Storia de la Republica Democratica del Congo

Da Wikipedia, l'ençiclopedia libara.
Mapa del Congo

I primi abitanti del teritorio ancò conosudo come la Republica Democràtega del Congo i xera i pigmei. Co l’arivo de grupi bantu in tel secolo VIII de la nostra era, i pigmei i se sa ritirà inte le foreste de l’Ituri o i ga emigrà a sud.

I bantu che i xe rivà a la boca del fiume Congo i ga fondà de i regni ligà a i vilagi pi grandi. El pi inportante de sti regni el xe stà el Mbanza Congo, na sità stato che ora la se cata in tel nord de l’Angola.

El regno del Kongo

El Mbanza Congo el xe cresù (XV secolo) fin a cuerzar n’area de 300 000 km². Sto regno el xera divixo in sie province: Mbemba, Soyo, Mbamba, Mbata, Nsundi e Mpangu. I regni de Loango e Mbundu, al nord e al sud rispetivamente, i xera regni vasali. Le notisie so sti regni le xe baxà so la tradision orale. El regno del Kongo el xe durà fin al XVIII secolo. A l’interno se catava el regno de i Aziku. De le altre zone del teritorio che ancà forma el Congo no se sa niente de preciso, anca se varie etnie bantu le abitava inte le foreste del bazin del Congo fin dal XI secolo.

Eoropei[canbia | canbia el còdaxe]

Portoghexi[canbia | canbia el còdaxe]

La storia de la presensa portoghexe la xe in comune co la Republica del Congo e de l’Angola del nord. Par el tratamento de stò periodo varda Storia de la Republica del Congo.

Belgi[canbia | canbia el còdaxe]

Congolexi mutiladi da i belgi

I belgi i ga vù interesi comerciali in tel Congo fin dal XIX secolo. A la fin del secolo, francexi, portoghexi e belgi i ga discuso so le zone de influensa. I francexi i sa tolti la zona a la destra del fiume Congo. I portoghexi i ga ciapà l’enclave de Cabinda; e Leopoldo II del Belzo el ga vu na strisia de tera tra Cabinda e el confin co la colonia de l’Angola. Leopoldo el se sa espanso a l’interno, fin a formar el teritorio del Libaro Stato del Congo. Sta colonia la xera na propietà privada. Par vinzar la resistensa de la zente, Leopoldo el pagava vari caciatori de teste par ogni man che i portaa ndrio. En canbio, i eoropei i podea sfrutar le materie prime de la colonia e i pagava na tasa al re.

El 15 novenbre 1908, el re del Belzo, Leopoldo II, el xe stà costreto a pasar la propietà de la colonia al governo del so paexe. I abusi de i diriti umani i xera stà masa anca par la mentalità de superiorità de i bianchi del tenpo. El governo el ga batezà la colonia Congo Belga. El governo belga el ga modificà la maniera de controlar el paexe, ma el no ga fato masa par lo svilupo. Tuto el setor de l’educasion, par esenpio, el xera in man de i misionari catoleghi e protestanti. El Belzo no ga parmeso svilupo politego o la formasion de struture de governo locali. L’indipendensa la xe rivà in tel 1960, pi come risultato de la democratizasion de le colonie francexi e inglexi che come movimento nasionalista locale.

Indipendensa[canbia | canbia el còdaxe]

Patrice Lumumba

En tel 1958-59, na serie de proteste sivili contro i belgi i ga fato cair a i colonialisti che nol xera posìbiłe mantegnar la colonia. En tel genaro 1960, i belgi i ga dito che i saria ndà via in sie mexi. El tenpo par el pasagio de i poteri el xe stà masa curto. Basta pensar che el primo laureà del Congo el ga ciapà el dotorato in tel 1956. No ge jera congolexi boni de parar vanti la aministrasion. Le elesion del 1960 el ga portà al potere Patrice Lumumba come primo ministro e Joseph Kasavubu come presidente.

El 30 giunio 1960, el paexe el xera indipendente co el novo nome de Republica del Congo – Leopoldville, par distinguarlo da l’altro Congo a cavedal Brazzaville. Subito dopo l’indipendensa, i militari i ga fato on colpo de stato. El 11 lulio el Katanga, provincia del sud, el se sa proclamà indipendente soto la guida de Moise Tshombe. Na setimana pi tardi el Kasai, n’altra provincia, la fato la stesa selta. Le Nasion Unie le ga mandà subito 20 000 soldadi par mantegnar l’ordine. Lumumba el ga domandà a l’Union Soviètega de Nikita Khrushchev de jutarlo. En tel dicembre 1960, el colonel Joseph Desire Mobuto Sese Seko el ga fato on oclpo de stato a Kinshasa e asasinà Lumumba, co el sostegno del governo de i Stati Unii. L’esercito el ga riconquistà Katanga e Kasai. En tel 1966 el presidente Mobuto el ga canbià el nome in Zaire, dal nome de uno de i veci regni del paexe.

