Storia de la Libia

Da Wikipedia, l'ençiclopedia libara.
Va a: navigasion, serca
Mapa de la Libia

La Storia de la Libia la fonda le so raixe en te la storia de i imazigen, i primi abitanti serti de la region. Ma la xe anca la storia de na miriade de popoli che i xe pasà de chì e che i gha controlà el destino del paexe.

Libia antica[canbia | canbia sorxente]

Arco de Marco Aurelio a Tripoli

I abitanti originali de la Libia i xe i berberi. No ghe xe fonti serte so l’origine e la pre-storia de sto popolo. I primi documenti so la Libia i se li gha co l’arivo de i fenici e de i greci su le rive mediteranee de la Tripolitania e la Cirenaica. I fenici i gha fondà varie colonie, la pi importante la xera Cartagine. Cartagine e tute le altre colonie le xe cascà soto el control de Roma co la fine de le guere Puniche. La sità de Tripoli la xera el ponto de partensa e de arivo de le carovane che traversava el Maghreb e che le pasava el deserto del Sahara par rivar a Timbuctù.

I greci i gha costruio varie colonie en te la Cirenaica. La zona la xera conosuda come la Pentapoli, le cinque sità, che le xera: Cirene – che la gha dato el nome a la region, Marsa Susa, Arsinoe, Berenice e Barca. Anca la Cirenaica la xe finia soto el controlo romano. Co la scomparsa de l’impero romano osidentale, la Libia la xe rimasta soto el controlo de Bisanzio.

Periodo islamico[canbia | canbia sorxente]

El califato islamico dal 622 al 750.

Le armate arabe le xe rivà en Libia en tel 647. El control arabo so la region el xe sempre stà forte. I berberi, che i xera en majoria cristiani, i xe stà convertii a forsa e la loro cultura mesa en secondo pian. El control politego de la Libia el xe rimasto en man araba par on secolo. En tel 750 i Abasidi i gha tolto el poter a i Umayadi e portà la cavedal a Baghdad. La Libia la xera parte de sto impero, ma el control el xe diventà nominale. En tel 800, el califo Harun ar-Rashid el gha nominà Ibrahim ibn al-Aghlab governatore de la Libia. El novo governatore el gha fondà la dinastia de i Aghlabidi, diventando de fato el re de la Libia. I califi de Baghdad i xe rimasti co la sola autorità spirituale. I novi governanti i gha recuperà ute le infrastruture romane e mejorà la situasion economica de la zente.

Co la fine de el control musulmano, la Libia la gha perso el sistema sentralizà de governo e la costa la xe finià en man de i pirati (XV secolo). Co l’arivo de i otomani en tel 1551, la solfa no la xe canbià. I turchi i no gavea interese a controlar la colonia e i podea profitar de i pirati par tegnar soto controlo el Mediteraneo.

I turchi i gha diviso el Maghreb en tre province: Algeri, Tripoli e Tunisi. Tripoli la gavea on pashà nomenà dal sultano de Costantinopoli. I soldai i xera ciamadi i gianizeri. El control de i turchi el gha resistio fin al 1711, co Ahmed Karamanli el gha fondà la dinastia na nova dinastia che la controlarà la Libia fin al 1835. La dinastia de Karamanli la scominsià a perdar teren co le guere Barbariche (dal 1801 en poi). En tel 1835, el sultan Mahmud II el xe tornà en control de la Libia. La Libia la xe rimasto soto i otomani fin a l’arivo de i italiani en tel 1911.

Periodo coloniale[canbia | canbia sorxente]

El 3 otobre 1911 i italiani i gha atacà Tripoli. Dopo pochi mexi, el sultan el gha lasà la Libia a l’Italia co el tratato de Losanna. 150 000 italiani i xe stà mandà en Libia par colonizar el paexe. En tel 1920, par finir la guera contro i senusi, l’Italia la gha riconosù lo seico Sidi Idris come el capo ereditario de i Senusi co autorità so le oasi de Kufra e Emiro de la Cirenaica. L’Italia la gha perso el control de la Libia co la seconda guera mondiale.

Libia moderna[canbia | canbia sorxente]

Sidi Idris, che el gavea visù en esilio al Cairo, el xe tornà en Libia en tel 1947. El 24 dicenbre 1951, la Libia la xe diventà na naxion indipendent e Sidi Idris proclamà el re. El ricatamento de petrolio el gha dà a la Libia i mezi par modernizar el paexe. El popolo parò el sa reoltà parché la majoria de i schei i xe finii en te le tasche de i potenti. El 1 setembre 1969, soto la guida de Muhammar Abu Minyar al-Qadhafi (Ghedafi), i miliari i gha mandà el re en esilio al Cairo e abolì la monarchia.

Ghedafi el gha controlà la Libia fin ancò. Dopo ani de isolamento internasional – causà da el sostegno de la Libia al terorismo internaxional – la Libia la xe tornà a esar on paexe verto a le naxioni foreste en tel 2005.