Storia del Madagascar

Da Wikipedia, l'ençiclopedia libara.
Mapa del Madagascar

La Storia del Madagascar, in tel senso de na storia basada so documenti, la scominsia co l’arivo de i primi arabi in tel VII secolo de la nostra era. L’ìzoła la xera za abità da zente vegnù da la Polinesia e da l’Africa. De ste prime migrasion ghemo notisia solo co la leteratura orale, che la riporta fati storici e la mitologia malgasia.

Preistoria[canbia | canbia el còdaxe]

Verso el VI secolo a.C., le popolasion de la macro region ciamada austranesia le se sa espanso par rivar a popolar la polinesia e el sud est axiatico. Seguendo le corenti equatoriali, grupi de sti popoli i xe rivà so le ìzołe de l’Oceano Indiano. Verso el II secolo d.C. i xe rivà anca so l’ìzoła de Madagascar. Le migrasion le xe continuà fin al V secolo.

Pi o meno a lo steso tenpo, popolasion bantu de l’Africa Orientale le xe rivà so l’ìzoła inte la parte osidentale. I do grupi i sa miscià presto, visto che a l’arivo de i primi eoropei in tel XVI secolo no ghera diferense visìbiłi tra la popolasion malgasia. La cultura malgasia la presenta ancò sia trati axiàteghi che africani. La mitologia la parla de i vazimba, on popolo nano de bianchi che i abitava el Madagascar prima de tuti. I vazimba i saria oncora so l’ìzoła, ma i vive sconti inte la foresta. La venerasion de i avi la xe ona de le carateristiche de la cultura malgaia, e i vazimba i xe considerà i avi pi ancestrali.

Arabi[canbia | canbia el còdaxe]

Marcanti arabi i ga probabilmente conosù le coste del Madagascar par secoli. En te la leteratura arabo-persiana se cata tanti nomi par on ìzoła a est de l’Africa: Phebol, Cernea, Menuthias, Medruthis, Sherbezat, Camarcada, e l’Isola de la Luna. Anca se no se pol esar sicuri, ono o pi de sti nomi dovaria riferirse al Madagascar. La prima vera imigrasion de arabi in Madagascar la xe stà verso el 635 d.C. Co la morte de Maometo (632), i arabi i ga fato le guere de sucesion. I grupi pardenti i xe scampà e i sa moso verso l’Africa. Alcuni de questi i xe rivà in Madgascar. Qi i ga costruio de i vilagi e i se sa miscià co la popolasion locale par darghe vita a le etnie zafiraminia, antemoro e antanosi. Co l’arivo de arabi shirazi de cultura swahili (XII secolo), anca l’Islam el xe rivà so le coste nord de l’ìzoła. L’influso arabo, picinin ne i numari, el xe stà grando inte la cultura. Tuti i nomi che riguarda el tenpo – mesi, stasoni, dì de la setimana – i schei e la medesina vien da l’arabo. Anca la pràtega de la circoncision, la strutura de la società (da matriarcale a clanica) e la pràtega de la divinasion le xe stà introdote da i arabi.

Eoropei[canbia | canbia el còdaxe]

En tel XV secolo, i eoropei i ga volù verzar linee de comercio co le Indie par metar da parte la mediasion del mondo arabo. I portoghexi i ga scominzià a esplorar le coste de l’Africa par catar on pasagio a sud. El caitan Diogo Dias el xe stà el primo eoropeo a metar pié su le coste del Madagascar in tel 1500 co la so nave la xe stà mesa fora rota da i venti in tel canal del Mozanbico. I portoghexi i no xera interesadi costruir n’avanposto in Madagascar. Francexi e inglexi, invese, i ga tentà de verghe on ponto de atraco so le coste de l’ìzoła. Guere co le popolasion locali, malatie e on clima difisile i ga senpre meso fin a tuti i tentativi. El xe stà solo che a la fin del XVII secolo che i francexi i xe stà boni de costruir de i forti permanenti so la costa orientale.

