Storia de ła Nigeria

Da Wikipedia, l'ençiclopedia libara.
Va a: navigasion, serca
Map of Nigeria

I primi abitanti de el teritorio che ancò forma ła Nigeria i xe stà popolasioni de caciatori-racoglitori, tra queste etnie pigmee, za verso el 9 000 a.C. Ricatamenti archeologici testimonia na cultura de pastoralisti che conosea ła tecnołogia de ła seramica za en tel IV milenio a.C. I primim segni de coltivasion i se cata ntorno al I miènio a.C.

Primi segni[canbia | canbia sorxente]

I ricatamenti archeologici i ne mostra che el pasagio da neołìtico a l’età del fero el xe vegnù diretamente sensa lo stadio del bronzo. I studiosi i pensa che la tecnologia del fero la xe rivà dal nord, altri i pensa che la sia vegnù co la emigrasion de popolasioni sudaniche da la val del Nilo. Queste la xe la teoria pi probabile, parché la saria consistente co i ritrovamenti en tuta l’area del Sahel.

I regni[canbia | canbia sorxente]

La storia de la Nigeria la xe contrasegnada da la storia de i regni che, par lo pi, i riflete le divisioni etniche del paexe. I dati che vien da l’archeologia ne parmete de conosar l’esistensa de regni tra i yoruba, de i igbo, de i edo, de i efik, de i ibibio e de i annang. I popoli hausa i se sa organizà en sità stato prima del XV secolo d.C. El regno de i nri el xera za organizà en tel 900 e el xe ndà vanti fin al 1900. El xe stà el regno che gha dato vita a la cultura igbo.

Regni yoruba[canbia | canbia sorxente]

I yoruba i se cata so la destra del Fiume Niger. I xe on grupo etnico de origini miste, co i gha inglobà vari grupi che i xe rivà sol so teritorio. I yoruba i xera agricoltori che i se sa organizà en sità stato e che i xera governà da na dinastia de capi. Le sità le xera sentri de tecnologia rafinata: teracota, sculture, lavorasion dei metali, ecc.

I yoruba i xe de origine sudanica, ma la teoria che i xe vegnù da l’Arabia la xe el fruto de on laoro de studio superficiale de la cultura. Le afinità linguistiche le xe minime e quele culturali inesistenti. La sità de Ife la se pol considerar come la cavedal de la cultura yoruba.

Oyo e Benin[canbia | canbia sorxente]

Da el secolo XV, le sità de Oyo e Benin le gha superà Ife a livel politego e economico. Ife la tegnù el primato spirituale. A Oyo, i yoruba i gha scominsià a crear confederasioni de picoli regni. El Consilio de Stato (Oyo Mesi) el nominava el re (alafin) e controlava el so operato. Oyo el gha presto inglobà Nupe e Borgu, verzendo nove vie de comercio co el nord.

El regno de Benin el xe scominsià come na colonia de Ife so la costa. En tel XV secolo, Benin la xe diventà indipendente e, tajando fora la sità de Ife da el comercio so la costa, pi forte de la sità madre. La sità de Benin la xe rivà a verghe pi de 100 000 abitanti e dal XV secolo la xera en contato co i portoghexi par el comercio de le materie prime e de i sciavi.

Hausa[canbia | canbia sorxente]

Le sità hausa – Kano, Jigawa, Katsina e altre - le se sa svilupà en sità stato en tel XIV secolo. Le sità le gavea mura e le vivea en te la periferia de i grandi regni del tenpo. Le caraane che le pasava el deserto del Sahara le catava dei marcà proteti tra i hausa. Co le caravane, anca l’Islam e la scritura i xe rivà tra i hausa. Le Cronache de Kano le raconta l’influensa de i chierici maliani su la casa regnante a Kano.

Stati precoloniali[canbia | canbia sorxente]

I regni hausa i xe finii soto el control del regno del Songhai en tel XVI secolo. A lo steso tenpo, anca el regno de Kanen-Borno (de la zona del Ciad) el se sa espanso a sud, fin a tocar el nord de la Nigeria, conquistando i teritori hausa che i xera scanpà al regno del Songhai. El regno de Songhai el xe cascà soto i atachi de le milisie marochine en tel 1591. I marochini i gha conquistà le sità de Gao e Timbuctù. El regno del Borno el xe riusì a torse tuto el nord de la Nigeria. El regno del Borno nol gha senpre vù la posibilità de controlar le etnie hausa parché el gha dovù controbatar i atachi de i tuareg.

I regni Ibibio, Efik e Annang i se sa formà longo la costa rente del Camerun. Sti regni i no xera unii, anca se la zente la parlava la stesa lengoa. I popoli de sta region i xe stà i primi a vegnar en contato co i eoropei.

I regni igbo[canbia | canbia sorxente]

Le popolasioni igbo le gha fondà vari regni a partir dal XVI secolo. El regno de Onitsha el conprendeva anca altre popolasioni. Dopo le tensioni etniche co i aro, se vede la cresita del regno Arochukwu (1630-1720) chel gha portà a la fondasion de la confederasion de Aro che la controlava el centro-ovest e l’est Nigeria.

La colonia[canbia | canbia sorxente]

I inglexi i gha seguì portoghexi e olandexi ne lo sfrutamento comerciale de le coste africane. En Nigeria, i inglexi i gha organizà na rete comerciale fin a l’interno. En tel 1885, a la Conferensa de Berlin inglexi i se sa visto riconosù el dirito de colonizar la Nigeria. En tel 1900 el governo el gha consolidà la so presensa en tel nord e el gha proclamà el protetorato en tel 1901. La colonia la xera divisa en regioni setentrionali, regioni meridionali e colonia de Lagos.

