San Marco (sestièr)

Da Wikipedia, l'ençiclopedia libara.
Va a: navigasion, serca
Poxision del sestièr de San Marco.

San Marco el xé un dei sestieri de Venesia e el xé só cór fin da có ła Serenìsima ła xé nasùa.

El 12 de disenbre 2007 el sestièr el gavéva 4.236 abitanti.

Geografia[canbia | canbia sorxente]

El sestièr de San Marco el xé dełimità a nord dal Canal Grando; a sud, indove ła Piasa ła xé revolta verso ła Laguna de Venesia, dal basin de San Marco; a ovest dal Rio del Pałaso; a est dal Rio de San Zulian.

El sestièr el confina a nord col sestièr de Canarégio e a est col sestièr de Casteo méntre el xé cołigà al sestièr de San Poło traverso el Ponte de Rialto e a queo de Dorsoduro traverso el Ponte del'Academia.

Dal pónto de vista aministrativo el sestièr de San Marco el contien anca l'ìxoła de San Zorzi Magior.

Piasa San Marco. Se vede ła baxìłica, el canpanièl e a drita el pałaso dogal.

Storia[canbia | canbia sorxente]

El sestièr de San Marco, 'nte łe orìxene ciamà Rivoalto dal qual anca vien el nome Rialto, el xé el nùcleo orixenario de ła sità. 'Ntei sói primi sècołi de vita infati ła sità de Venezia ła gera ciamada Civitas Rivoalti propio per referéndose a łe ìxołe su łe quae ła xé stada tirada su.

El cor del sestièr el xé costituìo da ła Piasa San Marco, che, per squaxi miłe ani, ła xé stada el séntro połìtego e giudesiario de ła Repùblica de Venesia.

Ła Piasa ła xé nasùa e cresùa su ła xona ocupada dai antighi brołi curai da łe mùneghe del visin convénto de San Zacaria, intorno a łe dó céxe che ghe gera in orìxene in sto łógo qua, ła céxa de San Teodoro (primo patrono de Venesia), daspò butada xó per far posto a ła Baxìłica de San Marco e ła prima céxa de San Ziminian, in orìxene catada a ocio a metà łonghésa de ła piasa de ancuo, vanti a ła baxéłega. Col slargamento de ła Piasa, ła Céxa de San Ziminian ła xé stada daspò tirada su visin al Ala Napoleonica de ancuo, deso parte del Muxeo Correr, per tirar su ła qual ła céxa ła xé stada butada xó 'ntel 1807 per órdene de Napoleon.

'Ntel'ano 828 i pescadóri Buono da Małamoco e Rustego da Torseło i ga portà via da Ałesandria d'Egito el cadàvere de San Marco Vangełista e i ła ga portà a Venesia indove ła xé, anca 'ntei giórni de ancuo, conservada 'nte ła baxéłega a eło dedicada. Da ełora el santo el xé deventà el patron de ła sità e el ga dà el nome a ła Piasa.

Monumenti e arte[canbia | canbia sorxente]

Natural che el séntro vital del sestièr el xé Piasa San Marco, su ła qual se 'fasa el Pałaso Dogal, sede del poder połìtego venesian fin dal IX sècoło, del qual el xé stà el primo edifisio, e ła baxéłega de San Marco, capeła privada del Doxe fin al 1807: al pòpoło infati nol gera perméso intrar 'nte ła baxéłega: łóri i podeva 'ndarghe drénto soło in feste o ocaxion ecesionałe. Fin a tal data ła sede Patriarcal de Venesia ła gera San Piero de Casteło, al màrxene oriental de ła sità.

Ła piasa ła xé l'ùnego spasio sitadin chel xé ciamà propio cusì, perché 'ntel resto de ła sità ghe xé soło canpi, canpiełi, corte e altri.

Łe Procuratie catae vanti a ła baxéłega e al pałaso Dogal łe gera sede del poder giudisiario de ła Serenìsima.

Ła Tor del Rełogio, da un póco consiada, el xé un monuménto vèro inportante per i Venesiani.

Indrio el Pałaso Dogal, dal ponte de ła Pagia, se pol amirar el famóxo ponte dei Sospiri vanti al qual scoménsa el sestièr de Casteło.

Altri łóghi de interese i xé el Teatro Ła Fenice, ła céxa de Céxa de San Moisè che ła se cata a ła fin de ła Całe Larga XXII Marso e Pałaso Grassi, miga da tanto ténpo fato deventar un inportante muxeo

Al sestièr partien anca l'ìxoła de San Zorzi Magior, indove ghe xé ła baxìłica da ła qual ea ła tol el nome e ła fondasion Cini.

Sestièri de Venesia
Canarégio · Casteło · Dorsoduro · Santa Cróxe · San Marco · San Poło
Venezia-Stemma.png