Storia del Kenya

Da Wikipedia, l'ençiclopedia libara.
Va a: navigasion, serca

I paleontologi che i gha scavà in Kenya, i xe stà boni de catar dinosauri e altri animali fosili de 200 milioni de ani fa. Se sa che tuta l’Africa Orientale la gavea na fauna animale molto vasta. In scavi a rente del Lago Turkana, en tel nord del paexe, Richard Leakey e Kamoya Kimeu – del Museo de Sciense Naturali de Nairobi – i gha catà osa de ominidi de 2,5 e 1,8 milioni de ani fa aparteneti ai generi Homo abilis e Homo erectus. Anca se i ricatamenti pi antichi de Homo sapiens (l’omo moderno) i xe stà fati in Etiopia, se sa che i primi omeni i vivea anca en te la Rift Valley en Kenya. I siti di Olorgesaile, tra Ongata Rongai e Magadi, e la Colina de i Iraci a Nakuru dimostra na continua presenza de ominidi e omeni.


Primi abitanti[canbia | canbia sorxente]

I primi abitanti serti de l’area che la diventarà el Kenya i xe stà popoli simili a i pigmei. De lori se cata ancora de le trace en te i nomi de i posti. Do grupi etnici del Kenya – i elgeyo e i ogiek – i gha na streta parentela co sti grupi. I pigmei i xe stà parà via da i bantu e i nilotici co i xe entrà en tel Kenya. Popoli cusciti i xe entrà en Kenya fin da el 2 milenio prima de Cristo.

Se sa che marcanti fenici, egisiani, greci e romani i vegnea su le coste del Kenya par comprar spezie e animali esotici. Anca marcanti arabi i vegnea su ste coste fin da el primo secolo de la nostra era.


Influenza axiatica[canbia | canbia sorxente]

Roine de la moschea de Ghedi

Grupi arabi e persiani, e forse anche indiani, i sa sistemà so la costa za dal VIII secolo d.C. Questi i xera marcanti che comprava roba da i neri locali e i le vendea en Arabia e Persia. I gha costruio sità so tuta la costa e se pol ancora vedar le roine de alcune de queste (Mwana Maryamu, Ghedi, Jumba la Mtwana, Shimoni e altre). I bantu i xera za rivà su la costa. Altri grupi bantu (kikuyu, kamba, luya) e nilotici (maasai, turkana, pokot, luo) i arivarà durante i ultimi oto - nove secoli. Ancò do terzi de la popolasion de el Kenya la disende da sti grupi che i se sa postà longo la Rift Valley, rente al Lago Vitoria, ntorno al Monte Kenya, e ne i altipiani del centro sud del paexe.

Mombasa xera el porto dove se podea conprar avorio, oro e spezie. I ultimi studi su la trata de i sciavi i dixe che i porti interesà xera Malindi e Shimoni. No sembra che Mombasa fuse anca on punto de arivo de le carovane de sciavi. I grandi viagiatori arabi al-Idrisi (1151) e ibn Battuta (1331) i parla de Mombasa ne i so scriti. La spedision cinese de Zheng He la gha aprodà a Mombasa en tel 1415.

Colonialismo[canbia | canbia sorxente]

Kenya-relief-map-towns.jpg

I portoghexi i xe stà i primi eoropei a rivar su la costa en tel 1498, co Vasco de Gama che esplorava le coste de l’Africa par verzar la via par le Indie. I portoghexi gha sachegià la sità en tel 1500 e 1528, e i gha costruio on forte (Fort Jesus) che controla l’entrada del Tudor Creek, ono de i do trati de mar che separa l’ixola da la tera ferma. En tel 1638, Mombasa xera na colonia portoghexe soto el controlo de Goa (India) ma la xe pasà soto el sultanato de Oman en tel 1698, controlà da el sultan de Zanzibar. La fameja de i Mazrui xera i governatori (liwali) locali. I portoghexi i gha costruio na postasion a Malindi, ma i no se mai entrà ne l’interno.

I arabi de l’Oman i xe stà boni de metar insieme le sità stato su la costa – da la Somalia al nord Mozanbico – e a unificar el marcà de sciavi, oro, avorio e spezie. L’influensa omanita su la costa la xe stà granda. Anca se dal 1880 i omaniti i gha perso el control politego, i xe rimasti on grupo influente a livel cultural e economico.

