Storia de la Liberia

Da Wikipedia, l'ençiclopedia libara.
Va a: navigasion, serca
Mapa de la Liberia

La storia de la Liberia la xe unica en Africa. La Liberia moderna la xe nata co companie private le gha fondà teritori do mandar i sciavi libarà ne i Stati Unii de America. No bisogna desmentegarse che el teritorio de la Liberia el xera zà abità da popolasioni locali, che le xe stà speso mese da parte da i novi abitanti.

Liberia ne la pre-Storia[canbia | canbia sorxente]

Poco se sa de le popolasioni che le abitava la Liberia prima del XII secolo d.C. Verso el XII secolo, popolasioni mande dal Mali le xe entrà en tel teritorio che el diventarà la Liberia, spinzendo i grebo su la costa. Co la caduta del l’Inpero del Mali, l’etnia vai la xe entrà en te la Liberia e la gha ocupà la costa, do i kru i vivea. Na coalision de kru co i amnde la gha fermà i vai en te la region de la Montagna del Gran Capo.

Eoropei[canbia | canbia sorxente]

I kru i xe entrà en contato co i portoghexi en tel 1461. I gha subito scominsià a far marcà co lori. Olandexi (1602) e inglexi (1663) i gha costruio de i forti su la costa ma i le li gha lasà dopo poco tenpo.

Liberia moderna[canbia | canbia sorxente]

La ‘American Colonization Society’ (Società Americana de la Colonizasion) - fondà en te i Stati Unii de America en tel 1816 – la volea fondar na colonia americana en Africa. La Società la volea mandar en Africa i neri libari che vivea en te i Stati Unii, specailmente quei del sud. El pian el xera quelo de parar via neri libari (i neri i xera visti come on pexo par la società, on pericolo par i paroni de sciavi – visto che i neri libari i podea ispirar la ribelion a i sciavi - e on pericolo par i lavoratori bianchi parché ghe portavia via el laoro) e alo steso tenpo metar le baxi par na colonia americana en Africa. I membri de la Società Americana de la Colonizasion i xera sia bianchi che neri.[1]

En tel 1820, 88 neri emancipadi e 3 rapresentanti de la Società i xe partii par l’Africa. I gha catà on aprodo so l’ixola de Scherbro, Siera Leon. Dopo nianca on mese, la metà de la spedision la xe morta de febre giala.

En tel 1821 el Capitano Robert Stockton a capo de la nave de la marina americana Alligator, el gha ispesionà la costa de l’Africa Ocidentale fin che el gha crompà 55 km de costa da on capo locale en canbio de rum, fusili e perline. I sopravisuti de l’ixola de Scherbro i xe sta portà qi e i gha fondà na colonia so l’ixola de Providence, poco lontana da doe Monrovia la xe stà costruia. Dopo i atachi de la popolasion locale, i colonialisti i gha costruio on fortin (1824) e i gha ciamà el posto Liberia, co cavedal Monrovia en onor del presidente americano James Monroe. A lo steso tenpo, en America l’oposision contro la Società Americana de la Colonizasion la cresea. I neri i xera contrari parché el pian el xera razista. I bianchi i xera contrari parché la colonizasion la xera vista come negativa.

La colonia[canbia | canbia sorxente]

I neri americani in Liberia i gha costruio la colonia come na fotocopia de i vilagi en te le piantagioni de i stati del sud. I novi liberiani i gha senpre parlà inglexe, e i se sa tegnudi a distansa de i neri locali. Se le vera che ghe xe stà de i matrimoni co i locali, el xe anca vera che i liberinai de origine liberiana i gha caturà de i locali par farli sciavi lori. La vita la xera comunque dura par i liberiani de origine americana. De 4 571 persone emigrade en te i primi 23 ani, solo la metà la xe sopravisuda dopo i primi mexi da l’arivo en Africa.

