Zulu

Da Wikipedia, l'ençiclopedia libara.
Va a: navigasion, serca

I zulu i xe el grupo etnico pi grande del Sudafrica. La majoria de i zulu i vive en te la region del KwaZulu Natal. Se cata zulu anca en Zanbia, Mozanbico, e Zinbabwe. I zulu i parla na lengoa bantu, la isiZulu, che la fa parte del grupo linguistico Ngoni.

Origini[canbia | canbia sorxente]

Le popolazioni ngoni (dete anca nguni), le xe vegnù zo da l’Africa de l’Est verso el IX secolo d.C. I ngoni i se sa stabilio en te l’Africa australe e i gha dato vita a vari popoli. I zulu i disende da on clan fondà en tel 1709 da Zulu kaNtombhela (Zulu fiol de Ntombhela). El nome zulu el vol dir cielo.

El clan zulu el xe diventà inportante en tel XIX secolo soto la guida de Shaka Zulu che el xe stà bon de metare insieme i vari clan ngoni par formar el Regno Zulu. Shaka el xe stà ono de i pi inportanti fatori che i ga influensà la storia del Sudafrica. El regno el xe terminà co la guera contro i inglesi del 1878, anca se el re Cetshwayo el xe stà rimeso sol trono en tel 1883, pochi mesi prima de la so morte. En tel 1887, i inglexi i gha aneso el teritorio zulu a la Colonia de la Sità del Capo.

Lengoa[canbia | canbia sorxente]

La lengoa de i zulu la se ciama isiZulu. La xe na lengoa Bantu del grupo ngoni. La majoria de i sudafricani i capise el isiZulu. I zulu i parla anca inglexe, portoghexe, seSotho e shangaan.

La lengoa isiZulu la xe speso usada da artisti come John Cleg e i LadySmith Black Mambazo ne le so canson. Anca Paul Simon el ga usà el isiZulu en de le canson che el ga scrito co de i musicisti sudafricani.

Religione[canbia | canbia sorxente]

La religion tradisionale de i zulu la ge dava inportansa a Dio creator – Nkulunkulu – ma anca a i antenati – amaDlozi. I spiriti cativi i xera considerà la causa de tute le magagne de i zulu. I zulu i ga senpre dato inportanza a la pulizia come segno de spiritualità. Tuti i atrezi e i utensili i gavea da esar netà dopo l’uso, e on bon credente el gavea da fare tre bagni al giorno.

Ancò la majoria de i zulu i xe cristiani – catoleghi e batisti.

KwaZulu[canbia | canbia sorxente]

Co la politica de l’apartheid (svilupo separà), la region del KwaZulu la xe stà proclamà (1970) na ‘homeland’, na region semiautonoma ma sotomesa al governo de Pretoria. Tuti i zulu del Sudafrica i ga perso la citadinansa sudafricana e i xe stà considerà citadini del KwaZulu. El capo del KwaZulu el xe senpre stà Mangosuthu Buthelezi. En tel 1994, co la fine de l’apartheid, el KwaZulu el xe stà unio al Natal par formar la provincia del KwaZulu-Natal.

En tel 1975, Buthelezi el ga rimeso en piè el movimento Inkatha YaKwaZlu, pi tardi Inkatha Freedom Party. L’Inkatha la zera stà formà en tel 1923 da Solomon kaDinuzulu, fiol de l’ultimo re de i zulu, par sostegnar la so richiesta del trono. Buthelezi el ga trasformà l’Inkatha en on partito contro l’apartheid, ma anca contro l'African National Congress, el grupo de Nelson Mandela.

Zulu moderni[canbia | canbia sorxente]

Co la fine de l’apartheid en tel 1994, i zulu i ga continuà a vivare sopratuto en tel KwaZulu. Tanti zulu i vive anca en te la region de Gauteng do ghe xe fabriche e sentri finansiari.

A livel politego, i vice presidenti del Sudafrica moderno i xe senpre stà zulu (Mangosuthu Buthelezi, Jacob Zuma e Phumzile Mlambo-Ngcuka), anca par sostegnar l’interetnicità de l’African National Congress che el xe senpre stà en te le mane de leader xhosa.