Storia de la Mauritania

I primi abitanti serti de la Mauritania i xe stà i bafour, na popolasion sudanica che la vivea qi fin dal neolitico. I bafour i xe stà parà via da le migrasion berbere tra el III e VII secolo de la nostra era. En tel 1076, i berberi i controlava tuto el teritorio a nord del fiume Senegal.

Lota par la dominasion

Co la fin de la conquista berbera, la se sa verto na lota tra i novi paroni de la Mauritania e i arabi dorigine yemenita – i maqil – che i volea controlar tuto el Maghreb osidentale. La lota, prima culturale e politega e poi anca violenta, la xe terminà co la Guera de i Trentani (1644 – 1674). I arabi i ga vu la mejo e i ga influensà la stratificasion de la società. I guerieri arabi – hassane - i xe diventà el grupo pi inportante de la società mauritana. Lori i gavea el dirito de farse pagar le tase da le tribù pi deboli. I berberi i ga dovù sistemarse inte le caste secondarie, ma i ga tegnù la dominasion spirituale visto che i marabuti – santoni musulmani – i xera quasi tuti berberi. Le tribù berbere che no gavea la posibiltà de fornir guerieri o omeni de cultura, i xe diventà i znaga, la clase pi basa. I s-ciavi neri – caturà da le etnie a sud del fiume Senegal – i xe diventàa poco a poco i haratin, o mauritani neri. I haratin i xe ancò na etnia che vive servendo i mauritani bianchi considerà nobili. La società mauritana la xe senpre stà na società nomade, tribale e regolà da le lote interne. A lo steso tenpo, la cultura islamica e la produsion de opere scrite – famoxa la racolta de manoscriti de l’oasi de Cinquetti – la ga dato na strutura legale e non arbitrariamente ligà a le regole del pi forte.

Colonia

L’arivo de i francexi a l’inisio del XX secolo el ga portà dei canbiamenti sociali forti. I francexi i ga proibio la s-ciavitù, che la xera parte de le regole sociali de la Mauritania. I ga ancà tentà de fermar l’influenza de i hassane, dandoge pi inportansa a i zawia e i znaga, che xera i grupi pi basi de la società. I francexi i ga meso fin a le lote tribali, che le ghe permetea a i hassane de controlar la vita tribale. I francexi i no ghe riusì a spacar el grovilio de contati tra diversi grupi e i ga dovesto senpre tentar aleanse tenporanee co i vari grupi. I mauritani i xe restai nomadi, favorendo la formasion de una elite de neri originari del Senegal.

Indipendensa

El 28 novenbre 1960, la Mauritania la xe diventà indinpendente. La majoria de la popolasion la xera nomade e la cavedal Nouakchott la xera stà costruia in tuta freta rente al vilagio de Ksar. La majoria de i abitanti co residensa fisa i xera neri de origine senegalexe che i gavea preso in man l’aministrasion del potere. I altri mauritani i ga risposto a sta situasion forsando l’arabisazion del paexe. El primo presidente, Moktar Ould Daddah, el ga subito proclamà el mononpartitismo e el xe stà rieleto in tel 1966, 1971, 1976. Daddah el ga spinto par el rinovo econòmego e el se sa scontrà co la volontà popolar par el sfrutamento de le risorse naxionali, in man a i francexi. Par risolvar la question, el presidente el ga naxionalizà le companie minerarie in tel 1974.

Guera Sahariana

En tel 1975, Daddah el gavea da frontegiar l’oposision in casa, e l’espansionismo marochin a l’estaro. La Mauritania la ga invaso el teritorio del Sahara Spagnolo, ancò Repubblica Araba Saharawi Democratica, e el ga anexo el sud del teritorio. I guerilieri del Fronte Polisario i ga scominsià na guera de liberasion contro i mauritani. Par tri ani, i saharawi i ga atacà le postasion minerarie mauritane e persino bonbardà la cavedal. Daddah el ga mandà le trupe nere al fronte, ma queste le se sa ribelà parché i no volea conbatar na guera che i giudicava esar na guera araba. Daddah nol ga volù ritirarse e el ga preso decision senpre pi totalitarie.

El 10 lulio 1978, el colonel Mustafa Ould Salek el ga fato on colpo de Stato. El Polixario el ga proclamà on cesate el fogo. Ould Salek nol xe stà bon de mediare la situasion e el ga esasperà i neri del sud. A i inisi del 1979, Mohamed Khouna Ould Haidallah el ga fato n’altro colpo de Stato. Dopo na serie de atachi del Polixario, i mauritani i ga asetà de ritirarse da i teritori del Sahara Osidentale e riconosar el Fronte Polisario. El Maroco, che ocupava i teritori a nord, el ga reagì violentemente e el ga tentà de far on colpo de Stato a Nouakchott. I do paexi i ga roto le relasion diplomàteghe par qualche ano.

Haidallah el ga provà a canbiar le relasion tra i vari grupi de la società mauritana. El ga proclamà la fin de la s-ciavitù, decision che la vien fata da ogni governo mauritano, e el ga provà a darghe pi spazi a la minoransa nera. De fato, el ga dovù canbiar continuamente le aleanse, ricopiando in tel governo le vecie struture de aleansa tribale che le ga senpre governà la mauritania, le stese struture che el volea canbiar.

Ould Taya

El 12 dicenbre 1984, Maaouya Ould Sid'Ahmed Taya el ga deposto Haidallah e el se sa proclamà cao del governo. Dopo verghe promeso el ritorno a la democrasia, el se sa dismentegà de le promese. Taya nol xe stà bon de svilupar el dialogo co le minoranze. La tension la xe salià fin a la guera de confin co el Senegal del 1989. Da alora la tension la xe diminuida, ma la diferensa tra mauritani de origine araba e de origine nera la resta presente inte la società.

Soto la presion interna e internasionale, Taya el ga parmeso la aprovasion de na nova Costitusion che la ga previsto anca el multipartitismo in tel 1991. Taya el xe restà al potere ma el ga subì vari tentativi de colpi de Stato.

Democrasia

El 3 agosto 2005, co el presidente Taya el xera in Arabia Saudia a i funerali del re Fahd, i militari i ga ocupà la cavedal. Dopo qualche ora de incerteze, i militari i ga fato saver a la naxion che i volea metar fin al governo de Taya. I militari i ga formà na giunta par prepar la strada verso la democrasia. El colonel Ely Ould Mohamed Vall, cao de i ribeli, el ga direto el governo a la scritura de na nova Costitusion, aprovà in tel giunio 2006. El 11 marso 2007, i mauritani i ga votà Sidi Ould Cheikh Abdallahi novo presidente del paexe.

Portałi