Oltre che la Società Americana de la Colonizasion, altre società americane le gha volù mandar sciavi emancipadi o neri libari che i volea andar en Africa. Le società del Maryland, del Mississipi, de la Pennsylvania, de la Louisiana e de la sità de New York le gha fondà le colonie de Edina, de Port Cresson, de Maryland en Liberia, de Mississipi en Africa, de New Georgia e de Bassa Cove (questa costruia so le rovine de Port Cresson). Tute ste colonie le se sa proclamà indipendenti, le se sa unoi co la Liberia par stacarse ancora, fin che tute le se sa integrà co la Liberia par el 1857.

I coloni americani, soto presion par l’ostilità de le etnie locali, co el pericolo de esar tacà da i inglexi che i volea la colonia, e co el problema de divantar autosuficienti, i se sa proclamà na naxion indipendente en tel 1847. La Liberia la xe stà riconosuda dal Regno Unio en tal 1848, da la Fransa en tel 1852, e da Stati Unii solo chen tel 1862. I americo-liberiani i gha fondà el True Whig Party, unica formasion politea amesa e i gha controlà tuta la vita de la naxion. I americo-liberiani i no xe mai stà pi del 5% de la poolasion.

El primo presidente Joseph J. Roberts

El primo presidente da la nova naxion el xe stà Joseph Jenkins Roberts. Roberts el xera nà on nero libaro en Virginia. El gha pasà i so ani da presidente a tentar de far riconosar la Liberia da i paexi eoropei. Soto la so presidensa, la Liberia la gha ragiunto la so dimension atuale e el Liberia College, po diventà l’Università de la Liberia, el xe stà costruio a Monrovia. El secondo presidente, Stephen Benson, el gha continuà el laoro de Roberts e el gha risevù el riconosimento de Belgio (1858), Danimarca (1869), Italia (1862), Norvegia (1863), Svezia (1863), e Haiti (1864).

El secondo presidente Stephen Benson

Benson el xe stà el primo presidente a parlar le lengoe locali e a favorir un dialogo co i liberiani autoctoni. El so esempio no el xe stà seguido da tanti altri. Al contrario, problemi co i marcanti inglexi e olandexi i gha portà el governo a favorir na politega de ‘porte serade’. Tute le compravendite da e par l’estero le se podea far solo in sie porti, soto el streto control governativo. Le etnie locali le se sa ribelà e la mancansa de trafico de merci la gha favorì el deficit de le finanse. El governo el sa catà speso en an situasion economica grave, sfiorando la bancarota.

Strutura sociale[canbia | canbia sorxente]

Done liberiane en tel 1910.

La società liberiana la se sa presto organizà en strati. I pi importanti i xe sempre stà i americo-liberiani. Tuti i leader politeghi e finansiari i vegnea da sto grupo. I americo-liberiani i no gha mai volù darghe spasio a i locali. I liberiani nativi i no gavea libartà politega, i dovea laorar par i americo-liberiani, pagar le tase e speso i diventava sciavi de i americo-liberiani. I locali i xera tratà come sitadini de seconda clase. La pratica de la sciavitù la xe terminado solo che en tel 1931, co la Lega de le Naxioni la gha amonio la Liberia. I liberiani locali i gha votà la prima olta en tel 1951.

Bancarotta[canbia | canbia sorxente]

La Liberia no la xe mai stà bona de generar i schei par la so aministrasion. Pi de na olta el governo el sa catà en tel pericolo de la bancarota. A questo va zonto el problema de prestiti mal fati e de la politega destabilizatrise de el Regno Unio, che volea tor parte del teritorio Liberiano par zontarlo a la so colonia de la Siera Leon. En tel 1921, la Liberia la gha chiesto on prestito de 5 milioni de dolari a i Stati Unii. Dopo mexi de negosiasioni, el prestito el xe stà promeso, ma el parlamento lo gha mai aprovà, lasando la Liberia en seri problemi finansiari.

Goma[canbia | canbia sorxente]

En tel 1923, la conpania americana Firestone la gha fato de le ricerche en Liberia par vedar se se podea metar su na piantagion de goma. La Firestone la gha afità mezo milion de etari dal governo liberiano par 99 ani a Harbel, la pi grande piantagion del mondo. La goma la xe stà prodota dal 1934 e, co la creasion de 25 000 posti de laoro, la goma la xe subito diventà la pi importante risorsa economica del paexe. La Firestone la xe anca diventà on potente elemento politego e speso la se sa intromeso ne i afari de lo Stato, forte de la so posision de una vera fonte de redito del paexe. La Liberia la xera anca ciamà Firestone Republic.

