Storia del Sudan

Da Wikipedia, l'ençiclopedia libara.
Va a: navigasion, serca

La Storia del Sudan la xe sempre stà influensà da i popoli vicini. Anca co el Sudan el gha avù el control politego e ecomico de l’Egito, la cultura egisiana el lo influensava. Ancò el Sudan el xe sempre tirà da corenti religiose, politeghe e finansiarie che vien da diresioni diverse.

Preistoria[canbia | canbia sorxente]

I primi omeni che i gha abità el Sudan i xe rivà qi en tel paleolitico. Ricatamenti archeoligici del neolitico i dimostra che la zente la vivea en vilagi fortificadi. I xera pescadori, caciatori, alevatori e i racoglieva granalie par vivar. En tel nord del Sudan – Nubia – la popolasion la xera culturalmente identica a quele de l’Alto Egito. I do popoli i gha svilupà el sistema faraonico a lo steso tempo za nel 3300 a.C.

Kush[canbia | canbia sorxente]

Piramidi de Meroe

I pi veci documenti sul Sudan i vien da l’Egito. I egisiani ciamava Kush el teritorio fin a la prima catarata del Nilo. Dopo la caduta del vecio regno, par do mila ani, i egisiani i gha controlà sta region a livel cultural (par esempio, ghe pi piramidi en Sudan che in Egito) e religioso. I egisiani i vendea gran a Kush e i comprava sciavi, oro, avorio, incenso e carneliana – na piera usada par far le ponte de le frece. I egisiani i gha costruio de i fortini longo tuto el Nilo par controlar el fluso de le merci.

En tel 1720 a.C. i hyksos i gha invaso l’Egito e taja i contati co Kush. Co l’emergere del nuovo regno (1570-1100 a.C.) el faraone Ahmose el gha invaso Kush e lo gha fato na provincia de l’Egito. El control de l’Egito el rivava fin a la zona dove ancò ghe Khartoum. Co la fin de el nuovo regno anca l’influensa egisiana la xe diminuida. No ghe xe documenti da el XII al IX secolo. En tel VIII secolo a.C. el regno de Kush, co cavedal a Napata, el xe stà bon de conquistar l’Egito del sud. El re Kashta el gha conquistà Tebe, so fiol Piankhy el gha esteso el control fin al delta del Nilo. Par pi de on secolo, i faraoni neri de la XXV dinastia i gha controlà l’Egito. La dinastia de Kush en Egito la xe terminà co l’invasion asira (688 a.C.), ma la xe continuà en Sudan, do la controlava la Nubia e i teritori a sud e a est de la cavedal.

Meroe[canbia | canbia sorxente]

I egisiani i gha provà a conquistar Kush en tel 590 a.C. I gha ataca la cavedal, Napata, e i xe stà boni de sachegiarla; ma i kushiti i xe stà boni de parar via i invasori. I kushiti i gha isteso spostà la cavedal a Meroe, rente de la sesta catarata del Nilo. Mentre el Egito el pasava a le dominasioni straniere (Persia, Grecia, Roma), el regno de Meroe el gha continuà a sviluparse par conto suo.

A Meroe se cata i resti de i sistemi de irigasion che permetea la coltivasion intensiva d ei tereni, costrusioni che dimostra l’abilità de i architeti e de i artisani, piramidi e steli. En tel I secolo a.C. se scominsia a catar iscrisioni en lengoa meroana. I re de Meroe i pasava el poder a i fradei o ale sorele. Co la morte de tuta na generasion, el poder el pasava ai fioi, secondo el merito e la linea matriarcale, no l’età. I contati co el Mediteraneo el gha parmeso a elementi elenici de rivar fin qi, così come el contato co l’Arabia el gha parmeso a elementi culturali arabi e hindu de entrar ne la cultura kushita. Da i ricatamenti archeologici el par che la cultura metalurgica de Meroe la sa difuso a ovest fin su la costa Atlantega del continente.

En tel II secolo d.C. i nobati i xe penetrà en tel nord de Kush e i gha fondà el loro regno. A sud, el regno de Meroe el gha perso teritorio par l’espansion del regno de Aksum. El re Ezana el gha distruto Meroe en tel 350 e el gha incorporà i teritori nel so regno.

Cristianesimo[canbia | canbia sorxente]

Nubia cristiana

Dopo on periodo de asestamento, tre regni i xe emersi en tel VI secolo: Nobazia, co cavedal a Faras en tel nord; Muqurra, co cavedal a Dunqulah (150 km a sud de la moderna sità omonima) en tel sentro; e Alwa, co cavedal a Sawba en tel sud. Tuti e tre sti regni i gavea contati co el mondo bizantino. I re de i tri regni i se sa convertio al cristianesimo monofisita (che crede en ona natura divina-umana de Gesù Cristo) verso el 540. El cristianesimo el gha verto la comunicasion co l’Egito e co el mondo Mediteraneo. La Cexa la gha spinto l’educasion e la gha verto scole tacà a le catedrali. De sto perioso, se cata documenti scriti in greco, copto, meroitico e arabo.

