San Poło (sestièr)

Da Wikipedia, l'ençiclopedia libara.
Va a: navigasion, serca
Indove se cata el sestièr de San Poło.

San Poło el xé un sestièr de Venesia, catà al séntro de ła sità lagunar. El ga 5.058 abitanti.[1]

El sestièr el tol el só nome da Canpo San Poło, el più grando de Venesia daspò Piasa San Marco e ancora prima da ła Céxa de San Poło, che ła ga da el nome al canpo.

Geografia[canbia | canbia sorxente]

El sestièr de San Poło el confina a nord e a ovest co queo de Santa Cróxe, dal qual el xé divixo dal Rio de San Stae, el Rio Marin, e ła seconda parte de Rio de ła Frescada, fin a tuta ła parochia de San Pantałon.

El sestier de San Poło el confina a sud anca co Dorsoduro, méntre, per quel chel resta del perìmetro, el xé sircuìo dal Canal Grando.

Ła xona, per storia, più inportante ła xé Rialto, che ła gera na volta unia al sestièr de San Marco de ancuo al qual ła se cołiga traverso el Ponte de Rialto.

Pałaso Soranzo in canpo San Poło.

Storia[canbia | canbia sorxente]

Ła xona coverta dai sestièri de ancuo de San Poło e Santa Cróxe ai prinsipi de ła storia de Venesia ła faxeva un'ùnega granda àrea ciamada Luprio. In sta àrea qua ła Serenìsima ła gaveva łe sóe sałine.

El sestièr de ancuo el covre parte del nùcleo orixenal de ła sità de Venesia: ła tradision ła vol che ła céxa de San Giàcomo ła sia ła più antiga de Venesia e che ła sia stada fata xà ai prinsìpi del V sècoło.

Monumenti e céxe[canbia | canbia sorxente]

Ła parte del sesier che ła xé, decixamente, de magior inportansa stòrega ła xé ła xona de Rialto, col só Ponte, el tìpego marcà de pése e verdura e ła Céxa de San Giàcomo de Rialto, drio ła tradision considerada ła più antiga de Venesia. Ła prima costrusion de sta céxa infati ła par che ła vegna dai prinsipi del V sècoło, dónca prima che el nùcleo sitadin de Venesia el gabia ancor tólto forma.

De granda inportansa architetònego e artìstego łe xé anca ła Baxìłica de Santa Maria Glorioxa dei Frari e ła Céxa de San Roco.

Ghe xé anca dó Scółe Grande, ła Scóła Granda de San Roco, verta anca ai giórni de ancuo, e ła Scóła Granda de San Zuane Vangełista, co ła céxa tacada, tute e dó verte póche volte.

Note[canbia | canbia sorxente]

  1. Servisio de statìstega del sito del comun de Venesia
Sestièri de Venesia
Canarégio · Casteło · Dorsoduro · Santa Cróxe · San Marco · San Poło
Venezia-Stemma.png