Che Guevara

Da Wikipedia, l'ençiclopedia libara.


Ernesto Guevara pì noto come Che Guevara (Rosario, 14 de zugno 1928La Higuera, 9 de otobre 1967) xe stà un [[rivołusion |rivołusionario]] [[Argentina |argentin]].


Che Guevara (1960)

El soranome de "Che" el ghe xe sta dà dai so conpagni de łota cubani in Mèsego, e el vien dal fato che Guevara, come tuti i argentini, el dixeva de frecuente l'ałocusion "che". Ła paroła ła deriva da ła łéngua Mapuche e vol dir "omo", "persona", e ła xe sta ciapà inte ło spagnoło parlà in Argentina e Uruguay, par ciamar l'atension de on interłocutor, o pì in xeneral, come on'esclamasion simile a "hey".

Biografia[canbia | canbia el còdaxe]

Cronołogia[canbia | canbia el còdaxe]

  • 1928-1930 - El nase a Rosario el 14 de zugno[1], primo de sinque fiołi, da Celia de la Serna e Ernesto Guevara Lynch. El ga pasà i primi du ani de vita inte el Nord de l'Argentina, inte ła xona de Misiones. El ga soferto de na forma cronica de asma e ła so fameja ła se ga trasferìo so ła Sierra de Alta Gracia, visin a Córdoba.
  • 1945-1950 - El se trasferise a Buenos Aires insieme a ła so fameja e el łaora come inpiegato munisipal pur frequentando ła Facoltà de Medisina. El fa el so primo viajo de 4.500 km in motorin insieme al so mejor amigo Alberto Granado.
  • 1951-1952 - El viaja atraverso el Ciłe e el Sud America fin a ła Florida.
  • 1953 - El se laurea e el parte par on terzo viajo atraverso el Sud America, stavolta in compagnia de on altro amigo, Carlos Calica Ferrer. El taca a intaresarse a ła połitega e el se avisina al comunismo.
  • 1954-1956 - El Conoce ła xovane peruviana Hilda Gadea che ła sposarà inte el '56. Da eła el ga avudo na fioła, Hildita. El se trasferise a Sità del Mèsego. El Conose Fidel Castro e el vien arestà insieme a altri cubani. El vien łibarado dopo sirca du mexi de prexon.
  • 1957-1958 -Come "dotor-guerijero" el partecipa al fianco de Castro a l'invaxion de ła Sierra Maestra a l'Avana e a ła Bataja de Santa Clara.
  • 1959-1960 - El diventa sitadin cuban e el entra a far parte del governo castrista come ministro de l'Industria e presidente de ła Banca Nasional. Par on serto periodo el xe diretor del carsere La Cabaña. El se marida co Aleida March da cui el gavaà quatro fiołi (Aleidita, Camilo, Celia, Ernesto). El fa viaji diplomateghi a l'estaro.
  • 1961-1964 - El partesipa a ła conferensa dei stati mericani a Punta del Este. El vien meso al comando de ła Difexa durante ła crixi de ła Baia dei Porci. El incontra a Algeri Ben Bella, el partesipa a Mosca ai festejamenti par el 47.mo aniversario de ła Rivołusion de Otobre, el intervien a New York a l'asenblea de l'ONU. Inte sta sircostansa el pronuncia a ła tełevixion mericana on durisimo discorso indove el riaferma ła so poxisone anti-cavedałistega. El parte par on łongo viajo in Africa.
  • 1965 - A marso el rientra a Cuba e l'apare par l'ultima volta in publico. El 1° de apriłe, inte na łetara a Castro, el anuncia łe so dimision da ogni carica e da sitadin cuban. Il mexe dopo el va segretamente in Congo par ajutar miłitarmente i rivoltoxi durante ła crixi del Congo. El ghe restarà fin a novenbre quando - altretanto clandestinamente - el fa rientro a Cuba. Insieme a on grupo de fedełi tra cui Tania el prepara on piano de guerija par portar ła rivołusion in Bołivia.
  • 1966 - A novenbre el 'riva soto falso nome in Bołivia e el taca a scrivare el "Diario".
  • 1967 - A causa de quache spion ła so posìbiłe presensa in Bołivia ła zera sta segnałà da ła stanpa. Nonostante sti avertimenti, l'exercito bołivian el xe ciapà de sorprexa durante alcune perlustrasion inte l'area del rio Ñancaguazu, afluente del rio Grande.Nonostante sti primi sucesi, ła guerija no l'incontra l'apozo dexiderà. Ł'opoxision de alcuni menbri del partio comunista bołivian, che i reclamava ła diresion de łe operasion, ła scarsa adexion de łe popołasion contadine, martełae da na propaganda nasionałista, contro l'invaxion straniera, da parte del governo ditatoriałe del generałe Barrientos, łe inospidałi rejon, coerte da boscaja spinosa e dexerti, e ła catura e sucesiva de ła sion, anca soto tortura, de alcuni menbri de ła guerija, i debiłita l'asion del Che. Ł'exercito fratanto el consołida łe poxision aumentando numaro e mesi dei conbatenti. Tra agosto e setenbre, oramai bracà da forse sostansialmente superiori, ła so presensa ła vien segnałà da alcuni contadini inte łe vałate tra el rio Grande e Pucarà. Ł'8 de otobre inte on scontro a fogo el vien ferìo a łe ganbe e caturà inte ła "quebrada del Yuro". El dì dopo el vien copà a sangue fredo inte ła scoła del viłajo de La Higuera par ordene de Barrientos. Felix Rodriguez, agente de ła CIA de orixine cubana, consijer miłitar de l'exercito bołivian, el ga scatà łe ultime foto in vita del Che.

