Sestièr

Da Wikipedia, l'ençiclopedia libara.
Va a: navigasion, serca
Sestieri di Venezia.svg
Sestieri di Venezia:

    Canarégio
    Casteło
    Dorsoduro
    San Marco
    San Poło
    Santa Cróxe

El sestièr el xé na de łe sie xone che łe divide ła sità de Venesia. El val come el quartièr de łe altre sità, chel raprexentava ła quarta parte del'acanpamento roman, schema ideal de ła costrusion de un gran nùmero de séntri abitai del'Europa.

Ła divixion sitadina in sestièri ła ghe xé fin da ła nàsita de Venesia. Ła numerasion sìvica ła xé ùnega per ogni sestièr, co qualche ecesion per xone più grande come łe ìxołe che no łe xé miga cołigae co pónti, e ła riva a nùmeri a quatro sifre. Sto particołar sistema de numerasion, asieme a ła natural conpresità de łe całe de Venesia, ła ga come conseguénsa che ghé xé, qualche volta, dó nùmeri sìvisi davèro desferénti anca se i xé bastansa visini.

I sestièri de Venesia i xé:

  • Canarégio, ciamà cusì perché el xé stà tirà su in na xona pałudoxa indove ghe gera piena de canèi;
  • Casteło, chel ga tólto el só nome da na fortésa ancuo descomparsa intórno a ła qual ła se ga formà l'àrea;
  • Dorsoduro, pol darse che sto nome el se riferisa a łe sode dune de sabia de sto łógo qua;
  • San Marco, el tol el nome da ła baxéłega;
  • San Poło, el tol el nome da ła céxa de San Poło;
  • Santa Cróxe, el più pìcoło, se no se consìdera anca el Troncheto e ła stasion.

Ste divixion qua no łe covre miga tuto el spasio del séntro stòrego de Venesia. Łe ìxołe de ła Giudeca łe fa parte de Dorsoduro, l'ìxoła de San Zorzi Mazor de San Marco e l'ìxola de San Michièl, in dove se cata el simitero sitadin, de Casteło.

Se parla de sestièri anca 'nte łe ìxołe de Buran e Pełestrina, anca se łe ga ła prima sinque e e l'altra quatro division.