Colpi de stato[canbia | canbia sorxente]

En te l’otobre 1960 la Nigeria la xe diventà indipendente e le tre regioni del paexe le gavea l’autonomia aministrativa. El governo federal el gavea el control de l’esercito, de le relasioni foreste, de le selte economiche e fiscali. La regina de Inghiltera la xera el capo de stato uficiale, anca se el parlamento bicamerale el gavea potere legislativo soto la guida de on primo ministro. I partiti politici i se gha coagulà su i grosi grupi etnici: El Congreso del Popolo Nigeriano rapresentava i hausa, musulmani del nord; el Congreso Naxionale de i Citadini Nigeriani rapresentava i igbo, cristiani del sud; e el Grupo de Axion el rapresentava i yoruba. Hausa e igo i se sa meso d’acordo par formar el primo governo soto la guida de Abubakar Tafawa Balewa.

En tel 1963, la Nigeria la se sa proclamà na republica federal e meso Nnamdi Azikiwe primo presidente. Aziki el xe durà fin al 1966, co on grupo de militari i ha fato on colpo de stato. El novo goveno el xe durà sie mexi, co altri militari i gha fato n’altro colpo de stato. El novo omo forte, Yakubu Gowon, el gha diviso el paexe en dodese Stati ma nol xe stà bon de fermar el masacro de i igbo che i xera ndà a vivare en tel nord del paexe. I igbo i gha domandà l’indipendensa e i gha proclamà la Republica del Biafra el 29 magio 1967. La guera sivile che la xe seguia la gha fato pi de on milione de morti.

El 29 lulio 1975, el general Murtale Mohammed el gha fato on colpo de stato e preso la presidensa. Dopo verghe dito che el governo sivile el saria tornà en tel 1979, Murtale el xe stà copà el 1 otobre 1976 durante on tentativo de colpo de stato. Olusegun Obasanjo el gha tolto el so posto.

Secondo tentativo[canbia | canbia sorxente]

Obasanjo el gha organizà na Asenblea Costituente par riscrivar la Costitusion. En tel 1979 Shehu Shangari el xe stà eleto presidente. El xe stà riconfermà en tel 1983. Dopo pochi mexi, el magior generale Muhammadu Buhari el gha fato on colpo de stato e formà on novo governo. En tel agosto 1985, Ibrahim Babangida el gha fato on novo colpo de stato e preso el potere. Dopo verghe dato el permeso de stanpar i giornali, che i xera stà seradi, Babangida el gha provà a rinovar l’economia. Dopo vari rinvii, le prime elesioni libare le se sa tegnù el 12 giunio 1993. I primi raporti i dixea che M. K. Abiola el xera stà eleto presidente. Babangida el gha girà i risultati en so favor e el gha anulà le elesioni. La zente la gha protestà e pi de 1.000 nigeriani i xe stà copà en te la protesta.

Abacha[canbia | canbia sorxente]

Soto la presion de la piaza, Babangida el gha pasà el potere a Ernest Shonekan. El paexe el xera drio cascar en tel cos pi nero co el ministro de la difesa, Sani Abacha, el gha fato on colpo de stato e preso el potere.

I nigeriani i sperava che Abacha el podese darghe al paexe la stabilità necesaria par la cresita. Invese, Abacha el se sa dimostrà senpre pi totalitario. En tel 1994, el governo el gha istituì el tribunale speciale par giudicar i capi ogoni, che domandava pi autonomia. El tribunale el gha condanà a morte Ken Sro Wiwa, on leterato de fama mondiale, e altri leader ogoni.

El presidente Abacha el xe morto de ataco cardiaco el 8 giunio 1998. Al momento de la morte el xera drio entratener on grupo de balerine indiane. El general Abdulsalami Abubakar el gha preso el so posto e formà on governo de transision. Abubakar el gha fato libarar tuti i prisonieri politeghi e promoso de le riforme sociali. El 29 magio 1999 Olusegun Obasanjo el xe stà proclamà presidente.

Verso la democrasia[canbia | canbia sorxente]

L’elesion de Obasanjo la gha meso fine a 16 ani de governi militari. La Nigeria la xera en teribili condisioni economiche, piena de corusion e sensa na infrastrutura valida. Obasanjo el gha promoso el ritorno a le libartà sivili, l’investigasion de i abusi del pasà, e le riforme economiche.

Durante el governo de Obasanjo, i Stati de la confederasion i gha domandà pi schei e pi importansa en te le decisioni naxionali. Vari Stati i xe stà scosi da ribelioni de sfondo religioso e economico.

L’altro grave problema el xe quelo de la ribelion en tel delta del Fiume Niger. Le popolasioni del delta le vol che i schei del petrolio i serva anca par el loro svilupo, mentre che la majoria de i schei i va a finir en te le tasche de i politeghi. I ribeli i gha speso rapì i laoradori de le baxi petrolifere par farghene ostagi da usar par le rivendicasioni politeghe.

Obasanjo el xe stà rieleto en tel 2003 e volea canbiar la Costitusion par presentarse na tersa olta en tel 2007, ma nol ghe riusì. A le elesioni del 2007, Umaru Yar'Adua el xe diventà presidente, anca se le oposisioni le gha dito che el voto nol xera valido.