Storia de la Republica del Congo

Da Wikipedia, l'ençiclopedia libara.
Va a: navigasion, serca
Mapa del Congo

La Storia del Congo la xe ona de le pi conosude da el mondo ocidentale par i contati co el regno del Kongo e la formasion de na monarchia cristiana en tel mezo de l’Africa a i inizi de i tenpi moderni. La storia del Congo la scominsia, parò, molto prima.

Preistoria[canbia | canbia sorxente]

I pigmei mbuti i ga abità el teritorio do ancò se cata el Congo fin dal 3 000 a.C. I primi popoli bantu i xe rivà en te la region verso el I secolo d.C. I bantu i ga portà co lori la tecnologia del fero. I kongo i se sa stabilio a la foce del fiume Congo e i ga formà na serie de picoli regni. El pi inportante el xe stà el Mbanza Congo, na sità stato che ora la se cata en tel nord de l’Angola, rente de la Republica Democratica del Congo. El Mbanza Congo el xe cresù (XV secolo) fin a cuerzar n’area de 300 000 km². Sto regno el xera divixo en sie province: Mbemba, Soyo, Mbamba, Mbata, Nsundi e Mpangu. I regni de Loango e Mbundu, al nord e al sud rispetivamente, i xera regni vasali. Le notisie so sti regni le xe baxade so la tradision orale.

Portoghexi[canbia | canbia sorxente]

La region del Kongo en tel XV secolo

En tel XV secolo, le potense eoropee le volea spacar l’egemonia de el comercio co l’oriente che el xera en man a i paexi islamici e la Republica de Venesia. I portoghexi i ga scominsià a sercar na via diversa par rivar a le Indie. En tel 1482, el navigador Diogo Cão el xe riva a la boca del fiume Congo. El incontro co la popolasion locale el xe ndà ben e, manco diese ani dopo, la nobiltà del regno la se sa convertio al cristianeximo. Nzinga a Nkuwu, el re de i bakongo, el xe stà batezà el 3 magio 1491. El fiol, Afonso I, el ga governà da el 1506 al 1543 e uno de i so fioi el ga studià a Roma e el xe diventà vescovo de i bakongo.

Co i portoghexi i ga scominsià a sfrutar le colonie del Brasile, Capo Verde e São Tomé e Príncipe, i ga vù bisogno de sciavi par le piantagioni. I portoghexi i ga tacà a tor i scaivi da el re del Kongo.

Sciavitù[canbia | canbia sorxente]

La pratica de la sciavitù la ga creà insodisfasion tra i bakongo. I bakongo i se sa reoltà contro i portoghexi soto la guida de Tchimpa Vita, na suora congolexe che la gavea visto de le visone de San Antonio da Padoa che el la gavea dito de batarse par l’indipendensa del so popolo. El 25 otobre 1665, 20 000 bakongo i se sa scontrà co l’esercito portoghexe. Co la bataja la ga scominsià, el re Antonio I el xe stà copà subito e i congolexi i gha perso la bataja. I congolexi i xera anca divisa tra de lori par le lote par la sucesion al trono.

El regno del Kongo en tel XVIII secolo

Le lote interne le ga portà el regno de Loango a la secesion, così come el regno Téké, che gavea la cavedal rente de do ancò se cata Brazaville. Altri regni i se sa stacà fin che el regno del Kongo el xe diventà no enclave picenina al nord de l’Angola. I portoghexi i ga abolì el regno del Kongo en el 1914.

Colonialismo[canbia | canbia sorxente]

Mercanti[canbia | canbia sorxente]

L’industrializasion de l’Eoropa la ga portà la richiesta de materie prime. L’Africa la xera el serbatoio natural par sodisfare sta richiesta. I paexi che podea verghe na fornitura costante de oio, legname, avorio, goma, coton e altro, i podea sperar en te na produsion de masa e a baso prezo. El bisogno del marcà el ga portà a la division de l’Africa secondo i canpi d einterese a la Conferensa de Berlin. Prima ancora de le nasioni, i marcanti e i esploratori i xe rivà en Africa par verzar le strade comerciali. Francexi, portoghexi e belgi i ga conbatù par el controlo del fiume Congo. A la fine, i portoghexi i ga vù l’enclave de Cabinda, a nord de la boca del fiume; i belgi (ma saria mejo dir el re Leopoldo II, che la colonia la xera sua propietà privada) na strisia de tera a sud – sinistra Congo – tra el fiume e el confin de la colonia portoghexe de l’Angola; e i francexi el teritorio a nord – destra Congo.

Re Makoko de i Téké (so la portantina) a Brazzavile en tel 1905.

El uficiale d emarina francexe, ma de origini italiane, Pierre Savorgnan de Brazza el xe sbarcà en tel Gabon e el ga risalì el fiume Ogooué par rivar al regno de i Téké en tel 1880. Qi el ga firmà n’acorde de difesa so el re Makoko e meso le baxi par la fondasion de la cavedal del Congo a Mfoa, on vilagio so le rive del fiume Congo.

L’Africa Equatoriale Francexe en tel 1913.

I francexi i ga sercà de inpor el so controlo co la violensa, el laoro coato, e altre pratiche poco umane. Le etnie locali le se sa ribelà pi olte. El governo francexe, che el no volea spendar schei par le colonie, el ga dato el Congo en concesion a na seie de companie private che le fermava tute le reolte co na represion violenta e brutale. La costrusion de la ferovia da Pointe-Noire a Brazzaville – 511 km – la xe costà la vita a 23 000 africani e dosento eoropei.

Aministrasion francexe[canbia | canbia sorxente]

En tel 1886 i francexi i ga proclamà la colonia del Gabon-Congo. En tel 1991 i la ga ciamà Colonia del Congo Sentrale. En tel 1910 el teritorio el xe stà meso co el Ciad, l’Oubangui-Chari e el Gabon par formar l’Africa Equatoriale Francexe.

