Storia del Malawi

Da Wikipedia, l'ençiclopedia libara.
Va a: navigasion, serca
Mapa del Malawi

Longo le rive del Lago Malawi, i paleontologhi i gha catà i osi de ominidi che i gha visù li 50 – 60 000 ai fa. Ricatamenti en tel nord del paexe i fa pensar che 10 000 an fa zente simile a quela de Corno d'Africa i vivea anca qi. A Chencherere e Mphunzi, rente de Lilongwe, i paleontoghi i gha catà de i osi de pigmei che i xe ricordà co i nomi de batwa e akufula. Ste etnie le vivea en Malawi en tel 1.500 a.C. e legha lasà varie piture so le rocie en tel sentro del paexe.

Regno Maravi[canbia | canbia sorxente]

Co le popolasioni bantu le gha scominsià la migrasion che le gha portà en tuta l’Africa, on grupo de lavoradori del fero i xe rivà e Malawi e i gha fondà on regno. Stà etnia la xe ricordà co el nome de maravi, che vorea dir ragi de luze. Se pensa che el nome Malawi el vegna da maravi. Co el tempo, e grasie a altre migrasioni bantu, i maravi i gha dato vita a i chewa, che ancò i xe l’etnia pi grosa del Malawi. I maravi prima, e i chewa, dopo, i gha sterminà le popolasioni batwa e akafula. El regno maravi el cuerzea el Malawi de ancò e aree del Mozanbico e de lo Zanbia. La cavedal del regno la se catava a Mankhamba e le re, el Kalonga, el vivea la e controlava el regno co i so capi. La guera co i marcanti de i sciavi la gha fato perdar el potere al kalonga en tel XVIII secolo.

Contati co i foresti[canbia | canbia sorxente]

El regno de i maravi el gavea on contato costante co la costa de nord del Mozanbico. Avorio, oro e sciavi el vegnea vendù a i marcanti arabi e, pi tardi, a i portoghexi. I portoghexi i gha portà el formenton che el xe diventà popolare en tuta la zona e el gha preso el posto del sorgho.

I ngoni[canbia | canbia sorxente]

Durante el periodo de la mfecane, grupi de popolasioni ngoni le xe rivà en Malawi. El regno de i maravi el xera za en crisi par le guere contro i marcanti de i sciavi e nol gha podesto difendarse da i ngoni. I ngoni i gha caturà el sud del paexe i gha continuà a far guera co i chewa par tore sciavi e el magnare.

I yao[canbia | canbia sorxente]

A lo steso tenpo de i ngoni, i yao i xe rivà en Malawi dal Mozanbico. I yao i scapava da l’avansata de i macua. I yao i gavea i fusili e i gha subito atacà i ngoni e i chewa par caturar sciavi. I yao i xera musulmani ei i se sa stabilio longo le rive del lago Malawi, ne la zona de Mangochi.

I shirazi[canbia | canbia sorxente]

I arabi de la costa, i shirazi, de cultura swahili, i gha senpre fato marcà de sciavi. En tel XVIII secolo i controlava le trate che da la costa del Kenya e de la Tanzania le entrave fin a la region de i Grandi Laghi. En Malawi, i marcanti shirazi i gavea vari fortini. El pi grande el xera quel de Nkhotakota, fondà en tel 1840, e controlà da i marcanti de Zanzibar. Da 15 a 20 000 scaivi a l’ano i pasava de la.

Eoropei[canbia | canbia sorxente]

Anca se i primi contati i xe stà fati da i portoghexi, questi i no gha mai tentà de controlar la region. El primo eoropeo che el gha lasà el segno en te la storia del Malawi moderno el xe stà David Livingstone. Livingstone el xe rivà so le rive del lago Malawi en tel 1859. Co Livingstone, la strada la se sa verto a i misionari de la cexa anglicana scozexe e al governo de el Regno Unio, che el gha proclamà el protetorato de l’Africa Sentrale, pi tardi del Nyasaland, en tel 1891.

Indipendensa[canbia | canbia sorxente]

I malawiani i gha tentà varie olte de rivar a l’indipendensa, i politeghi locali i gha fondà el Congreso Africano del Nyasaland (Nyasaland African Congress – NAC) en tel 1953. Ne lo steso ano, i inglexi i gha meso el Malawi ne la stesa aministrasion de la Rhodesia (ancò Zinbabue e Zanbia) par formar la Federasion de la Rhodesia e del Nyasaland. En tel lulio 1958, el naxionalista Hastings Kamuzu Banda el xe tornà en Malawi dopo esar ndà a l’estero par studiar medisina e en Ghana par vedar i primi pasi de l’indipendensa de quel paexe. Banda el gha subito tolto el comando del NAC. En tel 1959 el xe stà meso en prison a Gwelu (ancò Gweru) ma el xe stà libarà en tel 1960 par participar a la conferensa costitusionale del 1960 a Londra.

Tornà en Malawi, Banda el gha trasformà el NAC en te on partito, el Malawi Congress Party – Partito del Congreso Malawiano, MCP. El 15 aprile 1961 el MCP el gha vinto le prime elesioni legislative e spinto par l’aministrasion autonoma del paexe. La federasion la xe stà abolia en tel 1963 e Banda el gha ocupà el posto de primo ministro del Malawi. Co l’indipendensa el 6 lulio 1964, Banda el xe diventà presidente e, en tel 1971, el parlamento lo gha proclamà presidente a vita.

L’Aquila[canbia | canbia sorxente]

Banda el xe diventà subito on ditatore e el ghà meso su on sistema par controlar el paexe. I zoeni ativisti del MCP i gavea el control del teritorio. Dal sistema politego del regno maravi Banda el gha tolto el sistema de i capi, co i quali el tegnea soto controlo i contadini. El partito unico el gha scominsià na campania de glorificasion del presidente che el vegnea ciamà Ngwazi, l’aquila, e Kamuzo, l’eterno. Tute le nove costrusioni le portava el so nome. Banda nol gha mai usà la violensa diretamente. Co el se sa sentì meso en pericolo da el movimento par la democrasia, el no gha esità a ordinar de le stragi.

Soto Banda, el Malawi el xe diventà on paexe sotomeso. Tuto el xera controlà dal governo: da la longhesa de i cavei, al vestito de le done. Le Cexe no le podea parlar libaramente e serti grupi religioxi (Testimoni de Geova par esempio) i xera vietai. La censura la controlava i media, ma anca le telefonate private. Tuti quei che i entrava o usiva dal Malawi i vegnea controlà.

Democrasia[canbia | canbia sorxente]

Dopo na forte reasion popolare e de la Cexa Catolega, Banda el gha parmeso el referendum par vedar se la zente la volea el multipartitismo. El 14 giunio 1993 i malawiani i gha votà par la democrasia. A le prime elesioni libare en tel 1994, el Fronte Democratico Unio de Bakili Muluzi el gha vinto la magioransa e el se sa unio co l’Aleansa par la Democrasia par formar on governo. Muluzi el gha fato scrivar na nova Costitusion par canbiar i diriti del vecio partito unico, verzar fora el paexe al rsto delmodo e rinovar l’economia. Muluzi el xe stà rieleto par on secondo mandà. El gha tentà de far canbiar la Costitusion par esare eleto na tersa olta, ma el no gha podesto.

En tel 2004, Bingu wa Mutharika el xe stà eleto presidente. La so campania anti corusion lo gha portà a lasar el so partito, el Fronte Democratico Unio e governar co elsostegno de parlamentari de l’oposision. El paexe el gha mejorà la so situasion finansiaria, ma el rimane ono de i pi poveri de l’Africa.