Co i arabi i gha conquistà l’Egito en tel 640, i regni cristiani i se sa catà tajà fora da el mondo cristiano. I arabi i no xe riusidi a conquistar i regni cristiani, ma i gha penetrà la Nubia co i marcanti.

Islam[canbia | canbia sorxente]

L’influensa de l’Islam sul nord Sudan la xe cresuda on poco a la olta. Tra la fin de el XI secolo e el XIV secolo, i regni cristiani i se sa disolti sensa atachi militari esterni e la zente la xe pasà a l’Islam. I contati co l’Egito i xe sempre stà de comercio e vari sultanati locali i controlaa la region. I marcanti arabi i controlava el marcà de i sciavi che dal sud del Sudan i vegnea portadi en Arabia e en Egito.

Sudan Moderno[canbia | canbia sorxente]

La storia moderna del Sudan la scominsia en tel 1820, co le trupe turche e egisiane del impero Otomano le gha conquistà el nord del paexe. Le trupe otoman le xe stà bone de rivar a sud de Khartoum, ma no le gha poduo pasar le paludi del Sudd. Anca el mondo cristiana el gha provà a penetrar ste regioni. I misionari catoleghi e protestanti i xe vegnù en Sudan e i gha costruio varie misioni longo el Nilo, so i monti Nuba e ne la cavedal Kartoum. Importante la xe la presensa de Daniele Comboni e de i so misionari, quasi tuti veneti. I misionari comboniani i gavarà na grande importansa ne lo svilupo de le scole, de i ospedai e de l’evangelizazion de tuto el Sudan. Le forse eoropee le xe intervegnù en Sudan par fermar la trata de i sciavi. La società arabo-sudanese la gha perso la principal fonte de sostentamento e la zente la xera pronta a ribelarse a l’intromision straniera. El primo periodo de la storia moderna del Sudan el xe terminà co la rivolusion del Mahdi.

La Mahdia[canbia | canbia sorxente]

En tel 1881, Muhammad ibn Abdalla, on eremita islamico, el se sa proclamà el Mahdi, el mesia promeso da Maometo. El Mhdi el gha ciamà tuti i musulmani del Sudan a la rivolta. La zente, stufa de la cativa aministrasion de i egisiani, la gha risposto formando subito on esercito ben de tegnar testa a le trupe governative. La cavedal la xe stà conquistà el 26 gianaro 1885, el governator del Sudan, el inglexe general magiore George Gordon, elxe stà decapità e tanti de i 50 000 abitanti de la sità i xe stà masacrà da i ansar, i guerieri del Mahdi.

El Mahdi el xe morto en tel 1885 e Khalifa Abdullah el gha tolto el so posto. I inglexi i gha mandà na forsa de invasion al comando de Horatio Kitchener, che el sarà ricordà come el macelaro del Sudan par le atrocità comese qi e in Sudafrica durante le guere boere. EL Sudan el xe presto tornà soto l’influensa inglexe in condominio co i egisiani.

La colonia[canbia | canbia sorxente]

Anca se oficialmente ghera on condiminio anglo-egisian en tel Sudan, i egisiani no gha mai contà masa. Dop verghe risolto de le beghe de frontiera co i belgi (enclave de Lado) e i francexi (area de Fashoda), i inglexi i controlava tuto el Sudan che el xera aministrà come do colonie separate (nord e sud). Co le Close Districts Ordinances (Regole de i Distreti Separati) del 1920, i inglexi i gha imposto l’uso de el pasaporto par pasar da na zona a l’altra e de parmesi speciali par el comercio. Anca i misionari i sa visto costreti a laorar in aree decise da la colonia, che no permetea a i cotoleghi de laorar ne le aree de i protestanti. Al nord se usaba l’inglexe e l’arabo, al sud inglexe, denka, bari, nuer, lotuku, shilluk, zande e lafon. I inglexi no gha laorà mas par lo svilupo del sud, ma i gha iutà el nord.

En tel 1946, i inglexi i gha cambià vision par el Sudan. Se prima i pensava de metar el sud co l’Africa Orientale, adeso i gha volù tacar el sud al nord Sudan. A la conferensa de Juba del 1947, le autorità del sud le sa visto cambiar tute le regole de governo. I sudisti i xe stà traditi da i inglexi. El governo el xera a Khartoum e funsionava en arabo, mentre che lori i savea l’inglexe. Co i inglexi i gha lasà i ufici governativi, de 800 posti solo 4 i xe andà a zente del sud.. I inglexi i gha unificà el Sudan metendolo en te le mane de i nordisti, visti da i sudisti come musulmani, arabi e nemici del sud.