Infansia e xoventù[canbia | canbia el còdaxe]

Ła caxa nadal de Ernesto "Che" Guevara a Rosario

Ernesto Guevara de la Serna el xe nato a Rosario, in Argentina, da na fameja de orixini spagnołe, basche e irlandexi. I xenitori i gerano Ernesto Guevara Lynch e Celia de la Serna.

Rełativamente a ła data de nàsita a se ga notisie discordi: inte ła biografia pì conpleta e documentada, queła redata da Jon Lee Anderson a vien cità l'afermasion de so mare, ła cuałe ła ga dito che ła data coreta ła xe el 14 de majo. El zera el primo de sinque fradei (tre mas'ci e do femene). (Ma so pare el gavarà da on secondo matrimonio co ła pitrice argentina Ana Maria Era altri 3 fiołi, Ramon, Maria Victoria e Ramiro)

Inte sta fameja, benestante e połiticamente de sanca, zà da putin el futuro Che el se ga fato notar par el dinamismo e łe sinpatie radicałi.

Nonostante el sofrise de asma (małe che costrinxarà i Guevara a trasferirse a Còrdoba e che ło ga aflito tuta ła vita), el se ga dedicà inte el sport, specialmente al rugby, co otimi risultati.

El ga studià dal 1941 inte el "Colegio Nacional Deán Funes" e, inte el 1948, el se ga iscrito a l'Università de Buenos Aires par studiar medisina. Dopo diverse interusion, el se ga łaureà inte el marso 1953, ma - probabilmente - no el fa finìo el tirocinio necesario par exercitar ła profesion medica.

El Sudamerica in moto[canbia | canbia el còdaxe]

Quando el zera oncora studente, Guevara el ga pasà parecio tenpo a viajàr in America Łatina. Inte el 1951 on so vecio amigo, Alberto Granado, el ga proposto a Guevara de ciapar on ano de pauxa dai studi in medisina par intraprendare el viajo atraverso el Sudamerica che par ani i se zera proposti de fare. Guevara e el so amigo Alberto i xe partii da ła sità de Alta Gracia a cavało de na moto Norton da 500 cc del 1939. Ła so idea ła zera queła de pasar qualche setimana inte el lebroxario de San Pablo, in Perù, so łe rive del Rio de łe Amasoni, a far atività de vołontariato. Guevara el ga cuntà sto viajo inte el diario "Latinoamericana" (Notas de viaje) da cui - inte el 2004 - a xe sta trato el film I diari della motocicletta.

