Maasai

Da Wikipedia, l'ençiclopedia libara.
Va a: navigasion, serca

I maasai i xe un popolo de pastori che vive en tel sud del Kenya e en tel nord de la Tanzania, doe i xe conosudi come i arusha. Ghe altri picoli grupi sparsi - i samburu a Maralal, i maasai del monte Elgon, e fameie maasai in Mozanbico.

I maasai ie rivà en Kenya nel XVII secolo. I iè vegnudi zò da la vale del Nilo. I xera agricoltori, ma i ie diventà pastori co che i sa catà nele zone aride de la Rift Valley. Secondo la tradizion maasai, loro ie nati quando i gha scalà i dirupi della Rift Valley par arivar su i altopiani. I maasai i xe rivà ne le tere che i ocupa ancó nel 1750 circa. No ghe documenti scriti, parò se por capir sta data fasendo i conti de i grupi de iniziazion. Tuti i grupi de iniziazion i gha un nome, tuti i clam maasai i conosse i nomi dei grupi prima de lori. Se sa anca che un grupo dura venti-venticinque ani prima de scominziar un novo grupo. Fazendo i conti, savemo che i maasai ie rivà ne la zona de Kajiado e Narok nel 1750. I nomi de i fiumi e de le montagne de la zona maasai ne fa saver che prima de lori sta tera l'era ocupà da grupi boscimani che i xe scapà nel sud de la Tanzania. I maasai del Kenya xe 300 000. I ama la so cultura e la so lingua e i è diventà uno dei popoli piasè conosudi de l'Africa.


Storia[canbia | canbia sorxente]

Co i maasai i xe rivà en te le zone che i ocupa ancò, i sà diviso el teritorio che i controlava sensa tanti problemi. Le notisie de la violensa maasai le xera exagerà da i kamba – popolasion bantu che mediava el marcà tra la costa e l’interno – par fermar i marcanti che volea verghe on aceso direto co le tribù del’interno. Anca i inglexi i gha speso parlà de la ‘ferocità’ de i maasai. En tuto el periodo pre-coloniale e coloniale, i maasai i gha atacà de i bianchi na olta sola, e par difendarse da na razia de vache. La sola guera che i maasai i gha fato la xe stà na guera civile che gha portà a la morte de on gran numaro de guerieri e a la distrusion de certi grupi come i laikipia.

Tra el 1883 e el 1902, le mandrie de i maasi ie xe stà desimà da la peste bovina e dal vaiolo. El 90% de le vache e de i asini i xe morti. Anca la zente la gha soferto par el vaiolo. Sto qua el xe anca stà on momento de sicità prolungada. Do tersi dei maasai i xe morti en sto periodo. La situasion de debolesa e la presensa de i inglexi le xe stà fondamentali par la pardita de teritorio. Par far spasio a le fatorie de coloni, e dividar la tribù, i inglexi gha diviso i maasai, scurtà i confini, e creà le ‘riserve’ dove se podea entrar solo co on parmeso speciale. Ancò i maasi i rimane tacà a la loro cultura e tradision. El xe nomale vedar maasai vestii ne i so abiti carateristici anca a Nairobi.

Cultura[canbia | canbia sorxente]

I maasai i xe divisi en dodeze grupi: Kikonyoki, Damat, Purko, Wuasinkishu, Siria, Laitayiok, Loitai, Kisongo, Matapato, Dalalekutuk, Loodokolani e Kaputiei. La socetà la xe patriarcale e ghe xe de le legi tramandae oralmente par regolar la vita sociale.

La vita la se basa su le vache. La casa (enkang) la xe formà da on recinto de spini intorno a de le capane fate de sterco e fango. Co se entra en tel enkang, a prima capana a destra la xe quela del capo fameja; la seconda quela de la prima mojer, la prima a sinistra quela de la seconda mojer, e così via. I butini picoli dorme co la mare, i pi grandi i gha na caseta par conto lori. I maasai sposta le mandrie par cercar acqua e fien, i xe transumanti ma no nomadi. La richesa la se misura en bestie e fioi. Se una el gha na grande mandria, ma no gha fioi, el xe considerà poareto. Robar le vache a i altri no xe pecà, visto che Dio el gha crea tute le vache par i maasai.

La vita de i maasai la xe scandia da feste e rituali a sfondo religioso. On maasai el sa sempre el so posto en te la società e el sa cosa el gha da fare par esar considerà onesto e sagio. Tuti i maschi i fa parte de on grupo d’età. Ogni grupo d’età el pol ciapar rentro zente da 10 ani de difarensa. La prima vera celebrasion la xe la emorata (circoncixion) che parmete a i pi zoveni de diventar guerieri (il-murran). I il-murran i gha el compito de difendar la zente e le vache.

Zoino moran co i segni de el so stato

Durante el periodo de la circoncixion, ma anca durante altre feste, i zoeni vive en te na casa speciale, la manyata. El periodo de la formasion el xe longo, anca cinque ani, e el finise co la cerimonia de el eunoto. Dopo el eunoto, i zoveni i xe considarà guerieri maturi. Co na nova generasion riva a esar guerieri maturi, la generasion prima la pasa al rango de anziani zoeni, e i gha el compito de tor le decisoni politiche, finché i no diventa anziani veci.

Le butelete le diventa done dopo che le gha pasà la inixiasion, che comprende el rito de la emorata, circoncixion feminile. Na dona che no la xe circoncisa no la pol sposarse e no la pol participar a la vita de la comunità. Ancò, ghe de le butele che le preferise far l’inixiasion sensa far la circoncision. Al so posto i fa n’altra cerimonia. Stà tradision no la xe ancora asetà da tuti.

I maasai i pol sposar tute le done che i vol. La pratica de la poligamia la stà sparendo. En tel pasato ghera la credensa che le done maasai le podea dormir co tuti i compagni de inixiasion del marì. Questo no el xe vero. La pratica de la poliandria la xe praticà da alcuni grupi, ma no se trata de matrimonio, e la dona la xe sempre libara de de rifiutar.

I maasai no gha strumenti musicali. I canta e i bala sensa musica. El corno el vien usà sole ne le cerimonie.

Religion[canbia | canbia sorxente]

Exquisite-kfind.png Par saverghene de pì, varda ła pajina Maasai (religione).

I maasai i xe monoteisti. Dio el se ciama Enkai. Enkai el xe bon e vol ben ai maasai. Quando Enkai el xe contento el xe nero (Enkai Narok), se el xe rabià el xe roso (Enkai Nanyokie), quando el xe propio contenton el se ciama Enkai Parnumin (el Dio de tanti colori). La mediasion tra Dio e l’omo la vien par mezo del oloibon. L’oloibon el xe selto al momento de la circoncixion. L’oloibon el pol far la divinasion, domandar la piova e curare le malatie. Ancò tanti maasai i sa fato cristiani. Anca tra i oloibon se cata de i cristiani, sopratuto catoleghi.