Stòria de la Tunizìa

La Storia de la Tunixia la xe la storia del Maghreb. Solo ultimamente el teritorio de la Tunixia el ga preso na forma naxional e el xe diventà ono Stato indipendente e na republica.

Preistoria

I ricatamenti umani pi veci i risale al paleolitico (20 000 ani fa). A El Guettar, rente de Gafsa, se cata i resti de na costrusion preistorica, forse on tenpieto dedicà a na fonte d’acqua. Da el nome antico de Gafsa vien el nome de la cultura che la se sa svilupà la, la cultura capsiana. Co el neolitico (4.500 – 2.500 a.C.) el movimento de i popoli de la region el xe stà influensà da la progresiva desertificasion del Sahara. El xe in sto periodo che i berberi i entra inte la region del Maghreb. L’origine de i berberi na la xe ciara.

El pasagio da la preistoria a la storia el riva co i fenici che i ga costruio varie sità longo la costa. De inportansa storica la xe Cartàxene, so le cui rovine la xe nata la cavedal moderna Túnixi.

Cartàxene

La sità de Cartàxene la xe st fondà in tel 814 a.C. da de i coloni fenici de Tiro. El mito el dixe che laregina Elisa (Didone), sorela de Pigmalione, re de Tiro, la ga fondà la sità. Ancò se pensa che la data la sia sbajà, co i ricatamenti archeologici i atesta na data posteriore.

La sità la xe cresuda e dal VI secolo a.C. la ga fato sentir el so potere comerciale e militare in tuto el Mediteraneo. Co na aleansa co i etruschi, Cartàxene la vinse contro la sità de Masilia (Marseja) el control de la Corsica. Le colonie so la costa spagnola le ricalca quele vece de i fenici. En tel sud de l’Italia, Cartàxene la controla vari porti e tien a bada i greci, sensa esar bona de tor la supremasia.

Co la cresita de Roma, Cartàxene la se scontra co la nova potensa del Mediteraneo. Co tre guere ( 264-241 a.C.; 218-202; e 149-146) Roma la piega e distruge Cartàxene. La prima Guera Punica la xe stà on conflito navale e terestre in Sicilia e in Tunixia. La guera la xe sciopà par i diriti de sfrutamento de l’ixola. Dopovari alti e basi, i romani i ga vinto la bataja navale de Motié e caturà el control de tuta l’ixola. La prima Guera Punica la segna la fin de Cartàxene come potensa marinara.

La seconda Guera Punica vede Anibale traversar le Alpi co i elefanti. Anibale el conquista quasi tuta l’Italia, ma el nol se move contro la sità de Roma. I romani alora i ga vù el tenpo par riorganizar l’esercito, fermar le nove trupe cartaginexi pra che le se podese unire a Anibale. Anibale el no ga perso na bataja, ma el xe stà meso in on canton in tel sud de l’Italia sensa poder atacar el groso de l’esercito romano. Co la bataja de Zama, Scipione vinze contro Anibale, a la so prima sconfita militare. Da alora Scipione el xe ciamà l’Africano. La fin de la seconda Guera Punica vol dir che Cartàxene la perde la Spagna, la ga da afondar la so flota, la ga da da pagare na multa a Roma.

La tersa Guera Punica la xe stà volua da Roma par far fora conpletamente Cartàxene e el so potere econòmego. Dopo n’asedio de tri ani, Cartàxene la vien distruta conpletamente in tel 146 a.C.

Provinsia Romana

File:Sbeitla caitole.jpg

Roine del Caitolo de Sufetula

Co la distrusion de Cartàxene, Roma la fonda la provinsia de l’Africa co cavedal a Utica. Pi tardi la cavedal la verà spostada de novo in tel posto do Cartàxene la xera costruia. La region la diventa on granro par l’inpero che fornise grano e olio de oliva. La nova sità de Cartàxene la diventa presto on sentro comerciale inportante. I resti de i monumenti romani i mostra la richeza de la sità e el so livel culturale. Cartàxene la diventa la seconda sità de l’inpero.

