Storia del Malawi

Da Wikipedia, l'ençiclopedia libara.
Mapa del Malawi

Longo le rive del Lago Malawi, i paleontologhi i ga catà i osi de ominidi che i ga visù li 50 – 60 000 ai fa. Ricatamenti in tel nord del paexe i fa pensar che 10 000 an fa zente simile a quela de Corno d'Africa i vivea anca qi. A Chencherere e Mphunzi, rente de Lilongwe, i paleontoghi i ga catà de i osi de pigmei che i xe ricordà co i nomi de batwa e akufula. Ste etnie le vivea in Malawi in tel 1.500 a.C. e legha lasà varie piture so le rocie in tel sentro del paexe.

Regno Maravi[canbia | canbia el còdaxe]

Co le popolasion bantu le ga scominsià la migrasion che le ga portà in tuta l’Africa, on grupo de lavoradori del fero i xe rivà e Malawi e i ga fondà on regno. Stà etnia la xe ricordà co el nome de maravi, che vorea dir ragi de luze. Se pensa che el nome Malawi el vegna da maravi. Co el tempo, e grasie a altre migrasion bantu, i maravi i ga dato vita a i chewa, che ancò i xe l’etnia pi grosa del Malawi. I maravi prima, e i chewa, dopo, i ga sterminà le popolasion batwa e akafula. El regno maravi el cuerzea el Malawi de ancò e aree del Mozanbico e de lo Zanbia. La cavedal del regno la se catava a Mankhamba e le re, el Kalonga, el vivea la e controlava el regno co i so cai. La guera co i marcanti de i sciavi la ga fato perdar el potere al kalonga in tel XVIII secolo.

Contati co i foresti[canbia | canbia el còdaxe]

El regno de i maravi el gavea on contato costante co la costa de nord del Mozanbico. Avorio, oro e s-ciavi el vegnea vendù a i marcanti arabi e, pi tardi, a i portoghexi. I portoghexi i ga portà el formenton che el xe diventà popolare in tuta la zona e el ga preso el posto del sorgho.

I ngoni[canbia | canbia el còdaxe]

Durante el periodo de la mfecane, grupi de popolasion ngoni le xe rivà in Malawi. El regno de i maravi el xera za in crisi par le guere contro i marcanti de i s-ciavi e nol ga podesto difendarse da i ngoni. I ngoni i ga caturà el sud del paexe i ga continuà a far guera co i chewa par tore s-ciavi e el magnare.

I yao[canbia | canbia el còdaxe]

A lo steso tenpo de i ngoni, i yao i xe rivà in Malawi dal Mozanbico. I yao i scapava da l’avansata de i macua. I yao i gavea i fusili e i ga subito atacà i ngoni e i chewa par caturar sciavi. I yao i xera musulmani ei i se sa stabilio longo le rive del lago Malawi, ne la zona de Mangochi.

I shirazi[canbia | canbia el còdaxe]

I arabi de la costa, i shirazi, de cultura swahili, i ga senpre fato marcà de sciavi. En tel XVIII secolo i controlava le trate che da la costa del Kenya e de la Tanzania le entrave fin a la region de i Grandi Laghi. En Malawi, i marcanti shirazi i gavea vari fortini. El pi grande el xera quel de Nkhotakota, fondà in tel 1840, e controlà da i marcanti de Zanzibar. Da 15 a 20 000 scaivi a l’ano i pasava de la.

Eoropei[canbia | canbia el còdaxe]

Anca se i primi contati i xe stà fati da i portoghexi, questi i no ga mai tentà de controlar la region. El primo eoropeo che el ga lasà el segno inte la storia del Malawi moderno el xe stà David Livingstone. Livingstone el xe rivà so le rive del lago Malawi in tel 1859. Co Livingstone, la strada la se sa verto a i misionari de la cexa anglicana scozexe e al governo del Regno Unio, che el ga proclamà el protetorato de l’Africa Sentrale, pi tardi del Nyasaland, in tel 1891.

