con manco de on terzo de l'area, gha 32 000 km de costa. L'Africa gha solo 26 000 km longo el mar. Se trata par lo pi de coste lineari, sensa insenature profonde. I unici do golfi importanti xe quelo de la Sirte (Libia) e quel de Guinea (dal Ghana al Gabon). Tuti e do golfi larghi.

Le coste xe pianegianti al nord, longo el Mar Mediteraneo, e in Somalia, Namibia e Mauritania. Longo el Golfo de Guinea e in Mozanbico - ma anca in certe aree de la Tanzania e del Kenya - ghe coste base cuerte da mangrovie. El resto de la costa l'è generalmente alta co dirupi e montagne che le finise diretamente nel mar. El Madagascar xe l'unica isola de grandi dimensioni. Le altre isole, iè picole e speso le forma arcipelaghi rente de la costa.

Le aque[canbia | canbia sorxente]

In Àfrica ghe xé vaste zone dexèrteghe sensa aque superficali - deserti del Sahara, Namib, Kalahari. Ghe xé dełe zone do i fiumi i finise 'ntel deserto o en łaghi interni (l'Okavango del Botswana finise nel deserto, i fiumi rente del Lago Ciad i se buta nel lago, lontan dal mar, e l'Omo se buta nel Lago Turkana). En tuta la zona central de el continente se cata fiumi che riva al mar. En el Oceano Atlantico se buta el Niger, el Volta, el Congo e altri piassè pecenini. Ne l'Oceano Indiano se buta el Zanbesi. El fiume pi imporante xe parò el Nilo, che xe el pi longo del mondo (6 671 km). El Nilo nase dal Lago Vittoria, ance se ghe zente che vede en tel fiume Kagera el primo ramo del Nilo. El Nilo che nase en Uganda l'è ciamà Bianco, par distinguarlo da el Nilo Azuro che vien zò da i altipiani de l'Etiopia e se unise al Bianco a Khartum, la cavedal del Sudan. Dopo verghe traversà Uganda, Sud Sudan, Sudan e Egito, el Nilo se buta nel Mar Mediteraneo co on grande delta. Longo la Rift Valley, la pi longa vale de la Tera, ghe tanti laghi. I pi importanti xe el Vitoria, el Tanganica, el Turkana, el Malawi.

Ecosistemi e Regioni[canbia | canbia sorxente]

Regioni de l'Africa

L'Africa gha na granda varietà de ecosistemi. Se pasa dal deserto (Sahara, Kalahari) a le foreste (del Congo, del Gabon, del Madagascar), a le savane semidesertiche del Sahel, a quele de l'Africa Orientale. L'alta montagna se cata en Etiopia e en Kenya. Tipicamente mediteranee xe le coste del Maghreb ma anca la zona costiera de la region del Capo, en Sudafrica.

L'Africa la xe stà divisa en cinque regioni, come in te la cartina qua a sinistra:

Questa la xe la division adotà da le Nasioni Unie par i loro studi de statistega. No la xe na division che rispeta le culture, la giografia o la storia de i popoli.

Altre regioni africane le xe:

Clima[canbia | canbia sorxente]

Africa fisica
Africa dal satelite

El clima xe generalmente caldo, anca se ghe grandi variaxioni e zone frede. El nord gha on clima mediteraneo, co grose escursioni termiche dal di a la note. Nel Sahel ghe ponte masime manco forti, co inverni miti. Ne la zona tropicale, ghe on clima caldo longo le coste e ne le zone soto i 1000 metri. I altipiani de l'Africa Orientale xe temperati, e i inverni (lulio - setembre) xe fredi co temperature soto lo zero. El Madagascar gha on clima tropicale, mentre el Sudafrica varia da caldo al nord e so la costa orientale, a fredo su i altipiani e la costa del Capo.

Fauna[canbia | canbia sorxente]

I animali de l'Africa iè conosudi en tuto el mondo. I pi famoxi xe i felidi – leon, lionpardo, ghepardo. Ma ghe anca i canidi – licaon e siacali. Difuse en tute le foreste xe le simie – simpazè, gorila. Ne le savane se cata elefanti (ma ghe anca elefanti de la foresta), girafe, rinoceronti, e i grandi bovini – bufali, gnu – sensa desmentagarse de antilopi e gazele. Le acue xe popolà da cocodrili, ipopotami e pexi de tute le speci. I mari gha na granda varietà de pesi, corali, crostacei e altre forme viventi. Particolarmente bele xe le bariere coraline de l’Oceano Indiano.

I pi importanti parchi nasionali che serva a protezar la natura xe: Tsavo, Maasai Mara (Kenya), Serengeti (Tanzania), Kruger (Sudafrica, Mozanbico e Zimbabue), Chobe e l’Okavango (Botswana).

Storia[canbia | canbia sorxente]

Exquisite-kfind.png Par saverghene de pì, varda ła pajina Storia de l'Africa.


I pi antighi ricatamenti de i ominidi se cata en Africa, en te la Rift Valley. I pi antichi osi umani i sa catà en Tanzania (Olduvai Gorge), Kenya (Turkana) e Etiopia (Afar). I primi omeni sa spostà a nord, traversando el toco de mar che separa Gibuti da lo Yemen e gha popolà la tera. I grupi rimasti in Africa gha dato vita a i pigmei, i primi veri abitanti de l’Africa interna, e a i vari grupi (sudanici, bantu, hamitici, ecc.) che i gha conquistà el continente a partir dal VII secolo de la nostra era.

