Storia de la Republica Zentrafricana
La Storia del Sentrafica la pol esar scrita baxandose so de le testimonianze indirete fin a l’arivo de i eoropei. I primi abitanti de la Republica Sentrafricana i xe stà i pigmei babinga. Vari grupi bantu i xe pasà de qi durante le grandi migrasioni de i secoli VI e XI d.C. El teritorio ancò cuerto da la Republica Sentraficana el xe stà de tenpo in tenpo controlà da i regni del Kanem-Bornu, del Ouaddai, e del Baguirmi. Anca i regni de i fur i ga a olte interesà el nord del paexe. En te i secoli XVIII e XIX, popolasioni zande, banda e baya-mandjia le xe rivà in tel Sentrafica dal Congo e dal Sudan. Verso la fin del XIX secolo, el nord del paexe el xera controla dal sultan sudanexe Rabih az-Zubeir.
Colonia
[canbia | canbia el còdaxe]El teritorio del Sentrafrica el xera stà adocià da la Fransa che la gavea espreso el desiderio te metarlo ne la so zona de influensa a la Conferensa de Berlin. I francexi i xe rivà inte la zona in tel 1887 co i ga firmà n’acordo co el Stato Libaro del Congo par verghe el control del la destra Oubangui, el fiume che limita el paexe a sud. En tel 1889, i francexi i ga costruio el forte de Bangui e in tel 1894 el teritorio de Oubangui-Chari el xe diventà on teritorio francexe. El xe solo in tel 1903, dopo che i ga vinto la batalia de Kousseri contro el sultan az-Zubeir, che i francexi i ga stabilì n’aministrasion unitaria. Co Ciad, Congo e Gabon la ga formà la Federasion de l’Africa Equatoriale Francexe in tel 1910. Par tren’ani i francexi i ga dovù afrontar le rivolte de i sentrafricani che no volea saverghene de la colonia.
Indipendensa
[canbia | canbia el còdaxe]I sentroafricani i ga combatù inte la seconda guera mondiale e in tel 1946, co tute le alte colonie francexi, i ga otegnù la citadinansa e la posibilità de formar governi locali. L’Asenblea locale in Sentrafica la xera guidà da Barthélemy Boganda, on prete catolego che volea l’indipendensa de tute le colonie africane. Boganda el xe diventà el cao de governo co el Sentrafrica el ga formà el primo governo autonomo, ma el xe morto in on incidente aereo in tel 1959. So cusin, David Dacko, el ga preso el control del paexe, controlà el pasagio a l’indipendensa el 13 agosto 1965 e mandà vanti el governo fin al 31 dicenbre 1965. El 1 genaro 1966, el colonel Jean Bédel Bokassa el ga fato on colpo de stato e el xe diventà presidente. Bokassa el ga subito abolì la Costitusion e ciapà tuto el poter legislativo e executivo ne le so mane. El 4 dicembre 1976, Bokassa el ga trasformà la republica in na monarchia co la proclamasion de l’Inpero del Sentro Africa. El presidente el xe diventà el inperator Bokassa I.
Bokassa I el xe stà colpevole de vari crimini contro l’umanità. Dopo la strage de 200 buteleti de na scola, David Dacko el ga fato on colpo de stato el 20 setenbre 1979 e proclamà la republica. Dacko nol xe stà bon de canbiar la situasion de crisi e el ga subio on colpo de stato organizà dal general André Kolingba in tel 1981. En tel 1985, Kolingba el ga disolto el governo militare e ciamà ministri sivili e parmeso la formasion de partii politeghi in tel 1986. Dopo verghe fato aprovar la Costitusion co on referendum, Kolingba el xe diventà presidente de la republica el 29 novembre 1986, in tel lulio 1987 52 parlamentari i verzea el parlamento.
En tel 1991, al tenpo de la primavera democràtega africana, Kolingba el ga fato riscrivar la Costitusion a na Comision Nasionale par rivar al multipartiismo. Le prime elesioni del 1992 le xe stà anulà parché i brogli i xera masa. A le elesioni del 1993, Ange-Félix Patassé el xe stà eleto presidente. El xe stà rieleto in tel 1999, ma la situasion in tel paexe la xera senpre pi grave. I operai i no vegnea pagà par mexi, i soldadi i fasea de i amutinamenti, el sistema scolastico el xe ndà in balin. I francexi i ga sostegnù el governo de Patassé e i ga mandà le so trupe par controlar la cavedal fin al marso 2000. El resto del paexe el xera in man a ribeli che i ga atacà i vilagi e copà la popolasion sensa motivo.
El 15 marso 2003, i ribeli i ga ocupà la cavedal e meso el loro comandante, François Bozizé, a la presidensa. Bozizé el xe poi stà eleto da la popolasion co on voto considerà valido da i oservatori internasionali. La Republica del Sentrafrica la ga presentà na denuncia contro Patassé e el gueriliero congolexe Jean Pierre Bemba par crimini contro l’umanità. Ancò el paexe el xe oncora fora control, co el governo che pol asicurar la sicureza a la popolasion solo che inte le sità principali. Le Nasioni Unie le ga na presensa militare co on contingente de pace a Bangui.
