Céxa de San Stae

Sto articoło el xe scrito in venesian.

La fasàda de ła Céxa de San Stae so'l Canal Grando

La céxa de San Stae (o Sant'Eustachio e Conpagni martiri) xe un edificio lerigióxo de ła sità de Venesia, situà 'ntel sestièr de Santa Croxe, 'ntel canpo omonemo.

Indice

1 Storia
2 Descrisión
3 Gałarìe de somegie
4 Siti da vardàr
5 Note
6 Altri progeti

Storia [canbia]

Xe ancora da ciarìr l'orìxene de ła céxa. Segóndo Giuseppe Cappelletti sarìa stàda caxamentàda da Obelario, primo vescovo de Ołivoło, verso ła fin del VIII secoło. Le croniche, invese, aferma che gera stàda fondàda 'ntel 966 da łe famegie Tron, Zusto e Adoaldo. Tutociò, el cronista Andrea Dandolo, che gà descrito el pexòco incendio del 1105, no ła minsona e ła prima testimoniansa serta xe un documento del 1127, dove xe ricordàda cofà parochia filiałe de San Piero. 'Ntel 1331 xe invese ricordàda come cołegiada. Segóndo quanto che riporta i rexoconti de łe vìxite pastorałi del Setesento, San Stae xera 'na parochia popołoxa, rica e vitałe e i so paròci gera anca canonici de ła baxełega de San Marco. Co' łe stride de Napołeon, gera deventàda retoria de San Cassian, ma xe tornàda parochiałe 'ntel 1953. Anpo', ła xe stàda sopresa da nòvo 'ntel 1965. Da l'ano drìo xe 'na retoriałe indipendente ^[1].

Descrisión [canbia]

Al so interno xe conservàe alcune òpare dei pì sełebri artisti venesiani barochi de inisio setesento. Ghe trovemo dipinti de Sebastiano Ricci, Giambattista Tiepolo, Giovanni Battista Pittoni e Giovanni Battista Piazzetta. La céxa xe stàda progetàda da Domenico Rossi. La costrusión de ła fasàda ghe xe stà fidàda 'ntel 1709; ła gà ła forma de un tenpio, co' un inponénte frontón triangołàr, sostegnùo da cołone che puxa su èrti pedestałi. Tìpegamente baroca xe ła ghinberga a tìnpano scavesà so'l portàl de intràda. Qui xe stài tumułài do doxi: Alvise II Mocenigo 'ntel 1709, soto ła granda tavèła al centro de ła céxa, e Marco Foscarini 'ntel 1763, ne ła capèła de famégia.