Nairobi
Da Wikipedia, ła ençiclopedia libara.
| Nairobi | |
|---|---|
| Nairobi | |
 |
|
| Stato: |  Kenya
|
| Altitudine: | 1660 m s.l.m. |
| Superficie: | 684 km² |
| Abitanti: | 2.940.911 (2007) |
| Densità: | 4230 ab./km² |
| Sindaco: | Dick Wathika |
| Sito istituzional | |
La sità de Nairobi xe la pi grande sità de el Kenya e la cavedal de el paexe africano. El nome vien da el maasai (enkare nai robi) e vol dir el posto de l’acqua giasa. Nairobi la xe stà fondada en tel 1899 e la conta 4 milioni de abitanti. El centro sità l’è a 1700 metri sul livel del mare.
Indice |
[modifica] Storia
La zona dove Nairobi la xe stà costruia l’era na palude e no l’era abità da nisuni. I maasai i ghe portava le bestie a bear. En tel 1899, i operai che costruia la ferovia de l’Uganda, gha meso in piè on deposito rente de la palude. La zona la xera fresca, pena dopo la Rift Valley, a metà via tra Mombasa e Kampala, senzsa sginsale (e senzsa malaria) e ghera l’acqua. Par i primi deceni, Nairobi xe rimasta on vilagio ligà a la ferovia. Ghera on par the alberghi par i caciatori bianchi – famoso el Stanley Hotel usà anca da Hemingway – e empori par i coloni che abitava fora sità. Al momento de l’indipendenzsa, Nairobi la contava 200.000 abitanti, e le infrastrutture costruie da i inglexi le xera pi che suficenti par el paexe. Ancò, co la popolazsion l’è cresuda, le infrastruture no iè pi suficenti. El centro de la sità se stà trasformando, co la costruzsion de gratacieli, la disponibilità de linee digitali e otiche, co nove strade, che parò no le xe suficenti par le necesità de stà grande cavedal africana.
[modifica] Costruzsioni importanti
A Nairobi ghe boni ospedali, tra i meio de el continente: Kenyatta Hospital, Nairobi Hospital, Mater Hospital, Aga Khan Hospital e Karen Hospital. El centro sità l’è dominà da el Kenyatta International Conference Centre, e la so tore, costruio par ricordar el primo presidente del paexe. L’aeroporto se cata a sud, a 1661 m. Su el livel del mar, so i Kaputiei Plains – la spianata de i maasai kaputiei – e el xe el secondo aeroporto africano par el trafico, dopo quel de el Cairo. A nord se cata la zona de Gigiri – che saria Thighiri ne la lengoa kikuyu – dove ghe le Nazsioni Unite. Quela de Gigiri xe la pi grande sede de l’ONU fora da New York. Le catedrali catolega – Holy Family Basilica – e anglicana – All Saints Church – xe en tel sentro de la sità. La sità gha anca de i parchi ben tegnui. Uhuru Park (Parco de la Libartà) xe rente al distreto governativo, el Nairobi Park l’è l’unico parco nazsionale rente a ona sità in Africa.
[modifica] Clima
Nairobi la xe pena soto l’equatore. El clima l’è moderato. La temperatura masima xe a la fine de genaro (30°), e la pi basa en agosto (7°). De norma, la temperatura no la supera i 25 gradi de giorno, e no la va soto i 10 de note. La piova se cata en marzso-magio e novembre-dicembre, ma ghe pol esar precipitazsioni anca ne i altri mezsi. A agosto ghe el manyunyu, na specie de sguazza forte.
[modifica] Economia
A Nairobi se cata industrie de tuti i tipi. Importanti xe le industrie alimentari, de le materie plastiche e metalurgiche. La Borsa xe la seconda, dopo quela de Johannesburg. Tante compagnie multinazsionali gha le loro sedi centrali a Nairobi. La sità la xe anca el centro de smistamento de i turisti par el Kenya, ma anca de i paexi confinanti.
[modifica] Problemi sociali
Gnanca la metà de i abitati de Nairobi vive ne i quartieri residenzsiali. Pi de do milioni de persone vive en te le baracopoli, che osupa manco del 5% de el teritorio. Ghe xe pi de do zsento baracopoli a Nairobi e le so vicinanzse. La pi grande baracopoli de Nairobi, e de l’Africa, xe Kibera: 800.000 abitanti en manco de 2 km2. Altre grandi baracopoli xe: Korogocho, Mathare, Kawangware. Le sità satelite de Thika, Limuru, Ngong, Ongata Rongai ghe zonta n’altro milion e mezso de abitanti a l’area metropolitana. El 30% de la popolazsion adulta xe infeta de HIV, el virus che porta l’AIDS.
[modifica] Mass Media
Nairobi xe la cavedal africana de i mass media. L’Asociazsion de i Giornalisti Foresti (Foreign Correspondent Association of East Africa) la gha pi de domila aderenti. El Daily Nation xe el giornal co la pi grande circolazsion en Africa Orientale. El Daily Nation xe ona de le publicazsioni del Nation Group, la pi granda casa de produzsion de media de l’Africa. Se publica giornali en inglexe e swahili, riviste in inglexe, swahili e ne le majori lengoe de el paexe. A Nairobi se conta sete televisioni. Le agenzsie internazsionali come Reuters e Associated Press gha i so centri de produzsion ne la cavedal keniana. La BBC, CNN, e la RAI gha i loro ofici par l’Africa a Nairobi. El New People Media Centre de i comboniani, misionari de Verona, xe la pi grande casa de produzsion multi-mediale catolega de l’Africa.
Portałe Africa: varda łe altre voxe de Wikipedia che łe parla de Africa
