Storia de la Mauritania

Da Wikipedia, l'ençiclopedia libara.
Va a: navigasion, serca
Mapa de la Mauritania

I primi abitanti serti de la Mauritania i xe stà i bafour, na popolasion sudanica che la vivea qi fin dal neolitico. I bafour i xe stà parà via da le migrasioni berbere tra el III e VII secolo de la nostra era. En tel 1076, i berberi i controlava tuto el teritorio a nord del fiume Senegal.

Lota per la dominasion[canbia | canbia sorxente]

Co la fin de la conquista berbera, la se sa verto na lota tra i novi paroni de la Mauritania e i arabi dorigine yemenita – i maqil – che i volea controlar tuto el Maghreb osidentale. La lota, prima culturale e politega e poi anca violenta, la xe terminà co la Guera de i Trentani (1644 – 1674). I arabi i gha vu la mejo e i gha influensà la stratificasion de la società. I guerieri arabi – hassane - i xe diventà el grupo pi inportante de la società mauritana. Lori i gavea el dirito de farse pagar le tase da le tribù pi deboli. I berberi i gha dovù sistemarse en te le caste secondarie, ma i gha tegnù la dominasion spirituale visto che i marabuti – santoni musulmani – i xera quasi tuti berberi. Le tribù berbere che no gavea la posibiltà de fornir guerieri o omeni de cultura, i xe diventà i znaga, la clase pi basa. I sciavi neri – caturà da le etnie a sud del fiume Senegal – i xe diventàa poco a poco i haratin, o mauritani neri. I haratin i xe ancò na etnia che vive servendo i mauritani bianchi considerà nobili. La società mauritana la xe senpre stà na società nomade, tribale e regolà da le lote interne. A lo steso tenpo, la cultura islamica e la produsion de opere scrite – famoxa la racolta de manoscriti de l’oasi de Cinquetti – la gha dato na strutura legale e non arbitrariamente ligà a le regole del pi forte.

Colonia[canbia | canbia sorxente]

L’arivo de i francexi a l’inisio del XX secolo el gha portà dei canbiamenti sociali forti. I francexi i gha proibio la sciavitù, che la xera parte de le regole sociali de la Mauritania. I gha ancà tentà de fermar l’influenza de i hassane, dandoge pi inportansa a i zawia e i znaga, che xera i grupi pi basi de la società. I francexi i gha meso fine a le lote tribali, che le ghe permetea a i hassane de controlar la vita tribale. I francexi i no ghe riusì a spacar el grovilio de contati tra diversi grupi e i gha dovesto senpre tentar aleanse tenporanee co i vari grupi. I mauritani i xe rimasti nomadi, favorendo la formasion de una elite de neri originari del Senegal.

Indipendensa[canbia | canbia sorxente]

El 28 novenbre 1960, la Mauritania la xe diventà indinpendente. La majoria de la popolasion la xera nomade e la cavedal Nouakchott la xera stà costruia en tuta freta rente al vilagio de Ksar. La majoria de i abitanti co residensa fisa i xera neri de origine senegalexe che i gavea preso en man l’aministrasion del potere. I altri mauritani i gha risposto a sta situasion forsando l’arabisazion del paexe. El primo presidente, Moktar Ould Daddah, el gha subito proclamà el mononpartitismo e el xe stà rieleto en tel 1966, 1971, 1976. Daddah el gha spinto par el rinovo economico e el se sa scontrà co la volontà popolar par el sfrutamento de le risorse naxionali, en man a i francexi. Par risolvar la question, el presidente el gha naxionalizà le companie minerarie en tel 1974.

Guera Sahariana[canbia | canbia sorxente]

En tel 1975, Daddah el gavea da frontegiar l’oposision en casa, e l’espansionismo marochin a l’estaro. La Mauritania la gha invaso el teritorio del Sahara Spagnolo, ancò Repubblica Araba Saharawi Democratica, e el gha anexo el sud del teritorio. I guerilieri del Fronte Polisario i gha scominsià na guera de liberasion contro i mauritani. Par tri ani, i saharawi i gha atacà le postasioni minerarie mauritane e persino bonbardà la cavedal. Daddah el gha mandà le trupe nere al fronte, ma queste le se sa ribelà parché i no volea conbatar na guera che i giudicava esar na guera araba. Daddah nol gha volù ritirarse e el gha preso decisioni senpre pi totalitarie.

El 10 lulio 1978, el colonel Mustafa Ould Salek el gha fato on colpo de Stato. El Polixario el gha proclamà on cesate el fogo. Ould Salek nol xe stà bon de mediare la situasione e el gha esasperà i neri del sud. A i inisi del 1979, Mohamed Khouna Ould Haidallah el gha fato n’altro colpo de Stato. Dopo na serie de atachi del Polixario, i mauritani i gha asetà de ritirarse da i teritori del Sahara Osidentale e riconosar el Fronte Polisario. El Maroco, che ocupava i teritori a nord, el gha reagì violentemente e el gha tentà de far on colpo de Stato a Nouakchott. I do paexi i gha roto le relasioni diplomatiche par qualche ano.

Haidallah el gha provà a canbiar le relasioni tra i vari grupi de la società mauritana. El gha proclamà la fine de la sciavitù, decision che la vien fata da ogni governo mauritano, e el gha provà a darghe pi spazi a la minoransa nera. De fato, el gha dovù canbiar continuamente le aleanse, ricopiando en tel governo le vecie struture de aleansa tribale che le gha senpre governà la mauritania, le stese struture che el volea canbiar.

Ould Taya[canbia | canbia sorxente]

El 12 dicenbre 1984, Maaouya Ould Sid'Ahmed Taya el gha deposto Haidallah e el se sa proclamà capo del governo. Dopo verghe promeso el ritorno a la democrasia, el se sa dismentegà de le promese. Taya nol xe stà bon de svilupar el dialogo co le minoranze. La tension la xe salià fin a la guera de confin co el Senegal del 1989. Da alora la tension la xe diminuida, ma la diferensa tra mauritani de origine araba e de origine nera la resta presente en te la società.

Soto la presion interna e internasionale, Taya el gha parmeso la aprovasione de na nova Costitusion che la gha previsto anca el multipartitismo en tel 1991. Taya el xe rimasto al potere ma el gha subì vari tentativi de colpi de Stato.

Democrasia[canbia | canbia sorxente]

El presidente de la Mauritania

El 3 agosto 2005, co el presidente Taya el xera en Arabia Saudita a i funerali del re Fahd, i militari i gha ocupà la cavedal. Dopo qualche ora de incerteze, i militari i gha fato saver a la naxion che i volea metar fine al governo de Taya. I militari i gha formà na giunta par prepar la strada verso la democrasia. El colonel Ely Ould Mohamed Vall, capo de i ribeli, el gha direto el governo a la scritura de na nova Costitusion, aprovà en tel giunio 2006. El 11 marso 2007, i mauritani i gha votà Sidi Ould Cheikh Abdallahi novo presidente del paexe.