Storia del Senegal

Da Wikipedia, l'ençiclopedia libara.
Mapa del Senegal del 1770
Mapa del Senegal de ancò

La Storia del Senegal la scominsia co i primi resoconti scriti co l’arivo de i berberi in tel XII secolo d.C. Ma fin da i tenpi preistorici el Senegal elxe stà abità. Da i ricatamenti fati da i paleontologi se sa che el teritorio del Seneganbia el xera abità za in tel paleolitico inferior. I ricatamenti pi inportanti i xe stà fati inte la region costiera de Cap Vert. A Rufisque, rente de la cavedal Dakar, i acheologi i ga catà asce, rasoi e altri utensili fati de piera. Altri ricatamenti inportanti i xe stà fati rente de Rosso, longo e fiume Senegal, in tel nord del paexe.

Preistoria[canbia | canbia el còdaxe]

Co l’arivo del enolitico se vede l’aparision de la seramica. I ricatamenti parla de culture dedite a la pesca longo la costa ma anca de popoli marcanti che i baratava i prodoti de l’interno. Del periodo neolitico i xe i megaliti che se cata in tel sud del paexe, inte la region a caval co el Ganbia. Varie popolasion le se sa svilupà in tel delta del fiume Ganbia. I megaliti i se cata inte na region de 250 km par 100 km. Costrusion simili le se cato solo che in the la Republica Sentrafricana, a miliari de km de distansa.

Megaliti preistorici ga Wassu, ancò in Ganbia.

La tecnologia de i metali, età del fero, la xe rivà co le popolasion che le abitava el Sahara le se sa spostà co la desertificasion de la region (I milenio a.C.).

I regni[canbia | canbia el còdaxe]

El primo regno che se conose el xe quel de i trekour. Tuti i regni che i se sa formà in Senegal i xera regni picoleti, vasali del regno del Ghana. Dopo del el regno del Ghana, anca el regno del Mali el ga esteso la so influensa so la region. En tel XII secolo, marcanti arabi e berberi i xe rivà fin in tel Senegal par baratar marcansia, ma anca par la trata de i sciavi. L’Islam el xe stà portà da sti marcanti.

Colonizasion[canbia | canbia el còdaxe]

Monumento a i s-ciavi so l’ixola de Gorée

Co el XV secolo, le potense marinare eoropee le ga scominzià a vegnar so le coste del Senegal. Par primi i portoghexi, che i ga anca meso de le baxi longo la costa. El vilagio de Rufisque, par esenpio, el ciapa el nome da Rio Frisco, fiume de acque fresche, che portoghexi i ga dato. La architetura de la costa la testimonia l’influensa portoghexe. El Sengal el xe presto diventà on grande serbatoi de s-ciavi che i vegnea portadi in Brazil, e verso i Stati Unii pi tardi.

Saint-Louis in tel 1780

A Gorée, n’ixola poco distante de Dakar, se pol visitar el forte olandexe. La porta che la varda verso l’Oceano Atlantego la xe ciamà porta del non ritorno. Anca se i studi fati senbra metar in question che el forte fuse veramente on centro de smistamento de i sciavi, che la zona de Dakar la fuse on sentro inportante par la trata el xe fora discusion.

Dopo de i portoghexi, olandexi, francexi, e inglexi i mete de le baxi so la costa. I francexi i ga fondà Saint Louis in tel 1659. La sità la sarà la prima cavedal del teritorio. La trata de i s-ciavi la ga dato on novo inpulso a le guere interetniche. L’Islam el xe penetrà on poco a la olta. En tel 1770 tute le grandi etnie senegalexi le xera islamiche. En tel 1850, Oumar Tall el ga organizà on regno islamico che da Timbuctù el rivava fin al Sengal. Tall el xe stà batù da la Fransa in tel 1864. I francexi – che i gavea mandà on governator in tel 1854 – i ga continuà l’espancion fin a covrir tuto el teritorio del Sengal moderno e meso le basi par l’Africa Ocidentale Francexe. El governator Louis Léon César Faidherbe (1854 – 1861, e 1863 – 1865) el ga laorà par la prosperità de la colonia e el rispeto de le etnie locali. No tuti i governatori i xe stà compagni. A la Conferensa de Berlin, la Fransa la sa visto riconosar el dirito de torse el Senegal, co el Regno Unio che se vedea dar el Ganbia.

Verso l’indipendensa[canbia | canbia el còdaxe]

La federasion del Mali

En tel 1902 Dakar la xe diventà la cavedal de la colonia francexe in Africa de l’ovest. Dopo la seconda guera mondiale, le colonie francexi le ga conosù on veloce movimento verso l’indipendensa. En tel genaro 1959, el Sudan Francexe (Mali de ancò) e el Senegal i xe stà mesi insieme par formar la Federasion del Mali. La federasion la durarà solo fin al agosto 1960, co i do stati i se sa proclamà indipendenti. Léopold Senghor, leterato menbro de l’Academia de Fransa e catolego, el xe stà eleto primo presidente.

En tel 1962, Senghor el xe sopravisù a on colo de stato. Senghor el se sa ritirà in tel 1981, pasando el poter a Abdou Diouf. Senegal e Ganbia i ga formà na federasion in tel 1982 che la xe durà fin al 1989. Dal 1982, on grupo separatista el conbate par l’autodertiminasion de la Casamance, na region tra el Ganbia e la Guinea Bissau. El 30 disenbre 2004, el ministro de i Interni, Ousmane Ngom, e padre Augustin Dinacoune Senghor, cao de la ribelion, i ga firmà on acordo de cesate el fogo. En tel 1990-91 ghe stà na breve guera de confin co la Mauritania, specialmente ne la zona de Rosso. Diouf el ga governà par quatro legislature e ga promoso l’economia. Inte el 2000, Abdoulaye Wade, cao de l’oposision, el xe divantà el terzo presidente del Senegal.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Storia_del_Senegal&oldid=1058081"