Projeto:Istòria/Sitadini veneti ilustri

Sta qua la xe na lista dei tuti i sitadini veneti ilustri de na olta, cioè de tute quele persone famose ligà, par nàsita o par verghe vissù a longo, a la vecia Republica Veneta, che le sàvia particolarmente distinto par la so atività in canpo cultural, artistico, etc. I Veneti de prima e de dopo del periodo de la Republica no i ghe xe su sta lista, parché no i xe sitadini veneti in senso stretto.

Archiologi

L'archiologo veneto forsi pi famoso el xe el padoan Giovanni Battista Belzoni (Padoa 1778 – Nigeria 1823), che ai primi de l'Otozento ghè tocà scapar via dal Veneto dopo che xe rivà Napoleon, par no dover far el soldà ne l'esercito francese, e el xe rivà in Egito. Qua el sà messo a far l'archiologo, scoprendo tra le altre robe la tonba del faraon Seti I, una de le pi bele de la Val dei Tenpli, e l'entrada de la piramide de Chefren.

Architeti

La Basilica Palladiana a Vicensa

El pi grande architeto veneto de senpre el xe sicuramente Andrea Palladio (Pàdoa 1508 - Maxer 1580), che el ga laorà specialmente a Vicensa (la sità del Paladio par ecelenza) ma anca a Venexia e ne le aree vizine. Tra i so laori pi famosi ghe xe la basilica Palladiana de Vicensa, Vila Capra dita la Rotonda e el Teatro Olimpico de Vicensa. Ispirandose ai principi de l'architetura classica, el ga dato vita a un novo stile architetonico, ciamà el Paladianesimo, che lu stesso el ga definìo nel so scrito I Quattro Libri dell'Architettura (1570). La so opera la xe stà portà vanti in maniera originale da Vincenzo Scamozzi (Vicensa 1548 – Venexia 1616), che el ga terminà la costruzion de Vila Capra e costruìo le Procuratie Nove in piaza San Marco a Venexia. N'altro architeto famoso el xe sta Baldassare Longhena (Venexia 1598 – Venexia 1682), alievo de Scamozzi, che el ga costruìo la baxéłega de Santa Maria de la Salute a Venexia, una de le opere pi inportanti del barocco italian e veneto.

Jacopo Sansovino (Firenze 1486 – Venexia 1570), scapà via da Roma nel 1527 quando i lanzichenechi i ga sachegià la sità, el ga catà riparo a Venexia (entrando in seguito nel patriziato veneto), in do che el ga costruìo le Procuratie vece, la loggeta del Canpanil de San Marco, la Biblioteca Marciana e altri palazi.

Nel canpo de l'architetura militar, el veronese Michele Sanmicheli (Verona 1484 - Verona 1559) el se ga dedicà a rinforzar le fortificazioni (secondo i cànoni de la "fortificazion a la moderna", cioè con i bastioni e varie tèniche par tegner bota ai bonbardamenti de l'artilieria) nei vari posedimenti veneti (oltre a Verona, Candia, Dalmazia, Corfù, Cipro). El ne ga lassà inportanti òpere come Porta Nova, Porta Palio e vari palazi a Verona e Porta Teraferma a Zara.

Un gran teorico de l'architetura el xe sta el venexian Carlo Lodoli (1690-1761), che el ga antisipà el conceto moderno de funzionalismo. Purtropo tuti i so scriti i xe 'ndai perdui, e le so teorie le se conosse solo 'traverso i so alievi, come el patrizio venexian Andrea Memmo (Venexia 1729 - 1793), el famoso progetista del Prà de la Vale a Padoa.

El Pantheon de Roma, incision de G.B. Piranesi

Giovan Battista Piranesi (Mogliano Veneto 1720 – Roma 1778) el xe famoso soratuto par le so incision che rafigura monumenti famosi, rapresentà in tuta la so grandiosità e dramaticità. Le so incision le ga vu na grande influenza nel periodo del Neoclasicismo, permetendo de riscoprir l'arte romana antica in tuta la so magnificenza.

Giuseppe Jappelli (Venexia 1783 – Venexia 1852) el xe sta uno dei pi grandi esponenti del Neoclasicismo in Veneto e specialmente a Padoa, in do che el ga realizà tra l'altro el Cafè Pedrocchi.