Co l’arivo del cristianeximo, Cartàxene la diventa on sentro inportante de evangelizasion e de cultura. Soto l’asion de San Agostino de Ipona le zone urbane e i grandi propietari teririeri i se fa catoleghi. Altri grandi esponenti de la Cexa i xe stà Tertuliano, Cipriano de Cartàxene e Aurelio.

Vandali

En tel 429, le trupe de Genserico, re vandalo, le pasa el streto de Gibiltera. En diexe ani i riva a Ipona, in Tunixia. Co i entra a Cartàxene i mete in piè on regno chel durarà on secolo. Le relasion co al popolasion locale le xe stà subito negative. I vandali i xera ariani, e quindi eretici par i catoleghi de la Tunixia, e in pi i xera barbari, considerà inferiori culturalmente.

I re vandali i ga opreso i catoleghi e fato copar vari che i se openeva a l’arianeximo. Atacà da i berberi da pi parti, i vandali i ga perso el control de la region apoco a poco. Dal tel 530, l’inperator Giustiniano de Bisanzio el conquista quasi tuto el nord Africa par ricostruir el inpero romano. I bizantini i ga conquistà Cartàxene in tel 533 co le trupe del general Belisario. I vandali i xe stà fati s-ciavi e portadi in oriente, e l’aministrasion romana rimesa in piè.

L’era arabo-musulmana

La moschea de Kairouan fondada in tel 670 da Oqba Ibn Nafaa.

Le trupe arabe che volea conquistar el Maghreb le xe rivà in Tunixia in tel 647 e le bate l’exarca bizantino Gregorio a Sbeitla. Na seconda spedision la xe rivà in tel 661 e la ermina co la conquista de Bizerte. En tel 670 Oqba Ibn Nafaa el ga guidà le so trupe a la conquista de Kairouan, che la diventa el sentro de le spedision verso el resto del Maghreb. I tunixini i ga resistio l’espansion araba e i ga persino reconquistà Kairouan in tel 693. Le armate arabe del general Hassan ibn Noôman le ga meso fin a la resistensa in tel 6968co la conquista de Cartàxene. I arabi i ga alora scominsià el laoro de islamizasion de la cultura berbera, che la xe restà refrataria a la conquesta. Ancora ancò i berberi i ga conservà de le tradision che dimostra la presensa de animismo e cristianeximo in tel so pasà.

Dinastie islamiche

En tel 800, el califo Haroun ar-Rachid el ga delegà el controlo de la Tuixia a l’emiro Ibrahim ibn Al-Aghlab che el ga dato vita a la dinastia Aglabide che la regnerà so la Tunixia par on secolo. Soto i Aglabidi, la Tunixia la ritorna a esar on sentro cultural e comerciale inportante.

En tel 909, Abu Abd Allah al-Husayn al-Shi'I – che dixea de esar on disendente de Fatima, la fiola de Maometo – e sostegnù da iberberi che no volea i Aglabidi, el se ga proclamà imam de la Tunixia e el ga fondà la dinastia de i Fatimidi. I Fatimidi i ga moso la so cavedal in Sicilia (948) e dopo in Egito (972). La dinastia de i Ziridi la ga preso el potere in Tunisia a poco a poco, fin che in tel 1048 la se sa proclamà indipendente. I Ziridi i xera de origine berbera e i ga laorà par la ricostrusion de la società e cultura berbere.

Co la nasita de la dinastia Almoaide del Maroco, anca la Tunixia la finise soto el control de re marochin (1159). En sto periodo, i normani de la Sicilia i ga atacà de frecuente le sità de la costa fin a ocupar Djerba, Sousse e Sfax de tanto in tanto. Soto i Almoaidi la Tunixia la torna a verghe n’inportansa comercial in el Mediteraneo o raporti regolari co Venexia, Pixa e Marseja. Anca a livel cultural la Tunixia la xera inportante. El pare de la sociołozia moderna, ibn Khaldoun, el xera tunixino e el ga scrito anca tratati storici.

