Storia del Mali

Da Wikipedia, l'ençiclopedia libara.
Mapa del Mali

La storia del Mali la ga da pasar da la storia de i vari regni che i ga controlà tuto o na parte del teritorio che ancò forma el paexe africano. A olte, sti regni i vien ciamà imperi parché i unia etnie diverse anca par l’origine e la cultura, e anca parche de frecuente i controlava regni picinini vasali. I regni del Ghana, Mali e Songhai i se sa svilupà in tel Sahel e controlava le trate carovaniere che, pasando el Sahara mantegnea i contati co la costa mediteranea e del Vicino Oriente.

Regno del Ghana[canbia | canbia el còdaxe]

Svilupo geografico del regno del Ghana

El regno del Ghana el xera dominà da popoli soninké e el controlava la zona a caval tra Mali e Mauritania. Le origini del regno le se pol metar verso el V secolo d.C., ma el xe stà solo verso el VIII secolo che el regno del Ghana el xe stà bon de stabilirse come on centro de poter rejonale. La cavedal la stava a Kumbi Saleh, al confin co el deserto del Sahara. El regno del Ghana nol se sa convertì a l’Islam, ma el gavea boni raporti co i marcanti arabi. La fin del regno la xe rivà co l’invasion de i berberi Almoravidi che in tel 1078 i ga caturà la cavedal. Kumbi Saleh la xe poi stà distruta da l’esercito de i sosso in tel 1203. La distrusion del regno la ga portà a l’emigrasion verso el sud de le popolazioni de la rejon.

Regno del Mali[canbia | canbia el còdaxe]

El regno del Mali

El regno del Mali el xera controlà da popolasioni Malinké che le vivea inte l’alto corso del fiume Nizer in tel secolo XI. El re Sundiata Keita, del XIII secolo, el ga slargà la zona de influensa fin a rivare al Darfur, in Sudan. En tel 1325 el regno del Mali controlava Tinbuctù e Gao. El regno el xe imploso e el xe stà sostituido dal regno del Songhai in tel XV secolo.

Regno del Songhai[canbia | canbia el còdaxe]

El regno Songhai a lo so masima espansion

La etnia songhai la xe nata in tel nord de la Nizeria e la se sa spostà longo el fiume Nizer verso el secolo VIII fin a rivare a la sità de Gao. I songhai i xe diventà musulmani co l’arivo de i misionari de origine berbera e i xe stà dominà dal regno del Mali fin al XIV secolo.

Co la decadensa del regno del Mali, i songhai i ga controlà quasi tuto el vecio regno del Mali ma anca i veri stati hausa fin a Kano, in Nizeria. El regno el xe durà fin al 1591 co le trupe marochine le ga invaso la rejon. El regno el xera za debole parché le rote transsahariane le gavea perso inportansa. Quasi tuto el comercio el xera pasà in man de le nasioni maritime eoropee che le batea la costa Africana.

Periodo intermedio[canbia | canbia el còdaxe]

Regno de i bambara

Co la fin del regno del Songhai (1591) i regni locali i no xe stà boni de formar ono stato rejonale. I bambara i ga formà el so regno co cavedal a Segou. El regno de i bambara el se sa diviso in do, dando vita al regno de Kulibali. Sto regno el xe durà fin al 1861, co i toucouleur i ga conquistà Segou.

Al confin tra Mali e Burkina Faso, in tel XVII secolo el sa formà el regno de Kenedougou. En tel 1877 la cavedal la xe stà mesa a Sikasso e el xe resistio fin a l’arivo de i francexi. Le popolasioni toucouleur, soto la guida de Umar Tall, le ga espanso el teritorio soto el so control par conquistar quasi tuto el Mali de ancò. El regno el xe cascà soto la presion francexe in tel 1893. El sud ovest del Mali el xera controlà da le popoasioni wassoulou, che le se sa ritirà in Costa d’Avorio co l’arivo de i francexi, par esar poi sconfite da i novi colonialisti.

Verso el presente[canbia | canbia el còdaxe]

El Mali el xe stà conquistà da i francexi in tel 1893 che i no ga fato tanto par el svilupo del paexe. En tel 1959, i francexi i ga meso insieme vari teritori africani par formar la Federasion del Mali. La federasion la xe cascà co el Sengal el ga volù esar indipendente. El 22 setembre 1960, el Sudan Francexe el se sa ritirà da la federasion e el se sa proclamà indipendente co el nome de Republica del Mali. El presidente Mobido Keita el ga subito dichiarà el monopartio e spostà le aleanse verso el bloco comunista.

Militari[canbia | canbia el còdaxe]

El 19 novenbre 1968, on grupo de giovani uficiali i ga fato on colpo de stato e meso su on Comitato Militare par la Liberasion Naxionale. Moussa Traore, on tenente, el xe stà nominà presidente. Traore el ga provà a libaralizar l’economia ma el ga dovesto conbatar contro presioni interne e la sicità saheliana. Traore el ga soferto vari colpi de stato e la ribelion de i studenti ne i ani 80.

Traore nol ga mai volù saverghene de democratizar el paexe. En tel 1988, el presidente el ga permeso la presensa de vari menbri del partio inte le schede de lo steso segio (prima ghera on solo candidato par ogni segio), ma questa la xe stà l’unica apertura oferta. Verso la fin de i ani 90, i tourag che i xera scampà in Algeria e Libia durante la sicità, i xe tornà in Mali, creando el posibile problema de la secesion de le zone in mano sua. El governo el xe intervegnù co la mano forte aumentando la tension in tel paexe.

El 26 marso 1991, Amadou Toumani Touré el ga organizà on colpo de stato, arestà el presidente e sospeso la Costitusion. Touré el ga formà on governo provisorio e promeso el ritorno al governo sivile e a la democrasia in sie mesi. Dopo verghe scrito la nova Costitusion – aprovada co on referendum el 12 genaro 1992 – e organizà le elesioni locali in tel aprile 1992, el 8 giunio 1992 Alpha Oumar Konaré el xe stà eleto presidente. Touré el xe tornà in caserma a far el soldà. Dopo do turni come presidente, Konaré el ga lasà el posto a Touré, sta olta come sivile, che el ga formà on governo de unità naxionale. Touré el ga el rispeto de tuta la popolasion parché el ga senpre mantegnù la parola e dato spasio a tute le istanse civili e sociali de i maliani.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Storia_del_Mali&oldid=1099792"