Mombasa

Da Wikipedia, l'ençiclopedia libara.
Va a: navigasion, serca

Mombasa la xe la seconda sità del Kenya. La se cata su la costa. Mombasa la xe anca on centro turistico e el porto pi importante de el paexe, co conesioni co Uganda, Rwanda, Sudan, e Congo. La sità la xe costruia su l’ixola de Mvita e colegà a la tera ferma da do ponti, el Makupa Causeway che la colega a la strada per Nairobi, e el Nyali, che la colega a la cota nord. A sud, l’ixola de Mombasa la se colega a la tera ferma co i tragheti de Likoni e Mtongwe.

Storia[canbia | canbia sorxente]

L’ixola de Mombasa la xe abitada da almanco 1.500 ani da i dodese grupi che forma la fameja de l’etnia mjikenda. La sità de Mombasa la xe nata co i marcanti arabi omaniti, persiani e indiani gha scominsià a vegnar qi par far marcà co i mjikenda de la costa. El contato de sti popoli foresti co la popolasion locale gha dato vita a la cultura swahili. El islam l’è rivà su le coste verso el secolo VIII e ghe testimonianze antiche de la presensa de i musulmani longo tuta la costa (moschee de Lamu, Ghedi e Mtwana). Mombasa xera el porto dove se podea comprar avorie, oro e spesie. I ultimi studi su la trata de i sciavi dixe che i porti interesà xera Malindi e Shimoni. No sembra che Mombasa fuse anca on punto de arivo de le carovane de sciavi. La spedisin cinese de Zheng He gha aprodà a Mombasa en tel 1415. I grandi viagiatori arabi al-Idrisi (1151) e ibn Battuta (1331) parla de Mombasa ne i so scriti. I portoghexi xe rivà a Mombasa en tel 1498, co Vasco de Gama che esplorava le coste de l’Africa par verzar la via par le Indie. I portoghexi gha sachegià la sità en tel 1500 e 1528, e gha costruio on forte (Fort Jesus) che controla l’entrada del Tudor Creek, en de i do trati de mar che separa l’ixola da la tera ferma. En tel 1638, Mombasa xera na colonia portoghexe soto el controlo de Goa (India) ma la xe pasà soto el sultanato de Oman en tel 1698, controlà da el sultan de Zanzibar. La fameja de i Mazrui xera i governatori (liwali) locali. I inglexi xe rivà en tel 1824, ma i gha tegnù la sità solo par do ani. Mombasa la xe diventà na colonia inglexe solo en tel 1895. Co la costrusion de la ferovia per l’Uganda, la sità la sa sgrandio. Da alora, la storia de Mombasa l’è quela del Kenya, anca se uficialmente, Mombasa xe rimasta soto Zanzibar fin a l’indipendensa.

Economia[canbia | canbia sorxente]

La sità de Mombasa la xe on importante porto de la costa orientale de l’Africa. El porto serve el Kenya, ma anca altre nasioni che no gha sboco sul mar. Industrie pesanti le se cata su l’ixola de Mombasa o su la teraferma rente a l’ixola. Altre industri importanti xe quele de la trasformasion de prodoti agricoli, del petrolio e de la lavorasion de el sisal. Mombasa la xe anca n’atrativa turistica. La sità vecia, Fort Jesus e le spiage de la costa ie visità da on milion de turisti ogni ano.

Popolasion[canbia | canbia sorxente]

La popolasion locale la xe formà da i mjikenda. Ancò Mombasa la xe na sità multi-etnica, co rapresentanti de tute le etnie kenyane, eoropei e axiatici. La majoria de i abitanti de ancò no la xe de la costa.

Religion[canbia | canbia sorxente]

La religion tradisionale de i mjikenda la xe ancora praticà, e la xe comunque importante anca par la popolasion musulmana. No ghe carica sociale o politica che posa esar afidà a na persona se no ghe la benedision de i ansiani mjikenda. I musulmani xera la majoria fin a pochi ani fa. Da diexe ani a stà parte, le cexe cristiane gha la majoria anca a Mombasa.