Par tanti secoli, l’Africa la gha vù pochi contati co i altri continenti. Al nord ghe senpre stà el contato co i popoli mediteranei. So le coste de l’Oceano Indiano ghe stà contati co i marcanti persiani, indiani, e arabi. Na spedision cinese l’è rivà su le coste del Kenya e de la Tanzania de ancò nel XIV secolo. Minatori indiani gha scavà de le miniere en te le montagne del Drakensberg (Sudafrica) nel XI secolo.

Secondo Erodoto (Erodoto, Storie - Libro quarto), i fenici i gha fato la prima navigasion conpleta intorno a l’Africa nel 600 a.C., co tre ani de navigasion. Tacito el conta de na spedision romana che saria rivà fin a le cascate Marchinson sul fiume Nilo, in Uganda. Se sa che marcanti romani vegnea fin su le coste del Kenya par comprar merci da marcanti arabi.

I primi contati tra eoropei e i africani del centro del continente xe del XIV secolo, co esporatori eoropei gha scominsià a seguire le carovane del sale che da la costa mediteranea entrave ne l’interno, e quando portoghexi e olandexi gha scominsià a cercar na vie par le Indie par contraster el monopolio venexian del marcà oriental, e par evitar la mediasion de i paexi musulmani ne i contati co India e Cina. I portoghexi gha scominsià la loro presenza en Africa co la conquista de Ceuta, na cità su le coste del Maroco. Par tuto el XIV secolo i portoghexi i sà spinto longo le coste de l’Africa. Na spedision guidà da Pedro del Corvilâo xe ndà da el Mar Roso a la foce de el Zambesi en tel 1487. Da i calcoli fati, i gha scoverto che l’Africa la finea a ponta.

En tel 1488, Bartolomeu Dias el sa spinto pi a sud de tuti i so predecesori. Na tempesta lo gha butà fora rota, e solo dopo vari giorni de navigasion e calcoli su la posision, el gha scoverto de verghe pasà el sud de l’Africa. Par via de la tempesta, el gha ciamà el capo "Capo de le Tenpeste". El re Giovanni II de el Portogalo gha canbià el nome en “Capo de Bona Speransa”. Bisogna parò dire che sto Capo xe la posision pi a sud-est de l’Africa, la vera ponta pi a sud la xe el Capo Agulhas, qualche centenaro de chilometri pi a ovest del Capo de Bona Speransa. En tel 1497, Vasco da Gama gha rifato la rota de Dias e, dopo ver tocà varie coste de l’Africa oriental, el xe rivà en India el 19 magio 1498. Par do secoli dopo la circumnavigasion de el continente, i eoropei xe restà su le coste, co poche esplorasioni de l’interno.

La colonizasion de l’Africa la xe scominzià en tel 1800. Dopo le prime conquiste, le potenze eoropee le gha diviso l’Africa a la Conferensa de Berlino. I confini de ancò, i riflete ancora le divisioni fate ne l’epoca coloniale.

Stati del mondo | Africa
Flag of Algeria.svg Algeria | Flag of Angola.svg Angoła | Flag of Benin.svg Benin | Flag of Botswana.svg Botswana | Flag of Burkina Faso.svg Burkina Faso | Flag of Burundi.svg Burundi | Flag of Cameroon.svg Camerun | Flag of Cape Verde.svg Capo Verde | Flag of Chad.svg Ciad | Flag of Côte d'Ivoire.svg Costa d'Avorio | Flag of Egypt.svg Egito | Flag of Eritrea.svg Eritrea | Flag of Ethiopia.svg Etiopia | Flag of Gabon.svg Gabon | Flag of The Gambia.svg Gambia | Flag of Ghana.svg Ghana | Flag of Djibouti.svg Gibuti | Flag of Guinea.svg Guinea | Flag of Equatorial Guinea.svg Guinea Equatorial | Flag of Guinea-Bissau.svg Guinea-Bissau | Flag of the Comoros.svg Comore | Flag of Kenya.svg Kenya | Flag of Lesotho.svg Lesotho | Flag of Liberia.svg Liberia | Flag of Libya.svg Libia | Flag of Madagascar.svg Madagascar | Flag of Malawi.svg Malawi | Flag of Mali.svg Małì | Flag of Morocco.svg Maroco | Flag of Mauritania.svg Mauritania | Flag of Mauritius.svg Mauritius | Flag of Mozambique.svg Mozambico | Flag of Namibia.svg Namibia | Flag of Niger.svg Niger | Flag of Nigeria.svg Nigeria | Flag of the Central African Republic.svg Republica Sentrafricana | Flag of the Democratic Republic of the Congo.svg Rep. Dem. del Congo | Flag of the Republic of the Congo.svg Republica del Congo | Flag of Rwanda.svg Ruanda | Flag of Sao Tome and Principe.svg São Tomé e Príncipe | Flag of Senegal.svg Senegal | Flag of Seychelles.svg Seychelles | Flag of Sierra Leone.svg Siera Leon | Flag of Somalia.svg Somałia | Flag of South Africa.svg Sudafrica | Flag of Sudan.svg Sudan | Flag of South Sudan.svg Sud Sudan | Flag of Swaziland.svg Swaziland | Flag of Tanzania.svg Tanzania | Flag of Togo.svg Togo | Flag of Tunisia.svg Tunixia | Flag of Uganda.svg Uganda | Flag of Zambia.svg Zambia | Flag of Zimbabwe.svg Zimbabwe
Enclave e posedimenti europei
Flag of Spain.svg Ceuta (Spagna) | Flag of Spain.svg Melilla (Spagna) | Flag of France.svg Réunion (Fransa) | Flag of Saint Helena.svg Sant'Ełena (Regno Unìo)
Teritori con stato legałe mìa definìo
bandiera Sahara Ocidental