Storia del Ghana

Da Wikipedia, l'ençiclopedia libara.
Va a: navigasion, serca
Mapa del Ghana
El castel de i sciavi

El teritorio che ancò ciamemo Ghana el gha na storia longa, ma no sempre se pol distinguar realtà da mito. No ghe xe documenti serti prima de l’arivo de i eoropei, e se gha da fidarse solo de la tradision orale. Inoltre, no se gha da sbaiarse co el Regno del Ghana, che el se catava pi a nord, en te la region a caval tra Mauritania e Mali. El regno pi importante che el gha interesà el Ghana de ancò el xe sta quelo de i ashanti.

I ashanti[canbia | canbia sorxente]

Mapa de el regno ashanti (linea rosa)

I ashanti i xe el grupo etnico numericamente pi importante del Ghana. En nel pasà i xera na naxion militare ben organisà. I ashanti i xe rivà en te la region che i ocupa ancò en tel 1200 d.C. sirca. Questo el xe el tempo co tanti popoli de l’Africa Ocidentale i gha imigrà a sud, forse a causa de guere en tel nord. I ashanti e altri grupi de la fameja akan i se sa stabilio su le coline del Ghana sentrale e i gha formà vari regni. Le miniere de oro le gha parmeso lo svilupo de la trata comerciale co i regni del Ghana e del Mali. Verso el 1600, el re del clan Oyoko el gha scominsià a unificar i vari regni en te una confederasion. I re locali i mantegnea el so poter, ma l’union de i vari clan la ghe dava forsa par metarse en oposision al regno Denkyira che gavea controlà la region fin alora. Verso el 1670, el re Osei Tutu el xe stà bon de atacar el regno Denkyira e sotometerlo. El mito del sentarin de oro el xe de sto tempo. Durante na riunion e capi ashanti, el prete Okomfo Anokye el gha domandà on segno dal cielo. On sentarin de oro el xe vegnù zo e el se sa posà su i genosi de el re Osei Tutu. Okomfo Anokye el gha subito capio che quelo el xera on segno de benedision par l’union de i ashanti e par el novo capo Osei Tutu. El novo regno el gavea la so cavedal a Kumasi.

Eoropei[canbia | canbia sorxente]

Mapa del 1896 de la colonia inglexe de la Costa de l’Oro

I portoghexi i xe stà i primi eoropei a visitar la region entel 1470. En tel 1482 i portoghexi i gha costruio el famoxo castel de Elmina par farghene on marcà stabile so la costa. Olandexi, inglexi, svedexi e todeschi i gha seguio l’esempio de i portoghexi e i gha costruio fortini o altre struture longo la costa. I inglexi i gha seguio na politega de protesion de i regni locali. I ashanti i gha provà a oporse co na serie de guere contro le etnie de la costa. En tel 1821, i inglexi i gha asentrà el control de i vilagi mercantili ne le mane del governo de Londra. I gha anca firmà de i tratati co le etnie de la costa e meso le baxi de la nova colonia de la Costa de l’Oro, come la region la xera ciamada. Dopo varie guere contro i ashanti (1826-1902) I inglexi i xe riusidi a verghe el sopravento. En tel 1922, la Lega de le Naxioni la gha dato el Togo todesco a i inglexi par aministrarlo. En tel 1957 le Naxioni Unie la gha deciso che la colonia del Togo la fuse tacà a quela del la Costa de l’Oro. Kwame Mkrumah, fondator del Partito de la Convension del Popolo, el gha domandà l’indipendensa en tel 1954 e en tel 1956. El Ghana el xe rivà a l’indipendensa el 6 marso 1957. I quatro teritori de Costa de l’Oro, Ashanti, Protetorato del Setentrione e el Togo Britanico i vegnea unii en tel novo paexe del Ghana.

Novo ordinamento[canbia | canbia sorxente]

L'arco de l'indipendensa d Accra

Nkrumah el xe stà eleto Primo Ministro del Ghana, ma el so oprato el xe stà critica da varie forse politeghe. Nkrumah el gha fato pasar la lege Prevensione Detentiva (1958) che el ghe permetea de metar en prison i opositori sensa proceso. En tel 1960, el gha volù cambiar l’ordinamento faxendo del Ghana na republica. En tel 1963 el Ghana el xe stà tra i promotori de l’Organizasion de l’Unità Africana. Ent el 1964, dopo on rferendum popolare, el paexe el xe diventà ono Stato monopartitico e Nkrumah eleto presidente a vita. El 24 febraro 1966. i militari i gha fato on colpo de Stato co Nkrumah el xera a l’estero. I leader militari i gha tegnù el governo fin al 1969. A le elesioni popolari del otobre 1969, el Partito del Progreso de Kofi Busia el gha vinto la majoria de i segi e el gha formà el governo. Busia el xera el Primo Ministro. El governo de Busia nol xe stà bon de controlare la perdita de valore de l’economia e, el 13 gianaro 1972, i militari i gha fato n’altro colpo de Stato. El colonel Ignatius Kutu Acheampong el gha formà el Consilio Naxionale de Redension. Acheampomg el xe stà meso da parte en tel 1978 parchè el no xe stà bon de riformar el governo. El general Frederick William Kwasi Akuffo el gha tolto el so posto. Akuffo el gha scominsià subito a pianificar el ritorno al governo sivile ma la crisi sempre pi grave e la corusion le gha spinto on grupo de zoini soldà a far n’altro colpo de Stato el 4 giunio 1979. El capo el xera Jerry John Rawlings.

L’era de Rawlings[canbia | canbia sorxente]

Rawlings el gha fato aprovar la costitusion, preparà le elesioni parlamentari e presidensiali e restituio a i sivili el poter el 24 setembre 1979. El novo presidente, Hilla Limann, el xera ono de i seguaci de Nkrumah. El novo governo el gha rispetà i diriti umani e laorà par metar en pratica la nova costittusion. Parò nol xe stà bon de jutare l’economia e la distansa tra richi e poareti la xe diventà sempre pi granda. El 31 dicembre 1981, Rawlings el gha fato n’altro colpo de Stato. Rawlings el gha costituio el Consilio Provisorio de Difesa Naxionale che volea combatar la corusion e l’evasion fiscale. I citadini i podea participar a comitati locali che prendea decisioni sul teritorio. A la fin del 1982, Rawlings el gha scominsià el programa de desentralizasion politega. Regioni, distreti e comunità locali le gha ricevù poteri pi forti lasando al governo el compito de coordinar el movimento politego e de interesarse de la politega estera e de l’economia generale. En tel 1984, la Comision Naxionale de la Democrasia la gha studià el modo de rendar pi democratico el proceso decisionale. Co le elesioni politighe e aministrative del 1994 (novembre e dicembre) se marca el ritorno a la democrasia. Rawlings el xe stà eleto presidente en tel 1996.

Cambio de guardia[canbia | canbia sorxente]

El presidente John Kufuor

En tel 2000, le elesioni prsidenziali le gha meso John Agyekum Kufuor del Novo Partio Patriotico sul segio presidenziale. Kofuor el gha mantegnù le promese eletorali de rispetar i diriti umani. Kufuor el gha laorà sopratuto par ridur el debito publico e quelo esterno. El Ghana el xe ono de i paexi col pi alto debito foresto, ma anca ono d ei paexi pi richi, co grandi potensialità economiche e vaste risorse naturali. Kufuor el xe stà rieleto en tel 2004.