Guera sivile[canbia | canbia sorxente]

En tel 1956 el Sudan el xe diventà indipendente co la promesa de formar na federasion. I arabi del nord, parò, i no gha mantegnù l apromesa. I soldai del sud i sa ribelà e ha scominsià la guera sivile che la xe durà 17 ani. Al nord, el governo el xe cascà en man a na serie de politici che i pensaa pi a manovre de partito che al ben del paexe. En tel 1958, el generale Ibrahim Abboud el gha organizà on colpo de Stato e gha tolto el poter sensa violensa. Ma anca el so governo no el xe stà bon de afrontar i problemi del paexe e, en tel 1964, el gha dovù rinunsiar. Fin al 1969 el Sudan gha visto na serie de governi, tuti mia boni de aprovar la Costitusion del paexe o de afrontar i problemi co el sud. El 25 magio 1969, el colonel Gaafar Nimeiry el gha fato on colpo de Stato e tolto el poter. En tel 1972, el governo el gha firmà l’acordo de Addis Abeba co le milisie del sud e la guera sivile la sa fermà, anca se le brase de la rivolta le xera ancora vive soto l’aparensa de la paxe.

Islamizasion[canbia | canbia sorxente]

Nimeiry el gha soferto do colpi de Stato. Ono nel 1971 chel xe durà sete di, e n’altron tel 1976 preparà da i ansar, i seguaci del Mahdi. En tel 1983, Nimeiry el gha aprovà la sharia, el corpo de legi islamiche che faxea del Sudan on paexe solamente islamico. La guera sivile la xe scominsià na seconda olta. En tel 1985 on colpo de Stato el xe stà organizà da el general Abd ar Rahman Siwar adh Dhahab e Nimeiry el gha dovù scapar en Egito.

En tel giunio 1986, Sadiq el Mahdi, neodo de el Mahdi e capo de i ansar, el gha formà on governo de coalision co el programa de islamizar el Sudan. En tel 1989, el militare Omar el Bashir – conosù par la so vita poco aderente al Corano – el se sa convertio e el gha organizà on colpo de Stato che la meso al poter. Bashir el gha continuà la guera col sud e el gha scominsià anca a combatar co altri grupi etnici marginali al nord. Dopo na longa serie de tratati de paxe, el acordo el xe stà firmà a Nairobi (Kenya) el 9 genaro 2005. El tratato prevede che el sud el sia autonomo par sie ani; che dopo sie ani ghe sia on referendum par vedar se el sud el vol star co el nord o se vol far la secesion par formar on novo Stato; che la sharia la rimane valida al nord, ma che el sud el pol farghene a meno; che i schei del petrolio – che el xe tuto al sud – i sarà divixi tra nord e sud.

Efeti de la guera[canbia | canbia sorxente]

Durante i ani de la guera, 4 milioni de sudanexi i xe scapà da le loro case par trasformarse en rifugiati interni o rifugiati internasionali en Uganda, Kenya, Ethiopia e Egito. Pi de on milion de sudanexi el xe morto par colpa de la guera. I sudisti che i xe scapà en tel nord i xe stà tratà da sitadini de secondo grado e i vive en baracopoli rente de la cavedal. I no gha diriti sivili e i no pol laorar a la pari co i altri sudanexi. Co John Garang – capo de la guerilia sudanexe – el xe morto en on incidente aereo, i sud sudanexi che i vivea a Khartoum i gha atacà la sità e meso en pericolo la tregua. El sucesor de Garang, Salva Kir, el gha tolto el so posto. Salva Kir el xe el presidene del sud e vice presidente del paexe. El sud el stà provando a vegnar fora da deceni de distrusion ma la coruzion e la mancansa de competensa de i leader no lasa ben sperar.

Darfur[canbia | canbia sorxente]

Mapa del Darfur

El governo de Bashir el gha acetà la tregua co el sud parché el no podea vinsar la guera e mantegnar el esercito el costava masa. Bashir el gha continuà la so lota contro i grupi marginali al nord. Da el 2003, el confito en tel Darfur el xe rivà al sentro de l’atension internasionale. El Darfur le xe grando come la Francia, i abitanti i xe grupi etnici musulmani ma neri. Soto la sabia del Darfur se cata petrolio e altre risorse importanti. El governo el sostien na campagna de genocidio contro i darfuriani par poder usar la region come i vol lori. El governo el ghe da le armi e el sostegno logistico a i janjaweed, grupi de guerilieri de origine araba. L’Union Africana la gha mandà de i oservatori par controlar la situasion, ma el genocidio el continua. A lo steso tempo, el governo del Ciad el gha dichiarà la guera co el Sudan el 23 dicembre 2005 in risposta a atachi de guerilieri che se nascondea en Sudan. No se de dismentegar che tuti i governi del Ciad i xe rivà al poter co de le asioni militari a partir da el Sudan.