Stòria de l'Alxeria

Da Wikipedia, l'ençiclopedia libara.
Cheło che te ghè schcià el rimanda a sta voxe, parché el xe on so sinònemo o el vien esplegà cuà drento. rimandamento da Storia de l'Algeria


La Stòria de l’Alxeria la xe tipega de quele de le popolasion mediteranee. Come tuti i paexi nord africani, anca l’Alxeria la ga visto decine de popoli pasar so le so tere, tute le potense mediteranee – fenicia, berbera, grega, romana, otomana e fransexe - le xe pasa de qi. I alxerinin moerni i parla arabo, ma ghe na minoransa che dòpara el berbero, na lengoa autoctona del Maghreb.

Preistoria[canbia | canbia el còdaxe]

I palentologi i ga fato ricatamenti che testimonia la continua abitasion del nord Afrega da 200 000 ani fa fin ancò. Le popolasion neoliteghe le gavea svilupà na cultura agricola e de arlevamento del bestiame. No ghe disolusion de continuità tra sta xente e le popolasion berbere che le xe autoctone almanco dal 6000 a.C. I berberi i no gavea na lengoa scrita e no ghe fonti serte par conosar el so pasà. I primi documenti scriti se cata co l’arivo de le siviltà axiateghe su le coste de l’Africa. Tra i documenti exisi ghe solo qualche nota su l’area che ora samemo Alxeria.

Storia Antiga[canbia | canbia el còdaxe]

Sito de Cartàxene

I berberi, i primi abitanti de l’Alxeria, i xe stà sempre pi spinti verso l’interno desertego da i vari popoli invasori. I feneghi i xe rivà qi in tel X secolo a.C. e i ga costruio Cartàxene e altri aprodi longo la costa. El marcà tra i berberi e i fenisi el ga continuà par secoli, ma le popolasion bebrbere le se sa catà in ne situasion de dipendensa da i invasori. Cartàxene la ga perdesto forsa co le guere puneghe e la xe stà distruta in tel 146 a.C. I berberi i xe tornà in coltrol del teritorio e i ga organisà na serie de sità stato soto la guida de on re. Dopo i fenici, i romani i xe rivà inte la xona e i ga scominsià a conquistar tuta la costa. Tuta l’area de l’Alxeria longo la costa la xera soto el control roman dal 24 d.C. I berberi i se sa oponesto a i romani, ma i no xe mia stà boni de tornar a l’indipendensa. El cristianeximo el xe rivà a l’inisio del II secolo e i berberi i xe diventà cristiani in poco tempo. Tanti de i primi misionari che ga portà el critianeximo in Eoropa i xera berberi. San Agostino, vescovo de Tagaste e scritore cristiano, el xera on berbero.

Islam[canbia | canbia el còdaxe]

Dopo el cristianeximo, el pi grando avegnimento culturale e sosale de l’Alxeria el xe stà l’arivo de l’Islam in tel VII secolo. La nova relixeon e la nova lengoa, l’arabo, el ga trasformà la società maghrebina. I primi musulmani a rivar qi i xe stà le armate de i Umayyadi, na dinastia con cavedal a Damasco. Dopo de lori, el control de la rejon el xe andà a i Abbasidi (750) che i comandava da Baghdad. I Abbasidi i ga lasà el poter a i imam Rustimidi che gavea el loro sentro a Tahirt, poco a sud de Algieri. I imam i xera considerà omeni santi e i ga dato vita a scole par studiar el Corano e le siense. I iman i no xe stà boni de organixar on esercito e i xe presto finii soto el control de i Fatimidi (909) de l’Egito. Anca i Fatimidi i ga lasà el control de la rejon a n’altra dinastia, i Xiridi – de orixene berbera – che i ga tegnesto el poter dal 972 al 1148. I Xiridi i ga aministrà mal el teritorio ma i xe riusidi a islamisar el interno del paexe. I berberi che abitava in tel Maghreb de l’ovest (la xona del Maroco moderno) i se sa organisà soto la guida de i Almoravidi e i ga scominsià l’espansion verso el nord (la Spagna) e l’est, rivando a Alxeri in tel 1106. Meso secolo dopo la xe sta la olta de i Almoahidi che i ga caturà tuto el Maghreb verso el 1176. Le guere in Spagna le ga indebolio i Almoahidi che i ga perdesto el teritorio de l’Alxeria, che el xe pasà a i Xayanidi. I Xayanidi i ga tegnesto el teritorio fin a la metà del XVI secolo, co l’impero otoman el ga vesto el soravento. Durante sti ani, la pirateria la xe diventà l’atività pi importante de la costa nord africana. I famoxi pirati Aruj e Khair ad Din, conosesto come el Barbarosa, i gavea i so porti principali in Tunisia e a Alxeri.

Otomani[canbia | canbia el còdaxe]

Soto la regensa de Khair ad Din, Alxeri la xe diventà el sentro del poter otomano in nord Africa. Par 300 ani, Alxeri la sarà la cavedal del Maghreb, governà da on pasià nominà da i Turchi. Berberi e arabi i no podea laorar in tel governo de la rejon. En tel 1671, i pirati i ga sostegnesto on leader locale che i samava dey. En tel 1710, el dey el sostituiva el pasià e el controlo otomano el xe diventà de poco conto. Dopo le guere napoleoniche, tuti i Stati eoropei i se sa mesi contro i Stati maghrebini, samadi anca Stati barbareschi. I Stati Uniti de Amerega i ga anca fato do guere (guere Barbaresche 1801-5 e 1815).

