Storia del Xànbia

Da Wikipedia, l'ençiclopedia libara.
Cheło che te ghè schcià el rimanda a sta voxe, parché el xe on so sinònemo o el vien esplegà cuà drento. rimandamento da Storia de lo Zanbia
Mapa de lo Zanbia

I primi abitanti de lo Zanbia i xera grupi de caciatori-racoglitori pigmei e nomadi. Sti grupi i gavea na tecnologia poco sofisticata (età de la piera anteriore) che la xe restada invariata fin al IV secolo d.C. I primi grupi foresti a rivar in Zanbia i xe rivà in tel IV secolo. No se pol esar sicuri de l’origine de le prime migrasioni verso lo Zanbia. Se sa che i xera agricoltori e che i ga portà la cultura del fero e del rame. I ricatamenti archeologici i ga fato vegnar su tochi de armi e teracota. I primi abitanti i xe stà o asimiladi o parà via.

CO l’arivo de altri grupi bantu, la popolasion la xe cresuda. En tel XII secolo ge xe segni de comercio co popolasioni distanti, de pi grande sfrutamento de le miniere de rame e de l’uso de crozi de rame come moneda.

I regni[canbia | canbia el còdaxe]

Verso el XVI secolo se vede la nasita de regni ma anca de migrasioni interne. Se conose la presensa de quatro regni: Kazembe-Lunda in tel nord, rente del fiume Luapula; Bemba in tel nord-est; Lozi inte l’ovest, rente de l’alto corso del Zanbesi; Chewa inte l’est. No ghe documentasion scrita so sti regni. Se sa che i primi visitatori esterni i xe stà marcanti arabi, che i no i ga lasà descrisioni de sorta.

I primi eoropei a rivar inte la region i xe stà i portoghexi. Manoel Caetano Pereira, on portoghexe de Goa, el ga fato on viagio inte la region in tel 1796, ma el xe morto dopo do setimane dal so arivo in tel regno del Mwata Kazembe. Pereira el ga lasà on diario che el xe stà portà ndrio da i so conpagni de viagio. Do ani pi tardi Francisco Jos Maria de Lacerda, esplorator del Portogalo, el ga seguio la stesa strada. I portoghexi i ga sercà varie olte de catar na strada che colegase el Mozanbico co l’Angola, ma i no i ga mai fato de i tentativi seri.

En tel 1851, David Livingstone el ga esplorà l’alto corso del Zanbesi. En tel 1855 el xe rivà a Mosi oa Tunya, le cascata che lu le ga ciamà Cascate Vitoria in onor de la regina Vitoria de Inghiltera. La sità costruia rente de le cascate da la parte zanbiana la se ciama Livingstone in so memoria. Co i eoropei i xe rivà in Zanbia, i regni pi inportanti i xera quei de Mwata Kazembe, longo el fiume Luapula, e el Barotseland de la popolasion lozi, longo el fiume Zanbesi. El re de i lozi el gavea do cavedali: Lealui, par la stagion seca, e Limulunga, par la stagion de la piova.

En tel principio del XIX secolo, i makololo – on clan de i sotho – el xe scanpà da la difaqane causada da Shaka Zulu e i ga tolto el potere a la nobiltà lozi. Sebitwane, el cao de i makololo, el xe diventà el novo re de Barotseland. A la so morte, in tel 1851, so fiola Mamochisane la xe diventà regina. Mamochisane la ga lasà el potere a so fradel Sekeletu in tel 1852 o 1853. Ala morte de Sekeletu in tel 1863 la popolasion lozi la se sa reoltà contro i makololo e i ga copà tuti i nobili. El resto de i makololo i ga dovù ndar in bando in Malawi.

La colonia[canbia | canbia el còdaxe]

Cecil Rhodes.

En tel 1888, Cecil Rhodes el ga fato n’operasion de convincimento de i cai locali par verghe el dirito a sfrutar le richeze minerarie de la region. A lo steso tenpo, i inglexi i ga proclamà la region na zona de so influensa. L’aministrasion del teritorio la xe stà dada a Rhodes e la so Conpania Britanica del Sudafrica. I inglexi i no gavea intension de svilupar la colonia e i usava el teritorio come na riserva do catar lavoratori a baso costo.