Artisti

La pitura venexiana del Rinasimento la xe sta particolarmente prolifica e piena de talenti. I pitori pi conossiùdi de sto periodo i xe:

• Giovanni Bellini (1430 zirca – Venexia 1516)
• Andrea Mantegna (Isola de Carturo, Piazzola sul Brenta 1431 – Mantoa 1506)
• Vittore Carpaccio (Venexia o forsi Capodistria 1460 zirca - 1525/1526)
• Giorgione (pseudonimo de Giorgio o Zorzi da Castelfranco, Castelfranco Veneto 1478 – Venexia 1510)
• Tiziano Vecellio (Pieve de Cador zirca 1490 – Venexia 1576)
• Paolo Caliari dito el Veronese (Verona 1528 – Venexia 1588)

Amore e Psiche, A. Canova

La pitura de la scola venexiana la ga vu n'altro grando momento de splendor nel Setesento, con pitori come:

• Giambattista Tiepolo (Venexia 1696 – Madrid 1770)
• Giovanni Antonio Canal dito el Canaletto (Mestre 1697 – Venexia 1768)
• Francesco Guardi (Venexia 1712 – Venexia 1793)

Tra i scultori de sto periodo el pi famoso xe sicuramente Antonio Canova (Possagno 1757 – Venexia 1822), autore de le famose statue de Amore e Psiche, de le Tre Grazie e de la statua de la principessa Paolina Borghese.

Esploradori e navigadori

El pi famoso viajador veneto el xe sicuramente Marco Polo (Venexia 1254 - Venexia 1324), che insieme con so upà Nicolò e so zio Maffio el xe sta uno dei primi osidentali a rivar nel Catai (la Cina de desso), e el ga riportà la storia del so viajo e de tute le maraveje chel ga vedesto nel libro El Miłion.

El capitan Pietro Querini el xe inveze famoso parché in un so viajo verso le Fiandre nel 1431-32, la so nave la xe sta portà via da na tonpesta e la ga fato naufragio su l'isola de Røst, ne l'arcipelago norvegese de le Lofoten. El xe restà lì quatro mesi insieme ai so marineri, fasendo amicizia con quei del posto, che i canpava pescando merluzzi che dopo i metea a 'sicar par conservarli a longo. Querini el ga riportà a Venexia sti péssi, ciamai stoccafissi, che da de lora i xe entrai stabilmente ne la cuxina (e ne la cultura) veneta col nome de bacalà.

Dopo de lu, nel periodo de le grande descoverte giografiche (XV - XVI secolo), diversi Veneti i ga partesipà ai primi viaj de esplorazion. Sicome che la Republica Veneta, par la so posizion giografica, la se catava tajà fora da le nove rotte comerciali, e la preferéa tegnerse bone quele vece, sti qua i xe spesso entradi al servizio de na potenza straniera. El primo el xe sta Alvise Cadamosto (Venexia 1432 – Venexia 1488), che par conto del Portogal el ga esplorà l'Africa Osidental, scoprendo na parte de le isole del Capo Verde. Nel 1497-1498 Giovanni Caboto (nato a Gaeta o forsi a Savona nel 1450 zirca, ma naturalizà veneto - 1498) el ga esplorà par primo le coste nord-est de la Merica, scoprendo Teranova, par conto del re d'Inghiltera. So fiol Sebastiano Caboto (Venexia 1484 – Londra 1557) el ga navigà anca lu prima al servizio dei inglesi, e dopo dei spagnoli, esplorando l'estremità sud de la Merica. El visentin Antonio Pigafetta (Vicensa, ca. 1491 - dopo 1534) el ga fato parte inveze de la spedizion, ai ordini de Ferdinando Magellano, che ga fato el primo viajo intorno al mondo. Pigafetta el xe sta uno dei 18 òmeni che i xe sta boni de tornar indrio, e el nà lassà un resoconto de l'aventura, la Relazione del primo viaggio intorno al mondo.

Leterati, poeti e scritori

La storia de la leteratura in lengoa veneta la xe ligà soratuto a du autori de teatro: el primo el xe Angelo Beolco dito el Ruzante (Padoa o forsi Pernumia, 1496 zirca - Padoa 1542), conossiùo soratuto per el Primo Dialogo - Parlamento de Ruzante che iera vegnú de campo e el Secondo Dialogo - Bilora, opere in cui el mete in scena el mondo rùstego dei contadini pavani, rapresentà in tuta la so realtà de miseria, disperazion, sfrutamento e ingiustizia. El secondo el xe Carlo Goldoni (Venexia 1707 – Parigi 1793), autor de comedie in italian e in venezian, che ne la so opera el na lassà un straordinario afresco de la vita e dei costumi de la gente de l'epoca.