Tra el 1680 e el 1725, le coste malgasie le xe stà soto el controlo de i pirati inglexi. I pirati i atacava le navi che fazea la trata da e par le Indie, ma anca le navi locali che fazea marcà tra i porti de l’Oceano Indiano. I pirati i recrutava i naufraghi eoropei che i xera rivà so le coste malgasie, ma anca i marinai indiani de le navi che i caturava. La presensa eoropea la ga introdoto le guere par caturar i s-ciavi da vendare a i marcanti olandexi, inglexi e francexi. I cai che no volea far la guera i vendea i so suditi in canbio de fusili e munisioni.

El regno Merina[canbia | canbia el còdaxe]

Co le etnie de la costa le vegnea in contato co el mondo arabo e eoropeo, le etnie de l’interno le ghe dava vita a la monarchia. En tel XIX secolo, soto la dinastia Merina, i re Andrianampoinimerina (sirca 1745 – 1810) e so fiol Radama (1792 – 1828) i xe stà boni de conquistar quasi tuta l’ìzoła. La conquista la xe stà fata sora-de-tuto xugando so l’union de i diversi cai locali, co matrimoni tra i principi. Andrianampoinimerina el ga stabilì la cavedal a Antananarivo e da la el ga riorganizà le legi agricole, sora-de-tuto quele che riguardava la coltivasion del riso. El re el ga ordinà la costrusion de dighe, canali e l’uso de on novo tipo de zapa par coltivar mejo le risare. El ga anca riorganizà el esercito e, se no riusia a conquistar na zona co le bone, Andrianampoinimerina el atacaa co la forsa. A la so morte Andrianampoinimerina el xera pronto a conquistar la costa.

Radama I[canbia | canbia el còdaxe]

El re Radama I

El fiol de Andrianampoinimerina, Radama I o Radama el Grande, el ga continuà el laoro de so pare. I inglexi i ga subito reconosù el re. I ga fato così par mandar on segnal a i francexi che el Madagascar el dovea star fora da i interesi coloniali de le potense eoropee, e che lori – i inglexi – i xera diventà i novi paroni del destin de l’Africa. Radama I el ga firmà de i tratati co i inglexi par far smetar la trata de i s-ciavi e permetar l’arivo de misionari anglicani in Madagascar. Radama el ga conquistà tuta l’ìzoła e el xe morto in batalia durante na spedision punitiva contro i betsimisaraka.

Le regine[canbia | canbia el còdaxe]

Co la morte de Radama I, el Madagascar el xe entrà in on periodo de violensa, dominà dal regno de regine, no sempre bone de esar vere guide del popolo.

Ranavalona la Crudele[canbia | canbia el còdaxe]

La vedova de Radama I, ciamà la Crudele, la xe salia al trono parché – a la morte de so marì – la ga fato copar tuti i disententi maschi e altri parenti. Par 33 ani, dal 1828 al 1861, la regina la ga governà usando la violensa e la paura come armi de controlo de la zente. Ranavalona la ga opreso i cristiani e se calcola che 150 000 cristiani ixe stà copà durante el so regno. El Madagascar el se sa anca ixolà dal comercio internasionale e i foresti i ga dovù de frecuente scampar via, o i xe stà espulsi.

El fiol de la regina, Radama II, el xera catolego e, co na letara a Napoleone III, el ga invità i francexi a invader l’ìzoła in tel 1854. El 28 giunio 1854 el ga firmà on contrato co Joseph Francois Lambert do ghe dava a Lambert el dirito de sfrutar quasi tute le materie prime del Madagascar in canbio de on 10% su i profiti. Ranavalona la ga scoperto i intrighi del fiol e espulso tuti i francexi dal Madagascar. La regina la xe morta ent el 1861. El fiol Radama II el ga tentà alora de canbiar la politega del paexe. Le nove dcisoini liberali le andava contro i interesi de la nobiltà. El primo ministro Rainivoninahitriniony e so fradel Rainilaiarivory i ga copà el re, sposà la vedova e le seguenti regine, e governà el paexe da drio le quinte.

Rasoaherina (1863 – 1868)[canbia | canbia el còdaxe]

El dì dopo la morte de Radama II, i prinsipi de la casa Merina i ga incontrà la vedova del re. I ga dito che ela la podea esar regina solo se la azetava de difendar la libartà de religon, de canbiar le legi giudisiarie e smetar la opresion de la cexa. La nova regina la ga subito verto i confini e mandà ambasadori a Londra, Parigi e Washington.

