Pretoria

Da Wikipedia, ła ençiclopedia lìbara.

Pretoria xe la cavedal aministrativa de el Sudafrica. Dopo el tempo de l’apartheid, el governo gha dovesto creare tre cavedali, Pretoria, Sità del Capo (legislativa) e Bloemfontein (giudisiaria) par darghe on tocheto de poder a i tre grandi grupi che forma la società sudafricana (neri, meticci – coloured-, e boeri – afrikaaner). De fato, Pretoria xe la vera cavedal.

Pretoria xe na sità situà en tel nord de la regione de Gauteng. Co Centurion e Soshanguve la forma l’area metropolitana de Tshwane. Tshwane ga na popolasion de do milioni de abitanti, ma bisognaria anca contar i abitanti de sità satelite come Mamelodi, che da sola gha 800.000 abitanti. La zente la parla inglexe, afrikaans, tswana e ndebele.

[modìfega] Storia

La zona de Pretoria la xera abità da grupi ndebele. A questi se sa zontà de i grupi zulu e tswana. No pare comunque che ghe fose de i vilagi stabili prima del 1800. La sità la xe stà fondà da Marthinus Pretorius en tel 1855 che la gha ciamà così par ricordar so pare, Andries Pretorius. Pretoria la xe diventà la cavedal de la Republica del Sudafrica (el Transvaal) en tel 1860. Co la fondasion de Pretoria i boeri gha terminà la migrasion da la region de el Capo che gavea portà a la fondasion de le republiche indipendenti de el Transvaal e del Stato Libaro de Orange.

Co la seconda guera boera (1899-1902), le republiche boere gha perso l’indipendensa. I inglexi gha meso insieme le republiche co le colonie de el Natal e del Capo, par formar l’Union del Sud Africa. Pretoria xera la cavedal de l’Union. La sità gha tre università: de Pretoria, la università de tecnologia de Tshwane, e l’UNISA – università del Sudafrica. L’economia se basa so le industrie pesanti del fero.

[modìfega] El nome

Co Marthinus Pretorius xe rivà ne la zona de Tshwane (se pronuncia ciuà’ne), el gha fondà Pretoria. El nome ricorda so pare Andries Pretorius, che el xera ono de i capi de la grande migrasion de boeri dal Capo a l’interno del Sudafrica. Andreis el xera ono de i capi che gha vinto la bataglia de Blood River contro i zulu, e ono de quei che gavea otenù l’indipendenza de el Transvaal (Sand River Convention – 1852). Par questo, i boeri (afrikaners) i considera Pretoria la loro cavedal, e on posto importante par la loro storia. El museo de i Voortrekkers raconta sta storia.

I abitanti originali de sta region i vede la storia da n’altro ponto de vista. Par lori, i boeri xe de i invasori che sa tolto la loro tera. La region la se ciamava Tshwane, e gha da verghe stò nome anca ancò. En tel 2005, el Consiglio Sudafricano de i Nomi Geografici gha aprovà el cambio de nome. I boeri no xe d’acordo, ma anca tra i neri ghe quei che no i vol canbiar el nome de la sità. El goveno no gha ancora aprovà el cambio.

• Portałe Africa: varda łe altre voxe de Wikipedia che łe parla de Africa