Luigi da Porto (Vicensa 1485 - Vicensa 1529) el vien ricordà par la Historia novellamente ritrovata di due nobili amanti, da cui ga tolto l'ispirazion William Shakespeare par el so Romeo e Giulieta.

Lorenzo da Ponte (Ceneda 1749 – New York 1838) el xe sta un poeta e libretista, conossiùo par ver scrito el libreto de tri capolavori de Mozart: Le nozze di Figaro, Don Giovanni e Così fan tutte.

Na figura emblematica del Setesento venexian la xe quela de Giacomo Casanova (Venexia 1725 – Dux, odierna Duchcov 1798), scritor, diplomatico e agente segreto, ma ricordà soratuto come aventuriero e come quelo che el ga fato del so nome el sinonimo de sedutor.

Nel canpo de la poesia, i Veneti più noti i xe Ugo Foscolo (Zante 1778 – Londra 1827), poeta e patriota talian e Ippolito Pindemonte (Verona 1753 – Verona 1828), famoso par la so traduzion de l'Odissea de Omero.

Musicisti e conposidori

Nel canpo de la musica, nel periodo del Barocco se ga distinto Antonio Vivaldi (Venexia 1678 - Viena 1741), autor de le famosisime Quatro Stagioni, Tomaso Albinoni (Venexia 1671 – Venexia 1751) e Evaristo Felice Dall'Abaco (Verona 1675 – Monaco de Baviera 1742).

Antonio Salieri (Legnago 1750 – Viena 1825), oltre che par la so musica, el xe deentà forsi anca pi famoso par la so presunta rivalità con Mozart, che in realtà par che la fusse solo na invenzion leteraria.

Religiosi

Diversi veneti i xe rivà a posizion inportanti ne la gerarchia de la Cesa Catolica. Tra i papi gavemo:

• Gregorio XII (Angelo Correr, Venexia ca. 1326 – Recanati 1417, papa 1406-1415)
• Eugenio IV (Gabriele Condulmer, Venexia 1383 – Firenze 1447, papa dal 1431 a la morte)
• Paolo II (Pietro Barbo, Venexia 1417 – Roma 1471, papa dal 1464 a la morte)
• Alessandro VIII (Pietro Vito Ottoboni, Venexia 1610 – Roma 1691), papa dal 1689 a la morte)
• Clemente XIII (Carlo della Torre di Rezzonico, Venexia 1693 – Roma 1769, papa dal 1758 a la morte)
• Gregorio XVI (Bartolomeo Alberto Cappellari, Belun 1765 – Roma 1846, papa dal 1831 a la morte)

Paolo Sarpi

Na figura particolare ne la storia de la Cesa a Venexia la xe quela de Paolo Sarpi (Venexia 1552 – Venexia 1623). Pensador, teologo, religioso de l'Ordene dei Servi de Maria, Sarpi el sa batùo par difendar la Republica Veneta da le ingerenze de la Cesa de Roma, vegnendo anca scomunicà. I ga anca proà a coparlo co na pugnalada, ma el xe sopravissù.

Paolo Sarpi, Istoria del Concilio tridentino, 1935

El xera contrario al potere tenporale dei papi, al processo de mondanizazion del clero e al prinsipio de la superiorità del papa sul Concilio. Par sti motivi el xera anca in contato coi Protestanti, e el ga scrito na Istoria del Concilio Tridentino in do che el criticava el Concilio de Trento, che secondo lu l'era solo un mezo par afermar la superiorità del papa. El xera anca amigo de Galileo Galilei, e el ga fato diverse descoverte sientifiche, come le valvole de le vene e el fato che la pupilla la se dilata soto l'azion de la luce.

Siensiati, dotori e inventori

Girolamo Fracastoro (Verona 1478 – Incaffi 1553), medico, fiłoxofo, 'stronomo, giografo, teołogo e leterato, el xe noto soratuto par i so studi so ła patologia.

Giovanni Soro (m. 1544), critografo e critanalista conosùo par esar stà el primo Segretario a łe Çifre de ła Republica Vèneta, ma anca cofà pare de ła moderna critołogia e on dei pì grandi critanałisti.

Prospero Alpin (Maròstega 1553 – Pàdoa 1617), medico e botanico, el ga descoverto el conçeto de difarenda sesuał 'nte łe piante. El xe famoxo parché el xe stà el primo a far conosar a Venesia e in Europa el cafè, de cui el ga parlà 'ntel so libro De Medicina Egyptiorum del 1591.

Varda anca

• Un elenco dei Doxi pi ilustri el se cata su la pagina Doxe; se pol vardar anca la lista de tuti i Doxi de Venexia