Co i todeschi i ga atacà la Fransa en tel 1940, el maresialo Philippe Pétain el se sa areso e el ga formà el governo de Vichy. El general De Gaulle el xe scampà a Londra e el gha formà el governo en exilio par combatar contro i todeschi. Quasi tuti i goernatori de le colonie francexi i sa meso co Pétain. De Gaulle el xe riusì a catar de i uficiali che el lo sostegneva, e così el xe stà bon anca de rovesiar i governatori fedeli a Petain e conquistar bona parte de le colonie. El governator del Ciad, Félix Eboué – on nero de la Guaiana Francexe – el ga sostegnù De Gaulle e el xe diventà el Governator Generale de l’Africa Equatoriale Francexe. En sta veste, el ga partecipà a la Conferensa de Brazzaville en tel 1944 do le linee guida de la politega coloniale francexe le xe stà riscrite.

Nasionalismo[canbia | canbia sorxente]

El tratamento duro che i francexi i riservava a i africani el ga creà na forte reasion. André Matswa pol esar considerà el pare de el nasionalismo congolexe. Nato en tel 1899 a Mandzakala, el ga scominsià a laorar par l’aministrasion francexe de Brazzaville en tel 1919. Dopo pochi ani, el xe ndà en Fransa e el ga combatù par i francexi en Maroco durante la rebelion del 1924-25. En tel 1926, a Parigi, el ga fondà la Asociasione de i Indigeni de l’Africa Equatorile Francexe e el ga vù el sostegno del partito comunista francexe e de i masoni. Co l’Asociasion la xe diventà ativa anca en Congo en tel 1929, i francexi i ga disolto el grupo, meso i dirigenti en prison e mandà Matswa en exilio en Ciad.

Matswa el xe scampà en Fransa en tel 1935 e continuà el so laoro politego soto falso nome. El ga anca conbatù contro i todeschi e el xe stà ferio al fronte. Aresta na seconda olta, el xe stà mandà ndrio en Congo en tel 1941. Matswa el xe morto en prison el 8 genaro 1942. Dopo de lu, altri ativisti i ga seguì el so esenpio de laoro par el paexe.

Jacques Opangault el xe n’altro leader che el ga laorà par el Congo. Nato en tel 1907, el ga scominsià protestando contro la Cexa Catolega parché la usava la lengoa lingala. Opangault el volea che se usase el mbochi, chel xera la so lengoa. El xe stà arestà e mandà en Sentrafrica fin a la fine de la seconda guera mondiale. Al so ritorno el ga fondà el Movimento Socialista Africano. I socialisti francexi i no ga mia dato sostegno al so laoro par le so posisioni anticlericali e le so idee radicali. I francexi i preferiva sostegnar Felix Tchicaya del Partito Progresista Congolexe. Tchicaya el xera de la fameja reale de Loanga. Co el leader ivoriano Félix Houphouet Boigny el ga fondà el Grupo Democratico Africano e el Partito Progresista Africano (1947). El 21 novenbre 1945 el xe stà el primo africano eleto alparlamento francexe. Tchicaya el ga perso el sostegno en Congo parché el no ga mia oposto la Fransa par verghe l’indipendensa subito dopo la guera. El xe morto en tel 1961.

I francexi i ga senpre mostrà interese par Fulbert Youlou, on ex prete catolego. Ordinà sacerdote en tel 1949, el ga dovù lasar la tonega co el sa meso rentro a la politega. Co l’autonomia del Congo en tel 1958 el xe diventà el primo ministro.

Indipendensa[canbia | canbia sorxente]

I do ani prima de l’indipendensa xe stà turbolenti. Youlou el ga scominsià a far vedar le so tendense ditatoriali. El xe comunque diventà presidente del Congo a l’indipendensa el 15 agosto 1960. El ga dovù dar le dimisoni on ano pi tardi, co el ga dito che el volea crear el monopartitismo. La reasion de la popolasion la xe stà dura. I militari i ga tolto el potere e meso su on governo sivile provisorio. En tel 1963, Massamba-Débat el xe stà eleto presidente e Pascal Lissouba primo ministro. En tel agosto 1968, el capitano Marien Ngouabi el ga fato oncolpo de stato e el xe diventà presidente. Ngouabi el xe stà sasinà el 18 marso 1977. El colonelo Joachim Yhombi-Opango el xe stà nomina presidente, ma el xe stà rimoso do ani dopo. El vice presidente, Denis Sassou-Nguesso, el xe stà meso presidente provisorio.

Verso la democrasia[canbia | canbia sorxente]

Dopo tanti ani de vita politega piena da tensioni, el paexe el sa moso verso la democrasia multipartitica en tel 1992. Pascal Lissouba el xe stà eleto presidente en tel 1992. La politega de Lissouba la ga portà a varie somose e solo l’intervento de governi foresti el ga permeso de fermar la situasion prima che se svilpase la guera sivile.

En tel 1977, Soassou el se sa presentà a le elesionoi contro Lissouba. I militari, fedeli al vecio presidente, i ga ocupà la casa del presidente en carica. Lissouba el ga domandà l’intervento de altri paexi africani ma le trupe de Nguesso le ga caturà la cavedal e Pointe Noire el 16 otobre. Ngueso el ga tolto la presidensa e promeso el ritorno al governo sivile en tri ani. En tel 1988, altri grupi de guerilieri i ga tacà a conbatar contro el governo, blocando el proceso de ritorno a la democrasia. En tel 1999, el governo el ga firmà el cesate el fogo co quasi tuti i grupi de ribeli. Sassou el ga vinto le elesioni del 2002 sensa oposision.