L’inportansa de la goma la xe diventà evidente co la seconda guera mondiale. La piantagion de la Liberia la xera l’unica – dopo quela del Sri Lanka – a fornir goma a i aleati. La goma la xe importante par la costrusion de armi e material belico de altra natura.

Seconda Guera Mondiale[canbia | canbia sorxente]

A lo scopio de la seconda Guera Mondiale, la Liberia la selto de alearse co i americani. La Liberia la xera importante par i Aleati, sia par la produsion de goma che come base militare. I todeschi i gavea el control de le rote del Atlantego del Nord, e i americani i gavea bisogno de on ponto de apogio en te l’Africa Osidentale par far rivar soldai e materiale en Eoropa. A lo steso tempo, la presensa de americani sul teritorio e el comercio che i stimolava, la Liberia la gha vù, par la prima olta ne la so storia, el capital par scominsiar el svilupo del paexe. Prima de la guera no ghera infrastruture, e el contato tra americo-liberiani che i vivea so la costa e le comunità de l’interno i xera tegnudi a on minimo. El bisogno de manodopera, la costrusion de strade e altre infrastruture la gha roto sta division artificiale.

El presidente William Tubman el xe stà eleto en tel 1944 e el xe rimasto par 27 ani a la testa de la Liberia. Tubman el xe stà el primo presidente che gha veramente laora par l’integrasion de i do grupi sociali. Tubman el gha laorà par portar investimenti foresti in Liberia, ma el gha ancà manipolà la Costitusion par restar al potere.

Canbio de guardia[canbia | canbia sorxente]

Co la morte del presidente Tubman (1971), el vice presidente William R. Tolbert el xe diventà presidente. EL so primo laoro el xe stà quelo de far controlar i conti de le companie foreste. La Firestone, che la gavea sempre denuncià manco de quel che la fazea, la gha dovù pagar milioni de dolari de tase aretrate. Tolbert el gha anca tentà de verzar fora l’aministrasion publica a i liberiani locali, ma el gha catà la resistensa de la elite americo-liberiana. I privilegiati i vedea i canbiamenti come mas veloci, i liberiani i li vedea come masa lenti.

Tolbert el gha anca fato aprovar de le legi opresive contro l’oposision e i media. En tel april del 1979, co el gha tentà de tajar i susidi al rixo, la zente la sa reoltà contro de lu. El governo el dixea che l’aumento del costo el dovea servir par svilupar la coltivasion del rixo da parte de la popolasion locale, i opositori i faxea notare che la fameja Tolbert la gavea el monopolio del rixo, e che l’aumento del costo el saria ndà ne le so tasche. Tolbert el gha perso autorevoleza e le somose le gha roinà le poche infrastruture de Monrovia.

El 12 aprile 1980, el sergente Samuel K. Doe, de la pi picola etnia de la Liberia, i Krahn, el gha direto on colpo de Stato e copà Tolbert. Quasi tuti i ministri i xe stà fusiladi dopo pochi dì. La majoria de i laoradori governativi i xe scapà via. Finia così el predominio americo-liberiano dopo 133 ani de controlo del paexe.

Doe el gha subito promeso el ritorno a la democrasia par el 1984. Eo el gha fato aprovare na nova Costitusion che la permetea el multipartitismo e la popolasion la gha aprovada co on referendum en tel 1984. Doe el xera el capo de el Consilio de la Redension del Popolo. Lu e i altri i xera soldai de poca preparasion inteletuale, i no savea governar. Doe el gha scominsià a copare tuti quei che i se meteva contro de lu. En manco de do ani el gha perso tuto el sostegno popolare che el gavea.