Dopo aver visto tanta mixeria e influensà da łe łeture marxiste, el finìo col pensar che soło ła rivołusion ła gavarìa podesto risolvare łe difarense sociałi e econòmeghe de l'America Łatina. I so viaj i ghe ga fornio anca l'idea de non vedare el Sudamerica come tante diverse nasion, ma come on'unica entità, par ła łiberasion de ła cuałe a zera necesaria na strategia de respiro continentale. El ga scuminsià a imaginar ła posibiłità de na Ibero-America unìa e sensa confini, łigada da na stessa cultura (mestizo).

El Guatemała[canbia | canbia el còdaxe]

Dopo ła łaurea a ła scoła medica de l'Università de Buenos Aires inte el 1953, Guevara el ga riscuminsià a viajar, vixitando Bołivia, Perù, Ecuador, Panama, Costa Rica, Nicaragua, Honduras e El Salvador. El xe rivà infin in Guatemała dove el presidente Jacobo Arbenz Guzmán el guidava on governo popułista che el zeercava de portare avanti na rivołusion sociałe atraverso varie riforme, soratuto fondiarie.

Guevara el ga ciapà contato anca co difarenti exułi cubani, łigà a Fidel Castro, tra cui Antonio "Ñico" López, che el gaveva ciapà parte a l'ataco de ła caxerma "Carlos Manuel de Céspedes" a Bayamo, inte ła provincia cubana de Oriente, e che el sarìa morto al ponte Ojo del Toro poco dopo ło sbarco a Cuba de ła Granma.

Guevara el zera 'ndà par on periodo inte el Salvador par procurarse on novo visto e in seguito el zera ritornà in Guatemała. Inte el fratempo, el zera tacà el colpo de Stato de Carlos Castillo Armas, messo in ato co l'apoxo de ła CIA.[2] Łe forze contrarie a Arbenz no łe zera sta grado de arestar el trasporto de łe armi ceche so ferovia. In seguito parò, riorganizae e dotae de suporto aereo, łe ga tacà a guadagnar teren. Guevara el xe 'ndà drento inte na miłisia armada organizada dai xovani comunisti, ma ben presto a xe ritornà ai so inpegni medeghi. A seguito del colpo de Stato, Guevara el se zera presentà vołontario, ma Arbenz el ga consijà ai sostenidori dotai de sitadinanza estara de abandonar el paexe. Guevara par breve tenpo el se ga sconto inte el consołato argentin e po el se ga trasferìo in Mèsego.

El colpo de Stato contro Arbenz, apozà da ła CIA, el ga consołidà l'opinion de Guevara che i Stati Unii i fuse na potens inperiałista, che ła sarìa sepnre 'ndà contro i governi intensionai a ridure łe disparità econòmeghe, endemiche in America Łatina e inte i altri paexi in via de sviłupo. A sto punto el zera convinto che soło el sociałismo, ragiunto atraverso ła łota armada e difexo dal popoło in armi, el gavarìa risolto i problemi dei paexi poariti.

Ła Rivołusion cubana[canbia | canbia el còdaxe]

Poco dopo l'arivo in Mèsego, el se ga rimeso insieme ai altri exułi cubani che el gaveva incontrà in Guatemała. Quando Fidel Castro el xe rivà a Sità del Mèsego, so fradeo Raúl el ghe ga presentà Guevara. Dopo aver ciacoła tuta na note, Guevara el se ga convinto che Castro el zera el cao rivołusionario che el zera drio sercar e el ga aderìo al Movimento del 26 de lugjo che el gaveva intel programa de butare zo el ditator cuban Fulgencio Batista. Anca se i se zera mesi d'acordo che Guevara el sarìa sta el soło el dotor, el ga partesipà l'isteso a l'adestramento miłitar insieme ai altri menbri del movimento e, a ła fin del corso, el xe sta segnałà da l'istrutor, el cołoneło Alberto Bayo, come el pì bravo de tuti. El 18 de agosto 1955 Guevara el se ga maridà e el 15 de febraro 1956 a xe nata so fioła, Hilda Beatríz.

