Marco Polo

Da Wikipedia, l'ençiclopedia libara.
Jump to navigation Jump to search
Marco Polo

Marco Polo (Venesia, 15 de setenbre 1254 - Venesia, 29 de genaro 1324) el xe stà un marcante e esplorador itałian. Insieme co so pare Nicolò e 'l so barba Maffeo el xe stà on dei primi osidentałi a rivar fin in Sina (che lu el ciamava Catai) longo ła via de ła séda. Ła cronaca del so viajo ła xe contà 'nte'l libro Deuisament dou monde, mejo conosùo come el Miłion. El xe ritegnùo on dei pi grandi esploradori de tuti i tenpi.

El viajo[canbia | canbia el còdaxe]

Nicolò e Matteo Polo i xera do fradei venesiani che i traficava spéso con l'Oriente, e inte el 1252 i xera nà star a Costantinopołi, da 'ndove i xe partìi inte el 1259 direti verso Est, rivando infine inte el 1266 a Khanbaliq, el vecio nome de Pechin, dove i xe stà risevùi dal Gran Khan dei Mongołi. Tornai na prima 'olta a Venesia, i do fradei i xe ripartìi inte el 1271 insieme co'l fiol de Nicolò, Marco, che'l gavea 'pena disete ani, rivando quatro ani dopo a Khanbaliq. I Polo i xe restai in Cina par altri 17 ani, e Marco el xe deentà un streto cołaborador e amigo del Khan, che el lo mandava in mision diplomatiche in giro par el so inpero, e el se faxea descrìvar da lu łe tere che'l gavea visto inte i so viaji e łe storie che'l gavea sentìo.

Dopo el so ritorno a Venesia inte el 1295, Marco Polo el xe stà ciapà dei Xenovexi durante un scontro naval, e el xe stà tegnù prigioniero par calche mexe, durante sto periodo de tenpo el gà detà ła storia del so viajo a fra' Rustichello da Pixa, che'l la gà scrita inte el Miłion.

Controversie[canbia | canbia el còdaxe]

In Croàsia se dixe che Marco Polo sia nasuo inte l'ixoła dalmata de Curzoła e donca el xè croato. No ghe xé però nisuna evidensa storica de sto fato.

Controło de autoritàVIAF (EN173430120 · ISNI (EN0000 0003 5589 5756 · LCCN (ENn79055818 · GND (DE118595563 · BNF (FRcb11920191p (data) · BNE (ESXX894006 (data) · NLA (EN35321009 · BAV ADV11889800 · CERL cnp01318197 · NDL (ENJA00453065 · WorldCat Identities (ENn79-055818
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Marco_Polo&oldid=896418"