Storia moderna[canbia | canbia el còdaxe]

En tel 1827, Hussein Dey, governator de Algieri, el ga vesto na discusion co el console fransexe. La Fransa la ga rispondesto co el bloco navale de la sità par tre ani. El 5 lulio 1830, i fransexi i ga ocupà la sità e scominsià a conquistar la costa e l’interno. En tel 1848, el parlamento fransexe el ga anexo i teritori ocuà e creà i novi departementi fransexi de Alxeri, Orano e Costantine. Le tere pi bele le xe andà a i coloni fransexi e tute le tradision locali distrute. I alxerini i xera considerà de nasionalità fransexe, ma sensa i diriti de i citadini fransexi. L’ocupasion fransexe la xe durà 132 ani.

Resistensa[canbia | canbia el còdaxe]

Dopo la prima guera mondiale, vari grupi de opoxision– specailmente el Fronte de Libarasion Nasionale e el Movimento Nasionale Alxerino – i se sa oponesto a i fransexi. Tute le riforme le xera ostacolà da i coloni fransexi. I alxerini i ga sostegnesto la Fransa durante la seconda guera mondiale. En tel 1943, Ferhat Abbas, on leader de l’oposision, el ga presentà on manifesto co al richiesta de na costitusion alxerina. I fransexi i ga rispondesto co l’oferta de la citadinansa fransexe a on grupo ristreto de alxerini. La tension la xe sciopà el 8 magio 1945 co i fransexi i ga verto el fogo so i dimostranti e i ga arestà o copà quasi tuti i leader de l’opoxision. I fransexi i ga dito che i ga copà 6 000 parsone, i alxerini i dixe che i morti i xe stà pi de 50 000.

Guera de indipendensa[canbia | canbia el còdaxe]

Dal 1 novembre, 1954 al 18 marso, 1962, l’Alxeria la ga combatesto na dura e brutale guera par l’indipendensa. 2 milioni de alxerini i xe morti durante la guera e altri 3 milioni i ga dovesto vivar come sfoladi. Co i fransexi i ga firmà la paxe, pi de on milion de coloni i ga lasà el paexe e l’Alxeria al xe entrà in on periodo de violensa e de faide interne. El 3 lulio 1962 Alxeria la deventava indinpendente, e el novo governo de Ben Bella el podea finalmente laorar su la situasion interna. Ben Bella el ga naxionalisà tute le propietà de i fransexi che i xera scapai e asunto poteri sempre pi forti al governo. L’opoxision la ga domandà on ritorno a la democrasia. A la fin del 1963 la situasion la xera texa. El ministro de la difesa Houari Boumediene el ga mandà i soldadi a combatar contro i opositori. Co el presidente Ben Bella el ga provà a formar on governo de unità nasionale, i militari i xe intervegnudi.

Militari[canbia | canbia el còdaxe]

El 19 xugnio 1965, Boumediene el ga organisà on colpo de stato e Ben Bella el xe stà meso a i aresti domiciliari. El verà libarà solo in tel 1980. El novo omo forte de Alxeri el ga sospendesto el parlamento (Asemblea Naxionale) e sospendesto la Costitusion. El Consiglio de la Rivolusion, componesto da militari, el xera in controlo de l’andamento del paexe. Boumediene el savea che el no podea mia governar da solo. Lu el no gavea mia on sostegno de base e el no xera conosesto fora da i militari. Par questo el ga dovesto usar el governo col sostegno de on comitato de militari.

La nova Costittusion la xe stà aprovà in tel 1976 e do ani pi tardi Boumediene el xe morto. El novo presidente, Chadli Bendjedid, el ga laorà par el cambiamento del paexe aprovando el multipartiismo. Tra i novi partii, el Fronte de Salvesa Islamego (FIS) el xe stà quelo pi bon de caturar el sostegno de la xente, stufa de ani de militarismo. En tel 1990, el FIS el ga vinto le elesion municipali, e in tel 1991, el xera in vantagio durante le elesion nasionali.

Guera Sivile[canbia | canbia el còdaxe]

Co i militari i ga visto la vitoria iminente del FIS, i xe intervegnui. El risultà el xe stà on continuo uso de la violensa da ambo le parti. En tel 1999 la nova Costitusion la proibiva i partii relixeosi e Abdelaxix Bouteflika el xe diventà el presidente. En tel setembre 2000, el presidente el ga oferto na amnestia a tuti i combatenti de la guera sivile. La majoria la ga aderì a l’amnistia, ma la violensa no la xe sparia. En tel 2004 Bouteflika el xe stà rieleto sensa el sostegno de i militari e n’ano dopo el ga riproponesto l’amnestia. La situasion la se sa stabilixà.


Controło de autoritàLCCN (ENsh85003451 · BNE (ESXX470931 (data)
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Stòria_de_l%27Alxeria&oldid=1158701"