Quando, el 25 de novenbre 1956, ła nave Granma ła xe partìa da Tuxpan, in Mèsego (provincia de Veracruz) a ła volta de Cuba, Guevara el zera l'unico non cuban a bordo. El 2 de diçenbre i xe sbarcà a La Playa de las Coloradas, na zona pałudoxa visin a Niquero (Cuba sudoriental). Poco dopo i xe sta atacai dai miłitari de Batista e ła metà de luri i xe morti in conbatimento o sta copà dopo ła catura. I sopravisui, sirca na ventina, i se ga riorganisà e i xe scapà so łe montagne de ła Sierra Maestra, par condure ła guerijia contro el regime.

Inte i ultimi dì del diçenbre 1958, el ga direto l'ataco condoto da ła so "squadra suicida" (on reparto che ga fato łe mision pì a ris'cio de l'exercito rivołusionario)[3] so Santa Clara. Ła xe sta una de łe bataje decixive de ła rivołusion, anca se ła serie de inboscade, prima durante la ofensiva so ła Sierra Maestra po' so ła Guisa e l'intiera canpagna de łe pianure de Cauto probabilmente łe ga avudo na major inportansa miłitar. Dopo esarse incorto che i so alti ofisiałi, come el generałe Cantillo che el gaveva incontrà Castro ał zucherificio abandonado "Central America", i zera drio far na pace separà co Castro, Batista, el 1° de genaro 1959, el scapà inte ła Republica Dominicana.

Inte el governo cuban[canbia | canbia el còdaxe]

El 7 de febraro 1959, el novo governo el ga nominà Guevara "Sitadin cuban par dirito de nàsita". Poco dopo, Guevara el ga scuminsià łe procedure de divorsio da Hilda Gadea. El 2 de zugno 1959, el ga spoxà Aleida March, na cubana che ła faxeva parte del Movimento del 26 de lujo.

El e sta nominà comandante de ła prexon de San Carlos de La Cabaña a L'Avana, e, par i siè mixi de incarico (dal 2 de genaro al 12 de zugno 1959)[4], el ga sovrintexo ai procesi e a łe execusion de parece persone (secondo alcune stime 20 000), comprexi ex ufisiałi del rexime de Batista, menbri del BRAC (Buró de Represion de Actividades Comunistas, "Ufficio repression attività comuniste", na połisia segreta), acusài de crimini de guera e disidenti połiteghi. Mentre el faxeva el procuratore miłitare el ga influìo so ła sorte (avendo ła posibiłità de dare o manco l'apeło) de alcuni tra i condanà a ła pena cavedal (fonti diverse łe riporta da 55 a "sirca domiła"[5]) tramite fuxiłasion acusài de crimini de guera, torture e omisidi. Secondo Orlando Borrego [6] Guevara el ga fato oservare tute łe regołe procesuałi e el xe sta acusà adiritura de far 'ndar pian i procesi par "exigere eceso de ełementi probatori". Secondo Tony Saunois a xe sta condanai quełi ca zera sta responsabiłi de torture e asasini durante ła ditatura de Batista. In seguito, Guevara el xe diventà dirigente de l'Istituto Nasional par ła Riforma agraria e po' presidente de ła Banca Nazionale de Cuba.

Zà dal 1959, Guevara el ga ajutà a organixar tentativi rivołusionari, a Panama e po' inte ła Republica Dominicana.

Inte el 1960 Guevara el ga ciapà parte socorsi a łe vitime in seguito a l'esploxion de ła nave La Coubre. Mentre l'operasion de salvatajo ła zera in corso, a xe sucesa na seconda esploxion. I morti i xe sta oltre sento.[7] A xe sta inte sta ocaxion che Alberto Korda el ga fato ła so fotografia pì famoxa. A no' xe oncora ciaro se ła nave ła fuse sta sabotà o se ła xe esploxa par on insidente. Quei ca xe par ła teoria del sabotajo i tende a atribuirlo a ła Central Intelligence Agency[8] e de frecuente i atribuise ła colpa a William Alexander Morgan [9] on rivałe de Guevara inte łe forse anti-Batista de łe province sentrałi, che pì tardi el sarìa 'ndà drento ła CIA. Alcuni exułi cubani i porta invese avanti ła teoria secondo ła cuałe l'atentato el sarìa sta fato dai fiłosovieteghi, nemighi de Guevara [10].

El Che inte el 1960 el ga inaugurà el primo canpo de rieducasion, precixamente inte ła penìzoła de Guanaha.

