Storia del Gambia

Da Wikipedia, l'ençiclopedia libara.
Va a: navigasion, serca
Mapa del Gambia en tel 1881

La Storia del Gambia la scominsia co la so apartenensa teritoriale a i antichi imperi del Ghana e del Shongai. Le prime testimonianse scrite le xe del X secolo d.C. La trata trans-sahariana de sciavi, oro e avorio la rivava fin qi. Se calcola che ne i primi sinque secoli del milenio pasà, almanco sinque milioni de sciavi i xe stà portà via da la region del SeneGambia da i marcanti arabi. En tel XIV secolo, i abitanti del Gambia i xera tributari del impero del Mali, par poi pasare soto l’influensa de i wolof, etnia che se cata so la costa dal fiume Senegal al fiume Gambia. I primi eoropei a rivar qi i xe stà i portoghexi en tel XV secolo. En tel 1588 i portoghexi i gha vendù i diriti de comercio sul fiume Gambia a i inglexi.

Cartina de l’Ixola de Giacomo e del Forte Gambia

En te i secoli XVII e XVIII Inghiltera e Fransa i gha continuamente batajà par el predominio comerciale so ste coste fin che en tel 1783, co el tratato de Parigi, i inglexi i gha otegnù el control de la region. En tel 1807, l’Inghiltera la gha abolì el comercio de i sciavi. Par controlar le coste del SeneGambia i gha costruio el forte de Bathurst (ancò Banjul) en tel 1816. El Gambia el xera aministrà da la Siera Leone e el xe diventà colonia autonoma solo che en tel 1888. Dopo la seconda guera mondiale, el Gambia el gha domandà l’autonomia. L’indipendensa la xe rivà el 18 fevraro 1965. El 24 aprile 1970, el Gambia el xe diventà na republica costitusionale e el primo presidente el xe stà Dawda Kairaba Jawara. En tel 1981, co el presidente el se catava a Londra en visita uficiale, Kukoi Samba Sanyang el gha fato on colpo de stato. El presidente el gha domandà al Senegal de intervenir. Dopo na setimana de scontri, le trupe senegalexi le gha vinto e le gha imposto al Gambia de far na confederasion co lori. El SeneGambia el xe nato così. Dopo oto ani, la confederasion la xe stà siolta.

L'Arco 22, chel ricorda el colpo de stato del 1994

En tel lulio 1994, i militari i gha fato el secondo colpo de stato e deposto Jawara. El colonel Yahya A.J.J. Jammeh el xe stà eleto presidente prometendo el ritorno a la democrasia. A le elesioni del 1996 e del 2001, Jammeh el xe stà rieleto. El presidente el se sa ripresentà en tel 2006 e el xe stà rieleto, anca se l’oposision la gavea domandà el ritiro dopo pi de diexe ani al governo.