Storia de Mauritius

Da Wikipedia, l'ençiclopedia libara.
Va a: navigasion, serca
Mapa de Mauritius

La storia de le Mauritius la scominsia co l’arivo de i portoghexi en tel 1507. I storici de le migrasioni axiatiche i pensa che popolasioni malexi le xe pasé de qi nel V secolo d.C., ma no ghe prove. Se pensa anca che i marcanti arabi e persiani i conosese ste ixole, ma no ghe documenti scriti o ricatamenti archeologici par provarlo. Na carta del 1502 del cartografo italian Alberto Cantino riporta tre ixole en te la zona de le Mascarene, ma no ghe prove che el savese la posision de le Mauritius. El xe probabile che Cantino el gabia disegnà la posision de le ixole basandoxe so la notasion araba che parlava de le ixole Waqwaq – on termine generico par riferirse a tute le ixole de l’Oseano Indiano.

Portoghexi[canbia | canbia sorxente]

I portoghexi i gha trovà le ixole de Riunion, Mauritius e Rodrigues par caso durante na spedision en tel Golfo del Bengala soto la guida de Tristão da Cunha. Le navi de la spedision le gha catà on ciclon e le gha dovù canbiar rota. Le xe finie rente de la Riunione el 9 febraio 1507 e i la gha ciamà Santa Apolonia. Dopo pochi dì i xe rivà su l’ixola de Mauritius che lori i gha ciamà Cirne, dal nome de la nave del capitan Diogo Fernandes Pereira che par primo el gha visto l’ixola. L’ixola de Rodrigues la xe stà ciamà Diogo Fernandes. El nome de Mascarene vien da Dom Pedro de Mascarenhas che el gha visità le ixole en tel 1513. I portoghexi no gha dato importansa a le ixole parché lori i gavea za i porti longo la costa africana e le basi de Goa, de Malabar e Ceylon (ancò Sri Lanka). Le ixole Mascarene no le xera inportanti par i loro comerci. Anca parché vegnar fora da le baie de Mauritius – senpre co venti contrari – nol xera fasile.

Olandexi[canbia | canbia sorxente]

Mapa olandexe de Mauritius

En tel setembre 1598, sinque navi olandexi capitanate da l’amiralio Wybrandt Van Warwyck le se sa stacà da on corpo de spedision de oto navi par colpa de on ciclone e le xe rivà el 17 a l’ixola de Mauritius. I gha dato el nome de ‘Prinsipe Maurits van Nassaueiland’ en onor de el regente de Olanda. De sto nome solo Maurits (Mauritius en latino) el xe rimasto fin ancò. I olandexi i gha scominsià a usar l’ixola come na base durante i so viagi verso el sud-est axiatico.

Dal 1638 al 1710 i olandexi i gavea na colonia so l’ixola rente de Port Luis. La coloni la dovea svilupar l’ixola. Co el laoro de on centinaro de sciavi, i olandexi i racogliea la scorsa de ebano e pi tardi tajando ebano e altri albari de la foresta. Cicloni, epidemie e altre traversie le gha inpedio lo svilupo de la colonia. Alcuni goevrnatori i gha provà a svilupar el potentiale agricolo inportando la cana da sucaro, ma tuti i tentativi i xe falidi. I colonisatori i xe anca riusidi a copar tuti i dodo, on osel che no volaa e che no podea scampar da i fusili de i eoropei, e le tartarughe giganti che vivea su l’ixola. I olandexi i gha abandonà l’ixola en tel 1710.

Francexi[canbia | canbia sorxente]

Mapa francexe del 1791 co ‘l’ixola de Fransa’

I francexi i gha ocupà l’ixola en tel 1715 e i la gha ciamà Ixola de Fransa. La colonia la xe scominsiada sole chen tel 1721. I francexi i gha costruio la sità de Port Louis, cantieri navali e svilupà lo sfrutamento agricolo. Da l’ixola i francexi i ghe fazea partir le spedisioni contro le navi inglexi che le navigava en tel Oseano Indiano. I inglexi i gha risposto en tel 1810 ocupando l’ixola. Co el tratato de Parigi, l’ixola la pasava soto el control inglexe e tornava al vecio nome de Mauritius.

Inglexi[canbia | canbia sorxente]

I inglexi i gha abolio la sciavitù e portà su l’ixola laoratori da l’India par tor el posto de i sciavi, de origine africana. La composision demografica de l’ixola la xe canbià. Da alora, la majoria de la popolasion la xe de origine indiana, co la minoransa de origine francexe che controla le piantagioni de cana da sucaro. Dopo la seconda guera mondiale, el Regno Unio el gha fato sapere a i mauritiani che i dovea prepararse a l’autogoverno verso l’indipendensa. La indipendensa la xe rivà el 12 marso 1968 e Sir Seewoosagur Ramgoolam, leader de on partito socialista, el xe stà eleto primo ministro.

Mauritius moderno[canbia | canbia sorxente]

Da l’indipendensa, i vari governi i se sa alternà co el sostegno na olta de i indiani, l’altra de i franco-maurisiani. Le Mauritius le xe diventà na republica en tel 1990 co Paul Berenger presidente. Ancò el governo de Mauritius el serca de guidare el paexe verso el svilupo alternativo. La cana da sucaro la rimane inportante, ma el setore tesile e bancario i sta diventando senpre pi importanti. Da qualche ano, le fabriche de Mauritius le produse anca conponenti par conputer. El setor turistico el vien agevolà da la stabilità politega.