Dopo i insucessi come diretor de l'Istituto Nasional par ła Riforma Agraria e de ła Banca Nasional de Cuba, Guevara el xe sta nominà ministro de l'industria. Inte sta poxision, el ga dà el so contributo a modełare el sociałismo cuban, diventando una de łe figure połiteghe pì inportanti de l'ìzoła. Inte el so livro Sulla guerriglia, Guevara el ga sostegnuo el modeło cuban de rivołusion, scuminsià da grupeto de guerijeri (foco), sensa ła necesità de ricorare a grandi organizasion che i sostegnese l'insuresion armasa (dotrina del fogołar). Sta strategia pì tardi ła sarìa fałìa in Bołivia.

Durante l'invaxion de ła Baja dei Porci (1961), Guevara no el ga partesipà ai prinsipałi conbatimenti, parché el zera sta asegnado da Castro a on comando inte ła provincia pì osidental de Cuba, Pinar del Rio, dove el ga respinto on tentativo d'invaxion. Intanto che el zera drio espletare sto incarico el se ga ferìo in faciao, el ga afermà in seguito ca zera sta ła so pistoła che ła gaveva sparà asidentalmente.

Guevara el ga xugà on ruoło inportante inte ło schieramento a Cuba dei misiłi bałisteghi sovieteghi, armai co testate nucleari, cauxa de ła crixi de l'otobre 1962.

Ł'ałontanamento da Cuba[canbia | canbia el còdaxe]

Inte el diçenbre del 1964 Guevara el xe 'ndà a New York in cuałità de cao de ła dełegasion cubana e el ga tegnuo on discorso a l'asenblea xeneral de l'ONU (ascolta, A ghe xe bisogno de RealPlayer; opure lexi Archivià il 21 de zunjo 2006 in Internet Archive. ). Inte che l'ocaxion, el xe 'ndà fora inte el programa d'informasion Face the Nation so ła CBS e el ga incontrà diverse personałità e esponenti de grupi połiteghi. Tra questi, el senador statunitense Eugene McCarthy, conponenti del gruppo guidà da Malcolm X e da ła radicałe canadexe Michelle Duclos [11][12]. El 17 de diçenbre el xe xołà a Pariji, scuminsiando on viajo de tri mixi, dove che el ga vixità ła Republica Popołare Cinexe, l'Egito, l'Algeria, el Ghana, ła Guinea, el Mali, el Dahomey, el Congo-Brazzaville e ła Tanzania, co soste in Irlanda, a Pariji e a Praga. A Algeri, el 24 de febraro 1965, el ga fato l'ultima aparision publica sol palcosiènico internasional, intervegnendo al "Secondo seminario econòmego so ła sołidarietà afro - axiatica". Inte el so discorso el ga dichiarà: "Inte sta łota fin a ła morte a non ghe xe frontiere. Non podemo restar indifarenti davanti a quanto a sucede inte ogni parte del mondo. Na vitoria de qualsiasi nasion contro l'inperiałismo ła xe na nostra vitoria, come na sconfita de qualsiasi nasion ła xe na nostra sconfita" [13][14]. El ga sorprexo tutti proclamando che "I paexi sociałisti i ga el dovere moral de łiquidar el so siłensio conplice co i paexi sfrutadori del mondo osidental". El ga po dełineà anca na serie de mixure che, secondo łu, i paexi del bloco comunista i gavarìa dovesto ciapar par rivar a sto scopo [15][16]. El xe ritornà a Cuba el 14 de marso, riçevuo sołenemente a l'aeroporto de Ł'Avana da Fidel e Raúl Castro, Osvaldo Dorticós e Carlos Rafael Rodríguez. Do setimane dopo, Guevara el se ga ritirà da ła vita publica e el xe sparìo. Dove chel fusse el xe restà el grande mistero cuban par tuto el 1965, anca se el zera senpre genericamente considerà el "numaro do" del rexime dopo Castro. Ła so łatitansa ła zera sta variamente atribuìa al rełativo insuceso del piano d'industriałizasion che el gaveva portà avanti da ministro de l'industria, a łe presion fate so Castro dai Sovieteghi, ałarmai da łe tendense fiło cinexi de Guevara, inte on momento indove ła fratura tra Mosca e Pechin la se zera drio aprofondir, opure a dixacordi tra Guevara e el resto de ła dirigenza cubana so ło sviłupo econòmego de l'ìzoła e so ła so łinea połitega. A xe anca posìbiłe che Castro el fusse difidente da ła popołarità de Guevara, che ła podeva farlo diventar na minacia. I criteghgi de Fidel i aferma che łe so spiegasion so ła sconparsa de Guevara łe xe senpre pareste sospete e pareci i cata sorprendente che Guevara no el ga mia dito łe so intension in publico, ma soło inte na łetara priva de data a Castro.

