Storia del Maroco

Da Wikipedia, l'ençiclopedia libara.
Mapa del Maroco

antes 1975

La 'storia del Maroco la scominsia co el neolitico. I ricatamenti paleontologici i dixe che i primi abitanti del Maroco i xe rivà qi da est e che i fasea parte de la cultura capsiana, nome che vien da quel de Capsia (ancò Gapsia) na sità in Tunisia.

Preistoria[canbia | canbia el còdaxe]

10.000 ani fa el Maroco el xera diverso da ancò. Le tere le xera meno aride e do ancò se cata el deserto alora ghera la savana co albari e corsi d’acqua. El xe in sto teritorio che se cata segni de la cultura capsiana. I berberi, popolasion comun a tuto el Maghreb, i xe rivà ntorno al 2.000 a.C. I berberi i ga dato el nome al Maroco, Mur Akush vol dir La tera de Dio e el xera el nome de de Marrakech, e da qi deriva el nome del paexe.Popolasion iberiche e axiàteghe le se rivà so le coste a lo steso tenpo.

Ligà al Mediteraneo[canbia | canbia el còdaxe]

Marcanti fenici i ga costruio aprodi e depositi longo la costa setentrionle marochina za inte el XII secolo a.C. Chella, Lixus e Mogador le xera le colonie pi grandi. Le colonie fenice le xe finie soto el control de Cartàxene verso el V secolo a.C. Verso el II secolo a.C. le popolasion berbere le se sa organizà in regni che controlava l’interno del nord Africa, de frecuente soto el control de Cartàxene o de Roma. Tuto el Maroco el xe finio rentro a l’impero romano in tel 40 a.C. I romani i controlava solo che la costa e i ghe lasà el control de l’interno a le tribù berbere che le pagava le tase a Roma. Co la caduta de l’inpero romano, la region la xe pasà soto el controlo de i vandali (V secolo d.C.), de i visigoti e poi de i bizantini.

I misionari cristiani i xe rivà qi in tel II secolo d.C. e i ga convertì la popolasion. Tanti misionari de la Mauretania, come el nord del Maroco el xera conosù alora, i xe vegnudi in Eoropa par predicar el vangelo. Tra questi San Zen e San Valentino. En te i primi secoli de la nostra era varie comunità de ebrei le vivea in tel nord del Maroco.

Islam[canbia | canbia el còdaxe]

La tore de Hassan

Le invasion arabe le xe rivà in Maroco in tel VII secolo e i berberi i xe stà convertidi co la forsa, ma i no xe riusidi a far canbiar le tradisioni. I berberi i ga de frecuente rivestì de Islam i loro costumi e cultura, el xera on modo de resistar a i opresori arabi.

Regno Almoravide

En tel 788, Idris ibn Abdallah el ga fondà la dinastia Idrisica, e el ga portà el Maroco a esar on sentro de cultura e potere. La regina Saida Zahira la ga espanso el so regno da la region de l’Atlas fin a tor el posto de i Idrisidi in tel X secolo. En te i secoli XI e XII, le dinastie berbere Almoravide, Almohade e Marinide le ga controlà el Maghreb e l’Andalusia (Spagna). Ste dinastie no le xe sta boen de darghe unità a la popolasion. La dinastia Saadi la ga governà sul Maroco dal 1511 al 1659, seguida da la dinastia Alauita, che la ga governà fin a i tenpi moderni.

Alauiti[canbia | canbia el còdaxe]

Dopo verghe conquistà la cavedal Fes, i Alauiti i ga conquistà Marrakech e portà on senso de unit al paexe. Anca se a i inisi el regno el xera pi picolo del Maroco de ancò, i Alauiti i xe stà boni de conquistar novi teritori col pasar de i ani. Co el tenpo, i Alauiti i ga perso autorità, ma i xe riusidi a mantegnar l’indipendensa, in on periodo co tuti i paexi visini i xe cascà soto l’influensa otomana o de le potense eoropee.

Artilieria francexe a Rabat in tel 1911

I inglexi i ga riconosù a la Fransa el dirito de interesarse al Maroco. La Germania la ga obietà. Co el tratato de Algericas del 1906, le potense eoropee le ghe dava a Spagna e Fransa el mandato de interesarse del Maroco. I todeschi i ga creà na seconda crisi in tel 1911 e el tratato de Fes (1912) el sa risolto col trasformar el Maroco in on protetorato francexe. El tratato el ghe dava a la Spagna el control de serte rregioni. El sultano el regnava ma no podea governar. La Fransa la ga svilupà el setore minerario e agricolo.

