Àfrica

Àfrica

Sorte	Continente, pozision e rejon zeogràfega
Parte de	Ostfeste, Tera, Eorafràzia e Afro-Asia (en)
Rejon zeogràfega	Emisfero nord e emisfero sud
Posto
Rente a	Eoràzia Àzia
Formà da	Nordàfrica Àfrica Austrałe Africa Osidentałe Africa sentrałe Africa Orientałe
Dati e sifre
Ponto pì baso	Dancalia (it)  (−135 m )
Ponto pì alto	Kibo  (5 895 m )
Àrea	30 271 000 km²

L'Africa ła xe el secondo continente par estension e popołasion (dopo l'Axia). Ła só superfisie, pari a 30 065 000 km², ła xe el 20,3% de łe tere emerse del pianeta, i soi abitanti (oltre 800 000 000) i costituise un sètimo de ła popolasion mundiałe. L'Africa ła xe dełimità a nord dal Mar Mediteraneo, a òvest da l'Oceano Atlantico, a Sud da l'Oceano Antartego e a est da l'Oceano Indiàn. A nord-est ła xe separà da l'Axia dal Canałe de Suez che l'è artifiçiałe. Ła xe traversà da l'Equator e caraterizà da na gran varietà de climi.

Miłioni de ani fa, ła gera tuto un bloco de tera insieme col Sud-Amèrica e pian pian łe sa ga divixo co l'Atlàntego in mezo.

Al dì de ancó ła xe divixa pułitegamente in 54 stati menbri de łe Nasion Unìe, 1 stato co ricognosimento parsial, 1 stato no ricognosuo da nisun ma de facto indipendente, e vari teritori dipendenti.

Zeografia fixica

El continente africano ga n'andamento nord sud. El xe de forma pi o meno triangolare co la parte setentrionale pi larga de quela australe. Al nord se cata el Mar Mediteraneo, a est el Mar Roso e l'Osèano Indian, a ovest l'Oceano Atlantico. L'Africa l'è separà da l'Eoropa da lo Streto de Gibiltera e dal Canal de Sicilia; l'è unia a l'Axia da la penìzoła del Sinai.

El punto pi a nord xe Ras ben Sakka, in Tunisia, el punto pi a sud xe Cape Agulhas in Sudafrica, co na distansa de 8 000 km. El punto pi a ovest xe le Isole de Cao Verde e quelo pi a est Ras Hafun in Somalia, co na distanza de 7 400 km. Lo Stato pi grande xe l'Algeria, e el pi pecenin le Seychelles.

L'atitudine mèdia del continente xe de 600 metri sul livel del mar. Grosomodo, el nord del continente xe baso e pianegiante, mentre al sud se cata i altipiani. Le montagne pi alte xe el Kilimanjaro (5895 m), el Kenya (5199 m ), el Ruenzori (5110 m). Questi xe monti che confina co la Rift Valley e xe de origine vulcanica. El monte Camerun (4070 m) xe l'unica alta montagna lontana da la Rift Valley.

En tel nord se cata el deserto del Sahara, el pi grande del mondo (9 000 000 km²). El Sahara el xe pianegiante, ma ghe anca de le catene de montagne. Importante xe la catena de l'Atlante, che separa el deserto da la costa marochina a ovest. A sud del Sahara ghe na fasia semi-desertica ciamada Sahel.

Se se guarda a l'area del continente, l'Africa ga na costa curta. L'Eoropa, co manco de on terzo de l'area, ga 32 000 km de costa. L'Africa ga solo 26 000 km longo el mar. Se trata par lo pi de coste lineari, sensa insenature profonde. I unici do golfi importanti xe quelo de la Sirte (Libia) e quel de Guinea (dal Ghana al Gabon). Tuti e do golfi larghi.

Le coste xe pianegianti al nord, longo el Mar Mediteraneo, e in Somalia, Namibia e Mauritania. Longo el Golfo de Guinea e in Mozanbico - ma anca in certe aree de la Tanzania e del Kenya - ghe coste base cuerte da mangrovie. El resto de la costa l'è generalmente alta co dirupi e montagne che le finise diretamente inte el mar. El Madagascar xe l'unica ìzoła de grandi dimensioni. Le altre ìzołe, iè picole e de frecuente le forma arcipelaghi rente de la costa.

