Santa Cróxe (sestièr)

Da Wikipedia, l'ençiclopedia libara.
Va a: navigasion, serca
Indove se cata el sestièr de Santa Cróxe

Santa Cróxe el xé un sestièr de Venesia, co na popołasion de 5.369 abitanti.[1]

Geografia[canbia | canbia sorxente]

El sestièr de Santa Cróxe el confina a sud e a est col sestièr de San Poło, dal qual el xé separà dal Rio de San Stae, el Rio Marin e ła prima parte de Rio de ła Frescada, fin a ła parochia de San Pantałon.

A sud el confina col sestièr de Dorsoduro a Corte Gało e Corte Barbo. A nord el ga el Canal Grando e el xé cołigà a Canarégio traverso el Ponte dei Scalzi e el Ponte de ła Costitusion.

Vista del Rio de San Zan Degołà dal ponte Bembo

Se no considerémo ła xona del Troncheto, tirada su miga tanto ténpo fa, el sestièr el xé el più pìcoło de ła sità.

Storia[canbia | canbia sorxente]

El nome sestièr el xé stà tólto da ła Santa Cróxe de Hierusalem, infati ghe gera na céxa dedicada a eła, che però ła xé stada butada xó daspó l'invaxion de Napoleon.

Sto sestièr qua per intèro, asieme a na parte de San Poło, el partegneva 'ntei ténpi antighi a queła xonca ciamada Luprio, indove ghe gera paréce sałine.

Santa Cróxe el xé el sestièr che, durante el XX sècoło, el xé stà influensà più de tuti i altri da ła conesion intrà Venesia e ła teraferma, prima co ła costrusion de ła Stasion Marìtima e daspò co ła creasion de ła xona di Piasal Roma, có che i ga verto el Rio Novo e i ga tirà su el parchegio-ìxoła artifexal del Troncheto, tute conseguénse łigae a ła costrusion del Ponte de ła Libartà 'ntel 1933, chei ga desformà ła parte nord del sestièr 'nte ła meta riservada a łe màchine e ai bus de ła sità łagunar. Sto qua el xé l'ùnego sestièr de ła sità łagunar 'ntel qual ghe xé na pìcoła parte indove se pol pasar co màchine, anca se el pasagio el xé bastansa łimità.

Ca' Pesaro

Monumenti e céxe[canbia | canbia sorxente]

Pol darse che, anca perché nol xé miga tanto grande, sto sestièr el xé ła xona manco rica d'arte de ła sità. Ła se particołarixa per łe całéte stréte intervałae da póchi canpi.

Intrà łe póche céxe, da véder łe xé San Giàcomo dal'Orio, San Stae e San Nicola da Tołentin. Da recordar anca łe xé łe dó consacrae a San Simeone: na ła xé dita San Simeon Grando, l'altra San Simeon Pìcoło. Sti agetivi qua i se riferise soło al'inportansa del santo al qual i xé dedicai e per gnénte a ła grandésa dei edifisi, atexoché ła céxa de San Simeon Grando ła xé davèro più pìcoła de queła, monumental, de San Simeon Pìcoło.

I edifisi de magior inportansa i se cata łóngo el Canal Grando. Intrà sti qua resalta de inportansa Ca' Pesaro, che ła xé sede del Muxeo d'arte oriental de Venesia e de ła Gałeria internasional d'arte moderna de Venesia indove łe xe mése a véder opre de desferénti autóri inportanti, infrà i quai Gustav Klimt, Vasilij Kandinskij e Matisse.

Note[canbia | canbia sorxente]

  1. Servisio de statìstega del sito del comun de Venesia
Sestièri de Venesia
Canarégio · Casteło · Dorsoduro · Santa Cróxe · San Marco · San Poło
Venezia-Stemma.png