Lota par la libartà[canbia | canbia el còdaxe]

I separatisti de la region del Rif i ga proclamà la repùblega el 18 setenbre 1921. Le armate francexe e spagnola le ga atacà el Rif e meso fin a la repùblega el 27 magio 1926. On grupo de naxionalisti i ga fondà el Comitato d’Axion Marochino (CAM) in tel dicembre 1934. El CAM fasea presion so i francexi usando i mass mèdia e el dialogo. Sta tàtega no la ga funsionà. El CAM el se sa divixo in do, co on grupo che ga formà on partio nasionalista subito sopreso da i francexi. Altri grupi nasionalisti i ga provà a far presion so i francexi.

Dopo la seconda guera mondiale, el Partio Istiqlal (de l’Indipendensa) el ga domandà l’indipendensa del Maroco. La richiesta la xera sostegnuda anca dal sultano. L’oposision francexe a qualsiasi canbio la ga diviso oncora piassé i nasionalsiti da i coloi de origine francexe.

En tel dicenbre 1952 la morte violenta de on lavorator tunixino la ga fato scopiar de i tumulti. I francexi i ga subito sopreso el partio comunista e el Istiqlal. I tumulti i ga continuà e i francexi i ga mandà el sultan, Mohammed V, in bando in Madagascar, metendo al so posto Mohammed ben Aarafa. La popolasion la considerava ben Aarafa ilegitimo ela ga protestà oncora pi forte. I francexi i ga dovù portar el sultan ndrio e scominsiar el dialogo par rivar a l’indipendensa.

Indipendensa[canbia | canbia el còdaxe]

Tonba de Mohammed V a Rabat

El sultan Mohammed V el xe stà bon de negosiar el pasagio a l’indipendensa sensa crear strapi par i do paexi. El ga anca dato la posibilità a I grupi de oposision de participar a la vita politega del paexe trasformando el sultananto in ona monarchia parlamentare. L’indipendensa la xe rivà el 7 aprile 1956. La Spagna la ga restituido la so parte de Maroco in tel 1958, ma la tegnù el controlo de Ceuta, Melilla e altre aree che le xera spagnole anca prima del tratato de Fes.

Hassan II[canbia | canbia el còdaxe]

El 3 marso 1961, Hassan II el xe diventà re del Maroco. Hassan el ga subito mostrà de esar on re totalitario, sensa rispeto par le oposision o el dirito de la persona. El se sa nominà primo ministro e el ga scrito na nova Costitusion, aprovada in tel dicenbre 1962. Dal 1965 al 1970, el re el sa tolto el control de tuti i poteri, legislativo giudisiario e de la sicuresa interna. El mancà ritorno a la piena democrasia el ga portà a do tentativi de colpo de Stato in tel 1972 e 1973. El re el xe morto el 23 lulio 1999.

Mohammed VI[canbia | canbia el còdaxe]

Re Mohammed VI

Dopo poche ore da la morte de so pare, Mohammed VI el xe stà incoronà re del Maroco. El ga subito vù na fama de modernisator. Dopo pochi dì el ga parlà a la television prometendo la lota a la corusion e de laorar par lo svilupo. El ga anca promeso de mejorar el rispeto de le libartà siviche. En tel 2004 el ga promoso de le legi che ghe da a le done pi libartà.

El Sahara Osidentale[canbia | canbia el còdaxe]

Search ballonicon2.svg Par savèrghene de pì, vardarse ła voxe Storia del Sahara Ocidentale.

Co la Spagna la se sa ritirà dal Sahara Ocidental in tel 1975, Maroco e Mauritania le ga ocupà el teritorio, contro el voler de i abitanti. I residenti del Sahara Ocidental i ga organizà el Fronte Polixario par conbatar par l’indipendensa. La Mauritania la ga dovù lasar el Sahara Ocidental dopo verghe perso i scontri direti co i guerilieri del Polixario. El Maroco insiste che el teritorio del Sahara Ocidentale el xe suo de dirito. Par difendarse da i atachi de i guerilieri, el Maroco el ga costruio miliari de km de mura par difendar la so zona de influensa.

Controło de autoritàLCCN (ENsh85087328 · BNE (ESXX466868 (data)
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Storia_del_Maroco&oldid=1054274"