Storia de la Libia

La Storia de la Libia la fonda le so raixe inte la storia de i imazigen, i primi abitanti serti de la region. Ma la xe anca la storia de na miriade de popoli che i xe pasà de chì e che i ga controlà el destino del paexe.

Libia antica

I abitanti originali de la Libia i xe i berberi. No ghe xe fonti serte so l’origine e la pre-storia de sto popolo. I primi documenti so la Libia i se li ga co l’arivo de i fenici e de i greci su le rive mediteranee de la Tripolitania e la Cirenaica. I fenici i ga fondà varie colonie, la pi importante la xera Cartagine. Cartagine e tute le altre colonie le xe cascà soto el control de Roma co la fin de le guere Puniche. La sità de Tripoli la xera el ponto de partensa e de arivo de le carovane che traversava el Maghreb e che le pasava el deserto del Sahara par rivar a Timbuctù.

I greci i ga costruio varie colonie inte la Cirenaica. La zona la xera conosuda come la Pentapoli, le cinque sità, che le xera: Cirene – che la ga dato el nome a la region, Marsa Susa, Arsinoe, Berenice e Barca. Anca la Cirenaica la xe finia soto el controlo romano. Co la scomparsa de l’impero romano osidentale, la Libia la xe restada soto el controlo de Bisanzio.

Periodo islamico

Le armate arabe le xe rivà in Libia in tel 647. El control arabo so la region el xe sempre stà forte. I berberi, che i xera in majoria cristiani, i xe stà convertii a forsa e la loro cultura mesa in secondo pian. El control politego de la Libia el xe restà in man araba par on secolo. En tel 750 i Abasidi i ga tolto el poter a i Umayadi e portà la cavedal a Baghdad. La Libia la xera parte de sto impero, ma el control el xe diventà nominale. En tel 800, el califo Harun ar-Rashid el ga nominà Ibrahim ibn al-Aghlab governatore de la Libia. El novo governatore el ga fondà la dinastia de i Aghlabidi, diventando de fato el re de la Libia. I califi de Baghdad i xe restai co la sola autorità spirituale. I novi governanti i ga recuperà ute le infrastruture romane e mejorà la situasion econòmega de la zente.

Co la fin del control musulmano, la Libia la ga perso el sistema sentralizà de governo e la costa la xe finià in man de i pirati (XV secolo). Co l’arivo de i otomani in tel 1551, la solfa no la xe canbià. I turchi i no gavea interese a controlar la colonia e i podea profitar de i pirati par tegnar soto controlo el Mediteraneo.

I turchi i ga diviso el Maghreb in tre province: Algeri, Tripoli e Tunisi. Tripoli la gavea on pashà nomenà dal sultano de Costantinopoli. I soldai i xera ciamadi i gianizeri. El control de i turchi el ga resistio fin al 1711, co Ahmed Karamanli el ga fondà la dinastia na nova dinastia che la controlarà la Libia fin al 1835. La dinastia de Karamanli la scominsià a perdar teren co le guere Barbariche (dal 1801 in poi). En tel 1835, el sultan Mahmud II el xe tornà in control de la Libia. La Libia la xe restà soto i otomani fin a l’arivo de i italiani in tel 1911.

Periodo coloniale

El 3 otobre 1911 i italiani i ga atacà Tripoli. Dopo pochi mexi, el sultan el ga lasà la Libia a l’Italia co el tratato de Losanna. 150 000 italiani i xe stà mandà in Libia par colonizar el paexe. En tel 1920, par finir la guera contro i senusi, l’Italia la ga riconosù lo seico Sidi Idris come el cao ereditario de i Senusi co autorità so le oasi de Kufra e Emiro de la Cirenaica. L’Italia la ga perso el control de la Libia co la seconda guera mondiale.

Libia moderna

Sidi Idris, che el gavea visù in bando al Cairo, el xe tornà in Libia in tel 1947. El 24 dicenbre 1951, la Libia la xe diventà na naxion indipendent e Sidi Idris proclamà el re. El ricatamento de petrolio el ga dà a la Libia i mezi par modernizar el paexe. El popolo parò el sa reoltà parché la majoria de i schei i xe finii inte le tasche de i potenti. El 1 setembre 1969, soto la guida de Muhammar Abu Minyar al-Qadhafi (Ghedafi), i miliari i ga mandà el re in bando al Cairo e abolì la monarchia.

Ghedafi el ga controlà la Libia fin ancò. Dopo ani de isolamento internasional – causà dal sostegno de la Libia al terorismo internaxional – la Libia la xe tornà a esar on paexe verto a le naxioni foreste in tel 2005.

Portałi