Le aque

In Àfrica ghe xe vaste zone dexerteghe sensa aque superficali - deserti del Sahara, Namib, Kalahari. Ghe xe de łe zone do i fiumi i finise inte el deserto o in łaghi interni (l'Okavango del Botswana finise inte el deserto, i fiumi rente del Lago Ciad i se buta inte el lago, lontan dal mar, e l'Omo se buta inte el Lago Turkana). En tuta la zona central del continente se cata fiumi che riva al mar. En el Oceano Atlantico se buta el Nizer, el Volta, el Congo e altri piassè pecenini. Ne l'Oceano Indiano se buta el Zanbesi. El fiume pi imporante xe parò el Nilo, che xe el pi longo del mondo (6 671 km). El Nilo nase dal Lago Vittoria, ance se ghe zente che vede in tel fiume Kagera el primo ramo del Nilo. El Nilo che nase in Uganda l'è ciamà Bianco, par distinguarlo dal Nilo Azuro che vien zò da i altipiani de l'Etiopia e se unise al Bianco a Khartum, la cavedal del Sudan. Dopo verghe traversà Uganda, Sud Sudan, Sudan e Egito, el Nilo se buta inte el Mar Mediteraneo co on grande delta. Longo la Rift Valley, la pi longa vale de la Tera, ghe tanti laghi. I pi importanti xe el Vitoria, el Tanganica, el Turkana, el Malawi.

Clima

El clima xe generalmente caldo, anca se ghe grandi variaxioni e zone frede. El nord ga on clima mediteraneo, co grose escursion termiche dal di a la note. Inte el Sahel ghe ponte masime manco forti, co inverni miti. Ne la zona tropicale, ghe on clima caldo longo le coste e ne le zone soto i 1000 metri. I altipiani de l'Africa Orientale xe temperati, e i inverni (lulio - setembre) xe fredi co temperature soto lo zero. El Madagascar ga on clima tropicale, mentre el Sudafrica varia da caldo al nord e so la costa orientale, a fredo su i altipiani e la costa del Cao.

Ecosistemi

L'Africa ga na granda varietà de ecosistemi. Se pasa dal deserto (Sahara, Kalahari) a le foreste (del Congo, del Gabon, del Madagascar), a le savane semidesertiche del Sahel, a quele de l'Africa Orientale. L'alta montagna se cata in Etiopia e in Kenya. Tipicamente mediteranee xe le coste del Maghreb ma anca la zona costiera de la rejon del Cao, in Sudafrica.

Fauna

I animali de l'Africa iè conosudi in tuto el mondo. I pi famoxi xe i felidi – leon, lionpardo, ghepardo. Ma ghe anca i canidi – licaon e siacali. Difuse in tute le foreste xe le simie – simpazè, gorila. Ne le savane se cata elefanti (ma ghe anca elefanti de la foresta), girafe, rinoceronti, e i grandi bovini – bufali, gnu – sensa desmentagarse de antilopi e gazele. Le acue xe popolà da cocodrili, ipopotami e pexi de tute le speci. I mari ga na granda varietà de pesi, corali, crostacei e altre forme viventi. Particolarmente bele xe le bariere coraline de l’Osèano Indian.

I pi importanti parchi nasionali che serva a protezar la natura xe: Tsavo, Maasai Mara (Kenya), Serengeti (Tanzania), Kruger (Sudafrica, Mozanbico e Zimbabue), Chobe e l’Okavango(Botswana).

Regioni

Regioni de l'Africa

L'Africa la xe stà divisa in cinque rejoni, come inte la cartina qua a sinistra:

•      Nord Africa

•      Africa Orientale

•      Africa Australe

•      Africa Centrale

•      Africa Ocidentale

Questa la xe la division adotà da le Nasion Unie par i loro studi de statistega. No la xe na division che rispeta le culture, la ziografia o la storia dei popoli.