Zaire[canbia | canbia el còdaxe]

Mobutu Sese Seko

Dopo on periodo de tranzision, Mobuto el ga vinto le elesion del 1970 e presentà la canpagna de autentisità. Tuti i gave da verghe nome africani e i nomi eoropei i xera considerà mal. En tel 1978-79, el Katanga el se sa ribelà n’altra olta. I paracadutisti belgi i xe intervegnudi par riportar la situasion soto control.

Mobuto el xe presto diventà on ditator sensa scrupoli. El Zaire ono de i paexi pi richi de materie prime, de diamanti, oro e uranio del mondo, el xe diventà el pi poareto de l’Africa. I diriti umani i xe stà calpestà in tuti i modi e l’infrastrutura del paexe distruta. A la fin de la ocupasion coloniale, se podea girar par el Congo co la machina, l’aministrasion la garantiva che se podese ndar a na velosità de 60 km/h. A la fin de la presidensa Mobuto, no gera strade par colegar le sità del paexe. Mobuto el ga rubà quasi tuta la richeza del paexe e el xe diventà ono de i omeni pi richi del mondo.

En tel 1990, Mobuto el ga proclamà la Tersa Republica e verto la politega al multipartitismo. Dopo do ani de tira e mola, la Conferensa Nasional par la Democrasia la ga vu la so prima riunion a Kinshasa e la ga eleto el vescovo catolego de Kinsangani, Laurent Monsengwo, e el leader popolar Étienne Tshisekedi wa Mulumba come mediatori del proceso de democratizasion. Mobuto el ga risposto nominando on governo alternativo. Dopo do ani de discusioni, in tel 1994, el governo de Mobutu el xe stà miscià su co de i rapresentanti de l’oposision.. Le nove elesion le dovea esar fate in tel 1996.

Guera[canbia | canbia el còdaxe]

En tel 1996, le tension etniche del Ruanda le xe rivà anca in Zaire. I ribeli hutu de Ruanda e Burundi i xera nascosti inte i canpi de rifugiati in Zaire. Dopo on poco, sti ribeli – sostegnudi dal governo zairexe - i ga scominsià a copar i tutsi che abitava in tel Zaire. I tutsi, de suo, i copava i hutu zairexi. Pi de trezentomila persone le ga perso la vita in sto genocidio tegnù nascosto.

El grupo ribele Aleansa Democràtega par la Libarasion del Congo-Zaire el ga risevù el sostegno publico de Ruanda e Uganda, e quelo semi-segreto ma pi inportante de i Stati Unii. El cao de i ribeli, Laurent Kabila, el ga scominsià la conquista del paexe, jutà da i rilevamenti satelitari de i americani che gavea la baxe in Rwanda. En magio 1997, Mobutu el xe scampà dal Zaire e Kabila el xe entrà a Kinshasa e el ga cambià el nome del paexe in Congo.

Kabila nol xe stà bon de afrontar i problemi del paexe. Jean Pierre Bemba, cao del Movimentopar la Liberasion del Congo, el ga atacà Kabila. Angola, Zinbabwe, Namibia, Uganda, Ruanda, Ciad e Sudan i ga mandà soldadi in Congo par jutar Kabila, ma anca par profitarse de la situasion e sfrutar i giacimenti de oro e diamanti. Kabila el xe stà copà da ona de le so guardie del corpo in tel 2001. El coinvolgimento de so fiol, Joseph Kabila, nol xe mai stà provà ufisialmente.

Joseph Kabila el ga tolto el posto de so pare e el ga subito domandà a tuti de metar zo le armi. En tel 2003, I eserciti foresti i ga lasà el Cogo, co ecesion de quelo ruandexe che controla oncora na strisia de tera in tel est.

En tel 2006, la nova Costitusion la xe stà aprovà e el 30 lulio 2006 le prime elesion libare dal 1960 le ga dato la presidensa a Joseph Kabila. Bemba nol ga volù credar che el gavea perso e el ga scominsià a conbatar a Kinshasa. Le trupe de le Nasion Unie le ga dovù conbatar duramente par tor el control de la cavedal. A le elesion del otobe 2006, Kabila el ga vinto co el 70% de i voti e Bemba el se sa ritirà in tel est del paexe doe el controla na region rica de giacimenti minerali. La situazion la rimane tesa.


Controło de autoritàLCCN (ENsh85149564
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Storia_de_la_Republica_Democratica_del_Congo&oldid=1105388"