El governo de Doe el xe rimasto in piè grasie a i juti militari e i schei de i Stati Unii. Ono de i colaboratori de Doe el xera Charles Taylor. Taylor el xe stà arestà el 24 magio 1984 en Sommerville, Massachusetts (USA) par verghe robà soldi del governo. Taylor el xe scampà en Libia do el gha fato on corso de guerilia. Doe el xe diventà brutale. En tel novenbre 1985, Thomas Quiwonkpa el gha provà a far on colpo de Stato. Dopo el falimento de Quiwonkpa, Doe el gha ordenà de vendicarse so i grupi gio e mano de la region Nimba, da do Quiwonkpa el vegnea. Tnta zente la xe scampà en Costa d’Avorio par salvarse.

Prima Guera Sivile[canbia | canbia sorxente]

Charles Taylor el gha proposto a i esiliati de preparse par combatar Doe. El 24 dicembre 1989, Taylor e on grupo del so Fronte Patriotico Naxional de la Liberia (NPFL) i xe entrà en Nimba par scominsiar la prima guera sivile de la Liberia. Miliari de gio e mano i se gha unio a Taylor. Dopo de i scontri sanguinosi, Taylor el gha asedià Monrovia en tel giunio 1990. Prince Johnson, che el xera nel governo Doe, el gha scominsià el so grupo de guerilieri contro el presidente. El 9 setembre, i guerilieri de Johnson i gha caturà Doe, i logha torturà e copà.

Johnson e Taylor i gha continuà a scontrarse par el control de la cavedal. Le trupe de i paexi de l’Africa Osidentale (ECOMOG) le gha tentà de fermar la guera, ma i no ghe riusidi.

Governo Provisorio[canbia | canbia sorxente]

En tel novenbre del 1990, i pi importanti grupi che combatea en Liberia i sa catà a Banjul, Ganbia par formar on governo de unità naxionale, co primo ministro Amos Sawyer. Taylor nol gha volu ndar a l’incontro. La guera la xe continuà e Sawyer el gha controlà solo che la cavedal. Altri incontri i gha portà a cesate el fuoco e vari acordi, tuti inutili. La guera sivila la gha continuà fin a l’agosto del 1995, co i vari grupi i gha smeso de sparar e i sa diviso la cavedal. En tel 1997, i liberiani i gha votà par el presidente e i parlamentari.

Taylot el gha vinto le elesioni e el xe diventà presidente. I liberiani i gha votà el pezo sior de la guera en te la speransa che la smetese de copar la zente. Taylor el gha continuà a tegnar el paexe en na situasion de insicuresa e el gha dato na man a destabilizar i paexi rente de la Liberia. Taylor el sa soinvolto specialmente en te la guera en Siara Leon, do el sostenea el RUF, el Fronte Unito Rivolusionario.

Seconda guera sivile[canbia | canbia sorxente]

En tel 1999 el Liberiani Unii par la Riconciliasion e la Democrasia (LURD) el gha atacà le postasioni de Taylor a partir da le baxi en Guinea. En tel giunio 2003 Taylor el controlava solo che on terso del paexe e el LURD el xera rente de la cavedal. En lulio, el LURD controlava on terso de la sità de Monrovia. El 1 agosto, Taylor el gha rinuncià a la presidensa e el xe scampà en Nigeria, co el giudice de la Sira Leon el gha emeso on mandato de catura internasional contro de lu par atrocità comese en guera.

Governo de tranzision[canbia | canbia sorxente]

Gyude Bryant

El 18 agosto 2003, tute le parti en guera le gha firmà i acordi de paxe. Gyude Briant el xe diventà capo del governo de tranzision. En el otobre 2005, la zente la gha votà per el novo governo. George Weah e Ellen Johnson-Sirleaf i gha pasà el primo turno e i se sa presentà par el voto finale el 8 novenbre. La Sirlea la gha vinto al secondo turno.

En tel marso 2006, Charles Taylor el gha provà a scampar da la Nigeria pa andar en Burkina Faso. El xe stà arestà a la frontiera e portà in Siera Leon, prima, e in Olanda (L'Aia), dopo, par ragioni de sicuresa. El xe acusà de atrocità contro l’umanità.

Note[canbia | canbia sorxente]

  1. Map of Liberia, West Africa. 1830. URL consultà el 2013-06-03.