El colonialismo se pol far scominsiar co l’arivo de i todeschi a Zanzibar en tel 1885. I todeschi i gha creà on protetorato su tuti i teritori controlà da el sultan de Zanzibar, che el controlava anca la costa del Kenya. I inglexi i xe rivà en tel 1888 co la Compania Imperiale de l’Africa Orientale. I todeschi i gha lasà la costa kenyana a i inglexi en tel 1890. I inglexi i volea costruir na ferovia da Mombasa a Kampala, en Uganda. No ghera proeti de colonizar el Kenya. La colonizasion de el Kenya la xe diventà na realtà parché no se podea verghe la ferovia sensa el control de el teritorio. Par costruir la ferovia, i inglexi i gha portà i operai da l’India, altri indiani (tanti da quele regioni che le diventarà pi tardi el Pakistan) i seguia sta costrusion come comercianti. Quasi tuti i xe rimasti in Kenya anca dopo che gha finio de costruir la ferovia. Vari grupi locali i no volea la costrusion de la ferovia. En particolar, i nandi i gha combatù. I inglexi i gha dovesto metare i nandi en riserve par inpedir i atachi.

Za da i primi ani del XX secolo, inglexi, danesi, e sudafricani i xe entrà su i altipiani del Kenya par torse le tere e far fatorie o alevamenti de bestie. Nairobi la xe stà fondà en tel 1905. En tel 1930 ghe xera za 30 000 bianchi en Kenya.

En 1952, la principessa Elizabeta de Inghiltera la xera en visita a la colonia. Co la stava al parco de Aberdare, a l’albergo costruio su i albari Treetops, la gha sentio de la morte de so pare Giorgio V. La nova regina Elizabeta la xe subito tornada in Inghiltera.

Da l’otobre 1952 al dicembre 1958, el Kenya el gha visù i momenti pi bruti de la so storia. Se trata de el periodo de l’emergensa. I Mau Mau – on grupo de kikuyu ma anca de altre tribù che gavea fato on giuramento de sangue contro i colonialisti – i gha tegnù la polisia e l’esercito soto tension. I inglexi i gha mandà quasi tuti i kikuyu ne le riserve o en te i campi de concentramento. I gha ancà copà o causà la morte de miliari de inocenti, done e butini, ma anca veci e zente che no ghe centrava niente.

Dopo na serie de falimenti, i inglexi i gha caturà Warũhiũ Itote (15 genaro 1954), conosù da i Mau Mau come Generale Cina. El capo de i Mau Mau, Dedan Kimathi co gha savesto che i inglexi no gavea na foto sua de lu, el gha mandà na fotografia par aiutarli a ciaparlo. Kimathi el xe stà caturà el 21 otobre 1956. Da alora i Mau Mau i gha perso forsa e i gha dovesto rivar a la fine de le ostilità.


Indipendensa[canbia | canbia sorxente]

El presidente Mwai Kibaki

I inglexi i gha vinto contro i Mau Mau ma i gha perso la colonia. Durante l’emergensa, i capi politeghi i xe stà mesi in prison. Prima fra tuti, Jomo Kenyatta el xe riusì a farse la fama de capo de l’oposision, anca se ghe n’era altri e lu no l’era el capo de i Mau Mau. Co la fin de l’emergensa, i inglexi i xe stà costreti a contratar con lu par el pasagio de l’aministrasion a i neri. Kenyatta el gha fondà el partito Union Africana Nasional del Kenya (KANU) e co stà formasion el gha vinto le elesioni aministrative del 1957. El 12 dicembre 1963, el Kenya el xe diventà indipendente e Jomo Kenyatta el xera el primo presidente e capo de governo. Subito dopo l’indipendensa, el Kenya el gha dovesto combatar la guera contro i shifta, on grupo de guerilieri de origine somala. La guera la xe finia en tel 1967.

Kenyatta el xe morto en tel 1978 e el so vice presidente Daniel Toroitich arap Moi el gha tolto el so posto. En tel 1982 Moi el gha soferto on tentativo de colpo de stato. Dopo che l’esercito el xe riusì a caturar i oficiali de l’aviasion che gavea scominsià el colpo de stato. Moi el xe pasà da on governo quasi democratico a la ditatura. Anca dopo el pasagio al multipartitismo, Moi el xe stà bon de controlar la vita politega del paexe fin al 2002.

El tel 1991, 1993 e 1996 el paexe el xe stà scoso da guere tribali. I conflii i xera causà da i politici che sostegnea Moi e che volea dimostrar che no se podea far sensa de el vecio presidente. Almanco 100 000 persone le xe morte durante sti confliti.

En tel 2002, l’oposision la gha vinto le elesioni e el nove prsidente eleto el xe stà Emilio Mwai Kibaki, sostegnù da la Coalision Nasional de l’Arcobaleno (NARC). Soto el governo Kibaki, el Kenya el xe avanzà economicamente, co na cresita anuale del 5-7%. La crescita demografica la xe calada soto el 2%. Rimane el problema de la division de la richeza. El 2% de la popolasion el gha el 60% de la richeza del paexe, e el 60% el vive soto i liveli de povertà. El livel de la corusion de el governo el xe rimasto alto.