Pian Marshall

Pòster del Pian Marshall, co scrivesto: "In calsìase sircostànsia, se riva al benstare solché unii".

El Pian Marshall, ufisalmente ciamà European Recovery Program, el ze sta uno dei piani pułìtego-econòmeghi statunitensi par ła recostrusion de l'Eoropa dopo de ła seconda guera mondiałe. El ze sta anunsà inte un discorso del segretàrio de Stato statunitense George Marshall inte el 5 de zugno del 1947 inte l'Università de Harvard e i vegneva inpegnai pì de 12,7 miłiardi de dòłari.

Istòrego

Discorso de consepimento

El discorso col cuało el segretàrio de Stato statunitense del tenpo George Marshall el ghea anunsà al mondo ła decizion dei Stati Unii d'Amèrica de tacar ełaborar e l'atuar un pian de juti econòmego-finansiari par l'Eoropa che dopo, par convension storiogràfega, el saria sta conosesto cofà "Pian Marshall", el ze sta sensa dùbio uno dei momenti pì inportanti de ła stòria de ła pułìtega internasionałe del secondo dopoguera.

Marshall el ghea afermà che l'Eoropa ła garia avesto bezogno, almanco par altri 3 - 4 ani, de grandi juti da parte statunitense e che, sensa de sti cuà, granda parte del vècio continente el garia pasà un stra-grave deterioro de łe condision pułìteghe, econòmeghe e sociałi. Siben che el fuse sta tanto vago so łe caraterìsteghe del Pian, anca parché prima el vołea descórar so ła predispozision dei tèrmani coi eoropei, el segretàrio de Stato el se ghea augurà che da sto fondo se podese vèrzar no solché na nova e pì granda època de cołaborasion intrà łe do sponde de l'Atlàntego, ma anca na prima reałizasion de tuti i projeti eoropeisti fin deso caraterizai da na serta vaghesa utopìstega.

Reałizasion

L'idea de Marshall, che ła zera vegnesta de fato za comunicada ai inglezi, ła zera stada colzesta co favor anca da ła Fransa, che, parò, ła ghea dimandà de esténdar łe reunion preparatòrie anca a l'Union Soviètega che, dopo un prinsìpio de manifestasion de intarese, ła se ghea refudà partesipar al negòsio, obigando anca tuti chełi altri paezi del bloco orientałe e comunista de far conpagno.

El Eoropean Recovery Program (ERP) el ghea prevedesto a ła fin un fondo de poco pì de 14 miłiardi de dòłari par un perìodo cuadrienałe. Col fin de favorir na prima integrasion econòmega inte el Continente, el zera nasesto anca el Organization for Eoropean Economic Cooparation (OEEC, in vèneto OECE), organismo tècnego andove i programatori inviai da Washington i ghea sercà de spénzar i goerni eoropei a doparar i juti miga solché par far fronte ai problemi del momento, ma anca par métar in pie un prosedimento de trasformasion de ła strutura de l'economia dei so Paezi.

Contrariamente a l'augùrio fazesto inte el prinsìpio da Marshall, cuazi tuti i adezionadori al pian, i ghea dimandà el juto par ła cronpa de ałimenti de nesesità baziłare, prodoti industriałi, conbustìbiłe e, solché in mìnema parte, machinari e mezi de produsion che de longo tèrmeno, i garia podesto frutar a łe economie. Inte l'iteso tenpo sentenari de consejeri econòmeghi statunitensi i zera stai mandai in Eoropa, e ghe ze sta consentio a studiozi e esperti eoropei de vizitar inpianti industriałi e de frecuentar corsi de istrusion inte i Stati Unii.

• 
  Targheta picada sui pacheti de juti
• 
  I juti del pian in Gresa

Consevense

El Pian el zera fìnio, cofà prevedesto in prinsìpio, inte el 1951 e i tenti de slongàrghene par calche ano l'efeto no i ga avesto bon èzito par via del s-ciopo de ła guera de Corea e de ła vitòria dei republegani inte łe ełesion par el Congreso de l'ano prima.

Par cualche tenpo un mùcio de economisti statunitensi se ghea zudegà negativamente l'inpatamento del Pian Marshall su l'economia eoropea dato che, par so opinion, el ghea produzesto efetivamente na crésita sostegnesta, ma gràsie al baso costo del lavoro, roba che - no gavendo induzesto na contenporànea crésita dei rèditi - el gaveva portà verso de na serta stagnasion inte ła speza e inte i consumi. In realtà - cofà dimostrà da łe anàłize dei ùltemi ani - el Pian el ga consentio a l'economia eoropea de suparar un momento de crize e el ghea favorio na recuperasion che za inte el 1948 ła zera evidente, consentendo ai Paezi benefisadori de suparare l'ìndaze de produsion pre-bèłego za inte el momento inte el cual el fluso de juti el zera finio.

Repartemento del fondo

El Pian Marshall el ze sta repartio intrà i paezi partesipanti so ła baze ła réndita pro càpite. De sevente na toła de łe repartision in milioni de dòłari USA:

Stato	1948-49 (milioni de dòłari)	1949-50 (milioni de dòłari)	1950-51 (milioni de dòłari)	Totałe (milioni de dòłari)
Zermània	510	438	500	1,448
Àustria	232	166	70	488
Belzo e Łusenburgo	195	222	360	777
Danemarca	103	87	195	385
Fransa	1,085	691	520	2,296
Gresa	175	156	45	366
Irlanda	88	45	—	133
Islanda	6	22	15	43
Itàłia	594	405	205	1,204
Norveza	82	90	200	372
Paezi Basi	471	302	355	1,128
Portogało	—	—	70	70
Regno Unìo	1,316	921	1,060	3,297
Svèsia	39	48	260	347
Svìsera	—	—	250	250
Turchia	28	59	50	137

Altri projeti

Altri progetti

• Wikimedia Commons

• Wikimedia Commons el detien imàjini o altri file so Pian Marshall
• el detien schemi gràfeghi so

Linganbi foresti

• (EN) Marshall PlanEnçiclopedia Britannica, Encyclopædia Britannica, Inc.