Piasa San Marco

Da Wikipedia, l'ençiclopedia libara.
Va a: navigasion, serca
Vista de Piaza san Marco
Piaza san Marco de nòte

Piaza San Marco xe la prinçipałe e soła piaza de Venesia (tute staltre struture che ghe someja łe se ciama canpi). Cofà che dixe el nome, ła piaza ła xe dedicada a San Marco, l'evangelista. Xe dal sinboło de San Marco che Venesia ga ciapà el suo, che xe el Leon de San Marco.

Pianta de la piaza (1831)

Descrision[canbia | canbia sorxente]

Cor de la sità lagunare e logo sinbolo del Stato veneto, la xona monumental de Piaza San Marco la se conpone de tri setori:

  • la piazeta dei Leonzini, propagine osidental a rente de la baxéłega e prospicente el Palazo Patriarcal, ciamà cussitapar via de le do statue de leoni cucià che delimita l'area sentral sopraelevà.

Storia e evoluzion[canbia | canbia sorxente]

La forma che ga la piaza desso la xe vegnù fora a seguito de sucessive modifiche e espansion che le ga interessà l'area. In origine la xona la jera destinà a brolo e traversà dal rio Batario, che tacava insieme i atuali rii de la Zecca e del Cavalletto. El palazo dogal, vero castel munìo de tori e difese el jera zircondà par intiero da un canal e frontegià ne la xona de la piazeta de desso da un bacino par cargar e descargar le merci.

Co xe rivà a Venexia el corpo de San Marco ne l'828, xe sta edificà la prima baxéłega de San Marco e l'area la ga scuminsià a assumar la so carateristica de cor monumentale de la sità.
Nel 976 l'intiera xona, con la baxéłega e el palazo, la xe sta brusà da un furioso incendio, ma zà nel 978 xe sta costruìa na seconda baxéłega e ricostruìo el palazo. La baxéłega de desso la risale ai anni 1050-1094, con la terza fondazion de l'edificio.
In sta epoca la piaza la risultava 'ncora limità dal rio Batario (al delà del quale ghe jera na cesa dedicà a San Geminiano) e dal bacino de Palazo: a testimonianza del quale ne restà 'ncora desso, sul lato de la baxéłega rivolto verso la piazeta, na vecia porta d'aqua murà, cioè l'entrada rivolta su l'aqua tipica dei edifici venexiani.

Nel 1156, soto Vitale II Michiel, i ga interà prima el rio Batario e po anca el bacino antistante el Palazo Dogal, dove i ga realizà la Piazeta.
Nel 1172, soto el dogado de Sebastiano Ziani, la piaza la xe sta slargà 'ncora de pi par farghe posto a novi edifici monumentali: la cesa de San Geminiano i la ga spostà al limitare de la nova piaza San Marco e i ga inoltre tirà su le do grande colone frontegianti el molo, come entrada monumental a l'area marciana.
Nel 1204 la conquista de Costantinopoli con la Quarta Crociata la ga fornìo ai venexiani un mucio de marmi e opere d'arte con cui decorar la baxéłega e la piaza. In sta ocasion qua xe rivà i Cavai de San Marco, sistemà a coronamento de la baxéłega, e la statua dei Tetrarchi, che desso xe a l'entrada del palazo.
Nel 1264 i ga infine pavimentà la piaza con quarei messi zo a spina de pésse.


Tra el 1301 e el 1442, co na continua e massicia serie de laori, Palazo Dogal el ga perso progresivamente el so aspetto militare fin a assumar la conformazion de desso.
Tra el 1495 e el 1517 i ga inveze costruìo le Procuratie Vece e la Tore de l'Orologio, mentre contenporaneamente se procedea al sgónbaro de tuti i broli e i magazini 'ncora presenti ne l'area de la piaza. Tra el 1536 e el 1540 el Sansovino el ga realizà l'edificio de la Libreria e la Logeta ai pié del canpanil. Tra el 1582 e el 1640 xe sta la olta de le Procuratie Nove.

Nel 1722 i ga sistemà le do statue de la Piazetta dei Leonzini. Del 1723 xe inveze la pavimentazion de desso in trachite euganea a fasce laterali in marmo bianco.
Xe infine nel 1807 che la dominazion napoleonica la ga procedùo a butar zo la cesa de San Geminiano e a costruir l' Ala Napoleonica (dita anca Palazo Reale o Procuratie Novissime), dandoghe al conplesso de l'area marciana l'aspeto definitivo.

A le prime ore de la matina de luni 14 de lujo 1902 el canpanil de San Marco, zà tacà da na vistosa crepa, el xe ruinà inprovisamente demolendo la Logeta e un canton de la Libreria e ris-ciando de investir la stessa baxéłega (i ruinazi i xe sta fortunosamente fermà da la Piera del Bando posta al canton tra la cesa e el palazo). In poco tenpo la tore la xe sta ricostruìa e i danni giustà, fasendo anpio ricorso ai materiali originali 'ncora doparabili.

Utilizo de l'area[canbia | canbia sorxente]

Cor, come dito, de la Republica Veneta, la piaza la ga senpre seguìo la vita e i costumi de la sità. El Palazo Dogal el xera sede del goerno e de le supreme magistradure de la Republica, nonché preson. Tra le do colone de Marco e Todaro i fasea inveze le esecuzion capitali, mentre da la Piera del Bando vegnea anunzià le leggi e i decreti, che dopo i tacava via su la Porta de la Carta. La baxéłega la jera inveze el sentro de le cerimonie religiose de Stato grazie a la presenza de le preziose reliquie e de la so funzion de cappella dogal, in un sistema nel quale el Doxe el jera el capo de la cesa venexiana e el se riservava el dirito a nominar i vescovi. El potere e la richeza de la cesa de San Marco i xera tali che la gavea un so vescovo, distinto da quel de la sità e dal patriarca, el Primicerio de la baxéłega de San Marco e che dei magistrati aposta, i Procuradori de San Marco i 'ministrava con carica vitalizia el patrimonio, risiedendo ne le Procuratie. La Logeta la xera el posto de guardia dei arsenalotti durante le sedute del Maggior Consiglio, mentre l'atuale Palazo Patriarcal el jera sede del salone par i pranzi e le feste del Senato.

La granda piaza la ospitava procesioni e tornei, fiere e marcà, ne la corte del palazo se tegnea le cacce ai tori. Nel Setezento xe conparso el carneval e i cafè, po dopo la caduta de la Republica xe rivà la sede patriarcale e el Palazo Reale, prima de Napoleon, dopo dei Asburgo e infine dei Re d'Italia. Infine la musealizzazion con l'apertura del Museo Correr.

Monumenti e musei[canbia | canbia sorxente]

Galeria de foto[canbia | canbia sorxente]

Varda anca[canbia | canbia sorxente]