Altre rejoni africane le xe:

• i Grandi Laghi de l'Africa
• el Deserto del Sahara
• el Sahel
• el Maghreb
• el Corno d'Africa
• la Rift Valley
• el Bazin del Congo

Storia

I pi antighi ricatamenti dei ominidi se cata in Africa, inte la Rift Valley. I pi antichi osi umani i sa catà in Tanzania (Olduvai Gorge), Kenya (Turkana) e Etiopia (Afar). I primi omeni sa spostà a nord, traversando el toco de mar che separa Gibuti da lo Yemen e ga popolà la tera. I grupi restai in Africa ga dato vita a i pigmei, i primi veri abitanti de l’Africa interna, e a i vari grupi (sudanici, bantu, hamitici, ecc.) che i ga conquistà el continente a partir dal VII secolo de la nostra era.

Par tanti secoli, l’Africa la ga vù pochi contati co i altri continenti. Al nord ghe senpre stà el contato co i popoli mediteranei. So le coste de l’Osèano Indian ghe stà contati co i marcanti persiani, indiani, e arabi. Na spedision cinese l’è rivà su le coste del Kenya e de la Tanzania de ancò inte el XIV secolo. Minatori indiani ga scavà de le miniere inte le montagne del Drakensberg (Sudafrica) inte el XI secolo.

Secondo Erodoto (Erodoto, Storie - Libro quarto), i fenici i ga fato la prima navigasion conpleta intorno a l’Africa inte el 600 a.C., co tre ani de navigasion. Tacito el conta de na spedision romana che saria rivà fin a le cascate Marchinson sul fiume Nilo, in Uganda. Se sa che marcanti romani vegnea fin su le coste del Kenya par comprar merci da marcanti arabi.

I primi contati tra eoropei e i africani del centro del continente xe del XIV secolo, co esporatori eoropei ga scominsià a seguire le carovane del sale che da la costa mediteranea entrave ne l’interno, e quando portoghexi e olandexi ga scominsià a cercar na vie par le Indie par contraster el monopolio venexian del marcà oriental, e par evitar la mediasion dei paexi musulmani ne i contati co India e Cina. I portoghexi ga scominsià la loro presenza in Africa co la conquista de Ceuta, na cità su le coste del Maroco. Par tuto el XIV secolo i portoghexi i sà spinto longo le coste de l’Africa. Na spedision guidà da Pedro del Corvilâo xe ndà dal Mar Roso a la foce del Zambesi in tel 1487. Da i calcoli fati, i ga scoverto che l’Africa la finea a ponta.

En tel 1488, Bartolomeu Dias el sa spinto pi a sud de tuti i so predecesori. Na tempesta lo ga butà fora rota, e solo dopo vari dì de navigasion e calcoli su la posision, el ga scoverto de verghe pasà el sud de l’Africa. Par via de la tempesta, el ga ciamà el cao "Cao de le Tenpeste". El re Giovanni II del Portogalo ga canbià el nome in "Cao de Bona Speransa". Bisogna parò dire che sto Cao xe la posision pi a sud-est de l’Africa, la vera ponta pi a sud la xe el Cao Agulhas, qualche centenaro de chilometri pi a ovest del Cao de Bona Speransa. En tel 1497, Vasco da Gama ga rifato la rota de Dias e, dopo ver tocà varie coste de l’Africa oriental, el xe rivà in India el 19 magio 1498. Par do secoli dopo la circumnavigasion del continente, i eoropei xe restà su le coste, co poche esplorasion de l’interno.

La colonizasion de l’Africa la xe scominzià in tel 1800. Dopo le prime conquiste, le potenze eoropee le ga diviso l’Africa a la Conferensa de Berlino. I confini de ancò, i riflete oncora le division fate ne l’epoca coloniale.

Gałeria de someje

• 
  Carta fixica de l'Africa
• 
  Carta politega de l'Africa

Note

Altri progetti

• Wikimedia Commons

• Wikimedia Commons el detien imàjini o altri file so Àfrica
• el detien schemi gràfeghi so