Storia del Niger

Da Wikipedia, l'ençiclopedia libara.
Va a: navigasion, serca
Mapa del Niger

In tenpi preistorici, el deserto del Sahara el xera na zona fertile e rica de acqua. Da i ricatamenti paleontologici se sa che 60 000 ani fa el nord del Niger el xera abità. Co la trasformasion del Sahara en on deserto e la formasion de la fassa del Sahel, le poplasioni le se sa spostà a sud o verso le coste. El teritorio del Niger el gha fato parte de vari regni: Songhai, Mali, Dendi, Gao, Kanen-Bornu e i regni de i hausa. En tel XIX secolo, i tuareg i gha formà na confederasion in aleansa co i hausa e riconquistà el teritorio hausa en man al regno de Sokoto (Nigeria).

Colonizasion[canbia | canbia sorxente]

El teritorio del Niger el xe stà asegnà a la Fransaa la Conferensa de Berlin. I Francesi i gha fato fatiga a pasificar el teritorio e formar la colonia (dal 1890 al 1922). El Niger el xera aministrà da un governatore che el vivea a Dakar, Senegal. Co la stagion de le indipendense, el Niger el xe diventà prima no stato autonomo (1958) e el 3 agosto 1960 na republica indipendente co Hamani Diori presidente.

I primi ani[canbia | canbia sorxente]

En tel 1974, dopo ani de corussion e de disastri economici, i militari i gha fato on colpo de stato. Seyni Kountché el gha preso el comando e, al a so morte en tel 1987, on comitato militare el gha guidà el paexe. El colonel Ali Saibou el gha preso el comando, libarà i prisonieri politeghi, liberalizà l’economia e scrito na nova Costitusion. I studenti e i sindacati i gha domandà el multipartitismo. Saibou el gha verto la strada par sta reforma en tel 1990. En te lo steso ano, i tuareg i gha scominsià la guerilia par conquistar i so diriti.

Democrasia[canbia | canbia sorxente]

El presidente Tandja

En tel 1991, on governo de transision el gha preso el comando par preparar la strada a le elesioni libare e al novo governo eleto en tel 1993. El proceso politego el xe andà vanti ben, co la creasion de partiti, novi giornali, cosientizasion de la zente. Manco ben la xe andà l’economia. Mahamane Ousmane el xe diventà presidente en tel 1993 ma la coalision che lo sosteneva la xe cascà on ano dopo. Ousmane el gha fato far na nova elesion parlamentare, do el so partito el gha perso. El presidente el gha dovù metar primo ministro Hama Amadou, politego oposto al so grupo politego.

En tel 1995, el governo el gha firmà i acordi de pace co i tuareg. El governo el se sa inpegnà a darghe pi atension a i tuareg, a investir pi risorse en tel nord del paexe e inserir i tuareg en tel esercito naxionale. El 27 genaro 1996, Ibrahim Baré Maïnassara el gha fato on colpo de stato par metar fine a la stasi tra presidente e parlamento. Dopo sie mexi de governo de transision, Baré el se sa presentà a le elesioni presidensiali contro 4 altri candidati. Prima he el comitato eletivo el finise de contar i voti, Baré el gha mandà via la comision e el ghe na meso una nova al so posto. Baré el xe stà proclamà el novo presidente del Niger. Baré el gha subito perso la stima internasionale e de i stesi Nigerini. El novo presidente el gha fato arestar i opositori e blocà le libartà sivili e de espresion.

En tel aprile 1999, Baré el xe stà sasinà durante el colpo de stato de Daouda Malm Wanké. Wanké el gha costituio on Consilio Naxionale de Riconciliasion che el gha scrito na nova Costitusion. En tel lulio 1999 la popolasion la gha aprovà la nova Costitusion e en tel novembre de lo steso ano la gha votà Tandja Mamadou presidente.