Indipendensa[canbia | canbia el còdaxe]

I malawiani i ga tentà varie olte de rivar a l’indipendensa, i politeghi locali i ga fondà el Congreso Africano del Nyasaland (Nyasaland African Congress – NAC) in tel 1953. Ne lo steso ano, i inglexi i ga meso el Malawi ne la stesa aministrasion de la Rhodesia (ancò Zinbabue e Zanbia) par formar la Federasion de la Rhodesia e del Nyasaland. En tel lulio 1958, el naxionalista Hastings Kamuzu Banda el xe tornà in Malawi dopo esar ndà a l’estero par studiar medisina e in Ghana par vedar i primi pasi de l’indipendensa de quel paexe. Banda el ga subito tolto el comando del NAC. En tel 1959 el xe stà meso in prison a Gwelu (ancò Gweru) ma el xe stà libarà in tel 1960 par participar a la conferensa costitusionale del 1960 a Londra.

Tornà in Malawi, Banda el ga trasformà el NAC inte on partio, el Malawi Congress Party – Partio del Congreso Malawiano, MCP. El 15 aprile 1961 el MCP el ga vinto le prime elesion legislative e spinto par l’aministrasion autonoma del paexe. La federasion la xe stà abolia in tel 1963 e Banda el ga ocupà el posto de primo ministro del Malawi. Co l’indipendensa el 6 lulio 1964, Banda el xe diventà presidente e, in tel 1971, el parlamento lo ga proclamà presidente a vita.

L’Aquila[canbia | canbia el còdaxe]

Banda el xe diventà subito on ditatore e el ga meso su on sistema par controlar el paexe. I zoeni ativisti del MCP i gavea el control del teritorio. Dal sistema politego del regno maravi Banda el ga tolto el sistema de i cai, co i quali el tegnea soto controlo i contadini. El partio unico el ga scominsià na campania de glorificasion del presidente che el vegnea ciamà Ngwazi, l’aquila, e Kamuzo, l’eterno. Tute le nove costrusion le portava el so nome. Banda nol ga mai usà la violensa diretamente. Co el se sa sentì meso in pericolo dal movimento par la democrasia, el no ga esità a ordinar de le stragi.

Soto Banda, el Malawi el xe diventà on paexe sotomeso. Tuto el xera controlà dal governo: da la longhesa de i cavei, al vestito de le done. Le Cexe no le podea parlar libaramente e serti grupi religioxi (Testimoni de Geova par esempio) i xera vietai. La censura la controlava i media, ma anca le telefonate private. Tuti quei che i entrava o usiva dal Malawi i vegnea controlà.

Democrasia[canbia | canbia el còdaxe]

Dopo na forte reasion popolare e de la Cexa Catolega, Banda el ga parmeso el referendum par vedar se la zente la volea el multipartiismo. El 14 giunio 1993 i malawiani i ga votà par la democrasia. A le prime elesion libare in tel 1994, el Fronte Democràtego Unio de Bakili Muluzi el ga vinto la magioransa e el se sa unio co l’Aleansa par la Democrasia par formar on governo. Muluzi el ga fato scrivar na nova Costitusion par canbiar i diriti del vecio partio unico, verzar fora el paexe al rsto delmodo e rinovar l’economia. Muluzi el xe stà rieleto par on secondo mandà. El ga tentà de far canbiar la Costitusion par esare eleto na tersa olta, ma el no ga podesto.

En tel 2004, Bingu wa Mutharika el xe stà eleto presidente. La so campania anti corusion lo ga portà a lasar el so partio, el Fronte Democràtego Unio e governar co elsostegno de parlamentari de l’oposision. El paexe el ga mejorà la so situasion finansiaria, ma el rimane ono de i pi poveri de l’Africa.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Storia_del_Malawi&oldid=1103657"