Ranavalona II (1868 – 1883) e Ranavalona III (1883 – 1897)[canbia | canbia el còdaxe]

Ranavalona II la xe diventà anglicana in tel 1869 e la ga dichiarà la fede anglicana la religion de Stato. Ranavalona II la ga fato brusar tuti i amuleti e statue de fetici. La regina la ga jutà i inglexi a influir s la cultura e le struture malgasie. Ranavalona III la xe stà na regina sotomesa a i intrighi de palazo e la ga scanselà i diriti del marcante francexe Lambert.

Fin de la monarchia[canbia | canbia el còdaxe]

Soldadi francexi che sbarca a Mahajanga in tel 1895.

I francexi, che no volea perdar i diriti comerciali de Lambert, i ga invaso el Madagascar in tel 1883. A la fin de la guera, el Madagascar el ga dato l’ìzoła de Antsiranana a la Fransa e la pagà na multa de 560 000 franchi d’oro a i disendenti de Lambert. El primo ministro Rainilaiarivory el xe riusì a metar Fransa e Inghiltera ona contro l’altra, ma ala fin, el so intrigo el se sa reoltà contro de lù. A la Conferensa de Berlin, l’Inghiltera la ga lasà el Madagascar a la Fransa. En tel 1895, i francexi i xe sbarcà a Mahajanga e atacà Antananarivo. El ano dopo, el parlamento francexe el ga anexo el Madagascar e meso fin a la monarchia Merina.

Colonia[canbia | canbia el còdaxe]

Poster de la guera fancexe in Madagascar.

I francexi i ga inciso profondamente inte la cultura e società malgase. Soldadi malgasi i ga combatù par i francexi durante la seconda guera mondiale. I inglexi i ga ocupà el Madagascar in tel 1942 par evitar na invasio giaponexe. El Madagascar el xe tornà a la Fransa libara in tel 1943. En tel 1947, i malgasi i sa reoltà e i ga domandà la indipendensa. El governo francexe el ga risposto co la violensa, causando la morte de 90 000 malgasi. L’indipendensa la xe rivà el 26 giunio 1960 e el primo presidente el xe stà Philibert Tsiranana.

Verso la democrasia[canbia | canbia el còdaxe]

El presidente Tsiranana el ga continuà la politegha francexe fin al 1972. Soto la presion popolare, Tsiranana el ga dovù lasar el poter al generale Gabriel Ramanantsoa, che el ga spostà el paexe a sinistra. Co la fin del governo provisorio, in tel 1975, na serie de colpi de Stato la ga portà al potere vari militari. El 15 giunio 1975, el comandante Didier Ratsiraka el ga fato on colpo de Stato e tolto el potere. Ratsiraka el ga governà mal e portà el paexe al declinio econòmego.

En tel 1992, durante la primavera democràtega africana, anca el Madagascar el ga visto la nasita de movimenti de oposision. Ratsiraka el ga dovù consedar el multipartitismo. En tel 1993, el novo presidente Albert Zafy el xe salì al potere, ma el no xe stà bon de unificar el paexe. En tel 1996, dopo che Zafy el xe stà meso da parte dal parlamento, Ratsiraka el xe tornà al potere. En tel 2001, el candidato de l’oposision Marc Ravalomanana el ga vinto le elesioni, ma Ratsiraka nol ga volù lasar el potere. Dopo scontri violenti in tuto el paexe, Ravalomanana el xe diventà presidente graxie al sostegno de le cexe catolega e protestante. Dopo on primo periodo de movimento verso la democrasia, Ravalomanana el ga scominsià a tor decision senpre pi totalitarie. En tel otobre 2007, el governo malgasio el ga espulso on gesuita francexe che el ga vu el corajo de criticar el governo.

Curiosità[canbia | canbia el còdaxe]

  • El nome Madagascar el vien dal libro El Milione de Marco Polo. El mercante venexiano el parla de n'ìzoła ciamada Madeigascar. El nome el xe stà asocià al Madagascar da i cartografi italiani del Rinasimento e el xe diventà el nome uficiale del paexe.
  • Durante la guera de conquista del 1895, venti soldadi francexi i xe morti in batalia, e sie mila i xe morti par la malaria e altre malatie tropicali.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Storia_del_Madagascar&oldid=1099790"