En tel 1228, el governator Abû Zakariyâ' Yahyâ el fonda la dinastia Hafside che la controlarà la Tunixia par tri secoli. I xe i secoli de la crisi del Maghreb, co le bande de corsari arabi i ga preso el control de i mari e de vari porti de la costa. La Spagna e l’inpero otomano i se ga de frecuente becà longo ste coste par el control del trafico comerciale. En tel 1534, el famoxo corsaro Khayr ad-Din Barbarosa el ga conbatu contro i spagnoli par el control de Tunixi. I turchi i ga caio che sensa na flota i no podea batar i corsari e oporse a l’avansata spagnola. En tel 1560 i otomani i conquista Djerba e in tel 1595 Tunixi.

Periodo Otomano

I turchi i no xe mai stà boni de ofrir na bona aministrasion a i posedimenti in tel Maghreb. La Tunixia la conosù on momento de rinasita solo in tel XIX secolo, co la ga vù pi autonomia da Instanbul. En tel 1861 i tunixini i sa dato na Costitusion, la prima del mondo arabo e i xe diventà na repùblega indipendente de fato, anca se i xera oncora ligà a l’inpero otomano. I governatori de la Tunixia, i bey, i no xe stà tanto boni aministratori e in tel 1869 el paexe el xera a la bancarota. Italia, Fransa e Regno Unio i ga avansà el desiderio de verghe el protetorato de la region. La Tunixa, che la ga tentà de divantar indipendente, la xe invese cascà soto el controlo francexe.

El protetorato

Co on pretesto, le trupe francexi le xe entrà in Tunixia da l’Algeria e le xe rivà a Tunixi sensa conbatar. El 12 magio 1881 Sadok Bey el ga firmà el tratato de Bardo. La Fransa la ga subito scominsià a tratar la Tunizia come na colonia e meso da parte el bey a favor de on so governator.

A i inisi del XX secolo, Bèchir Sfar, Ali Bach Hamba e Abdeljeli Zaouche i fonda el grupo Zoeni Tunixini, on grupo de resistensa pasiva contro i francexi. Da sto grupo nasarà in tel 1920 el Destour, n’altro grupo che vlea la indipendensa. En tel 1932, Bourgiba e altri giornalisti i ga fondà el giornal L’Asion Tunixina che domanda l’indipendensa e la laicità de la nasion. Pochi ani pi tardi Bourgiba el vien enprisonà in Fransa come atentatore a la nasion.

Durante la seconda guera mondiale, el governo de Vichy el se mostra disponìbiłe a darghe la Tunixia a l’Italia. Da la prison, Bourgiba el ga domandà a i so concitadini de oporse al fasismo e sostegnar i aleati. En tel 1944, co el goevrno de De Gaulle el tol el poter in Fransa, Bourgiba el vien libarà par el so sostegno.

I tunixini i ga discuso co i francexi la question de l’indipendensa. I francexi i ga risposto co on novo aresto de Bourgiba in tel 1952. La mosa la ga provocà de le somose e la rivolta armata. Dopo l’indurimento de le posisioni, la convension franco-tunixina la xe stà firmà el 3 giunio 1955. L’indipendensa la xe stà proclamà el 20 marso 1956, e Bourgiba el xe stà eleto primo ministro soto el re, disendente de i bey.

Tunixia moderna

El 25 lulio 1957 la monarchia la xe sta abolia e la Tunixia la xe diventà na republica, co Bourgiba presidente (8 novenbre 1959). Bourgiba el ga governà el paexe ma el ga anca parmeso la cresita de la corusion. A l’inisio dei ani otanta, el paexe el xe cascà inte na crisi sociale e politega, el ga anca dovù far i conti co l’islamismo militante.

Vista l’incapasità de Bourgiba de afrontar la situasion, el primo ministro Ben Ali el ga deposto el presidente el 7 novenbre 1987. Ali el se sa presentà a le elesion el 2 aprile 1989 e el xe stà eleto co el 99,27% de i voti. Ali el xe riusì a modernizar l’economia ma el ga perso in tel canpo de i diriti sociali. Ben Ali el xe sta rieleto in tel 1994, 1999 e 2004. Dopo la so quarta elesion, Ben Ali el ga scominsià la represion politega se i opositori e fato aprovar na lege che ge da l’imunità al presidente par quel che ga fato durante el so mandato.

Portałi