En tel 1923, el governo del Regno Unio nol ga rinovà el contrato co la Conpania Britanica del Sudafrica e el ga anexo i teritori la Rhodesia del Sud e del Nord (nomina in memoria de Rhodes a la so morte in tel 1902) che i xe poi diventà Zinbabwe e Zanbia. La cavedal del la Rhodesia del Nord la xe stà mesa a Livingstone, e poi a Lusaka in tel 1935.

En tel 1928, i ricercatori i ga catà riserve imense de rame. Za in tel 1938 lo Zanbia el produsea el 13% del rame mondiale. I operai che i lavoraa inte le miniere i ga protestà in tel 1935 contro le condisioni de laoro. El sioparo de la Copperbelt el xe stà ono de i primi tentativi de i africani de le colonie inglexi de verghe de i diriti sociali.

En tel 1953, le do Rhodesia e el Nyasaland (ancò Malawi) le xe stà unie par formar la Federasion de Rhodesia e Nyasaland. La federasion la xe stà disolta in tel 1963 e la Republica de lo Zanbia proclamà el 24 otobre 1964.

Primi pasi[canbia | canbia el còdaxe]

Nonostante le richeze minerarie, i primi ani de lo Zanbia indipendente i xe stà dificili. I zanbiani co la conpetensa de mandar anti el governo e le industrie i xera pochi. El presidente Kenneth Kaunda el ga selto el socialismo e el partio unico. El governo el volea portar el paexe a l’autosuficensa alimentare. Le inportasioni le xera pagà co el rame. Fin a i ani 70 l’economia la ga tegnù. Dal 1975 al 1990, l’economia la ga perso pi del 30% del so valor, anca parché el valor del rame – major esportasion zanbiana – el xe ndà zo a livelo mondiale.

A livel de raporti internasionali, el Zanbia el ga sostegnù i vari movimenti de indipendensa de la region. En modo particolare, lo Zanbia el ga dato spazi al Congreso Nasional Africano che el conbatea contro l’apartheid in Sudafrica. Kaunda el xe anca stà el presidente del Movimento de i Non Alineati dal 1970 al 1973.

Democrasia[canbia | canbia el còdaxe]

En te i ani 80 lo Zanbia el ga visto proteste popolari e de i lavoratori. En tel 1991 el presidente el sa incorto che se dovea canbiar la strutura politega del paexe. A le elesioni del 1991 – le prime co on sistema de multipartiismo dopo l’indipendensa – el politego de l’opozision Frederick Chiluba el ga vinto la corsa presidensiale. El so partio el ga vinto la magioransa in tel parlamento.

Chiluba el ga privatizà le industrie, liberalisà l’economia e rimoso i susidi che tegnea baso el costo del fromenton, cibo de baxe de i zanbiani. Chiluba el ga governà come on ditator e no ga dato spasio a le oposisioni. En tel 1997, on grupo de militari i ga tentà el colpo de Stato par metar fin al governo de Chiluba. El colpo el xe falio e el governo el ga fato arestar i colpevoli, ma anca i opositori che no gavea fato niente. Tra questi l’ex presidente Kaunda. Chiluba el ga provà a far canbiar la Costitusion par presentarse na terza olta a le elesioni, ma el so steso partio el ga rifiutà.

El novo presidente Levy Mwanawasa lo ga acusà de corusion e de verghe robà i schei de lo Stato. Chiluba el xe stà condanà par verghe robà schei de la nasion da on tribunale inglexe e el xe soto proceso in Zanbia. So mojer la xe a i aresti par verghe robà e conprà roba rubada. Soto la guida de Mwanawasa, el paexe el stà guadagnando tereno, specialmente in tel canpo agricolo. Da inportator de prodoti agricoli, lo Zanbia el xe diventà esportator e el xe stà bon de jutare la Tanzania in tel 2003 co i tanzaniani i ga vù problemi de produsion alimentare.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Storia_del_Xànbia&oldid=1037135"