Ł'orientamento fiło cinexe de Guevara el zera senpre pì problematego par Cuba, man a man che l'economia del paexe ła diventava senpre pì dipendente da l'Union Sovietega. Dai primi dì de ła rivołusion cubana, Guevara el zera sta considerà on sostenidor de ła strategia maoista inte l'America Łatina. El so piano par na rapida industriałizasion de Cuba par pareci ła zera conparàbiłe a ła canpagna cinexe del grande balzo in avanti.

Durante ła crixi de l'otobre 1962, Guevara el ga percepìo come on tradimento sovietego ła decixion - ciapà da Nikita Khruščëv sensa consultar Castro - de ritirare i misiłi da Cuba. El xe diventà quindi pì siético inte i confronti de l'URSS. Come ca zera emerso dal so ultimo discorso a Algeri, el gaveva tacà a vedar l'emisfero setentrional, guidà a ovest dai Stati Unii e a est da l'Union Sovietega, come unica entità sfrutatora de l'emisfero meridional.

Dopo che Che Guevara el zera sparìo da ła circołasion, Castro, el 16 de zugno 1965, el ga dito che l'opinion publica ła sarìa sta informà so Guevara quando ło isteso Guevara ło gavarìa ritegnuo oportuno farlo. Il 3 de otobre de queło isteso ano, Castro el ga rexo publica na łetara priva de data [17] presumibilmente scritaghe da Guevara difarenti mixi prima, inte ła cuała el riaffermava ła so sołidarietà co Cuba, ma el dixeva anca ła so intension de abandonar l'ìzoła e de 'ndar a conbatare da altre parti par ła Rivołusion. Inte ła stessa łetara Guevara l'anunciava de dimetarse da tute łe cariche che l'ocupava, inte el governo, inte el partio e inte łe forse armade. El ga rinuncià anca a ła sitadinansa de Cuba, che ła ghe zera sta concesa inte el 1959 par i so meriti inte ła rivołusion.

In Congo[canbia | canbia el còdaxe]

Durante on incontro, durà tuta ła note tra el 14 e el 15 de marso 1965, Guevara e Castro i se ga catà d'acordo sol fato che el Che el gavarìa guidà personalmente ła prima asion miłitar cubana in Africa.

Ł'operasion cubana inte l'ex Congo Belga (pì tardi Zaire e atualmente Republica Democratega del Congo) ła zera finałizada al sostegno del movimento marxista dei Simba, favorévołe a Patrice Lumumba.

Durante ła mision africana, par oun serto periodo Guevara el xe sta asistìo dal cao guerijero Laurent-Désiré Kabila, che l'ajutava i sostenidori de Lumumba a condure na rivolta, sopresa da l'exercito congołese inte el novenbre de queło steso 1965. Guevara el ga considerà Kabila insignificante, scrivendo de lui "Gnente a me fa credare che el sia l'omo adato al momento".[18]

Guevara el gaveva 37 ani e non el gaveva mai avudo on'istrusion miłitar formałe. Ła so asma ła ghe gheva infatti evità el servisio miłitar in Argentina, on fato de qual el era sta contento, viste łe so opinion pułiteghe de opoxision al goerno. E gheva, tutavia, łe esperiense de ła rivołusion cubana, in particołare ła marcia so Santa Clara, che ła xe sta basiłare inte ła vitoria final de łe forse castriste.

Mercenari sudafricani e britannici come Mike Hoare e exułi cubani i ga łaorà co l'exercito congołese par ostacołar i piani de Guevara. I xe sta in grado de monitorare łe comunicasion dei reparti ai ordeni del rivołusionario argentin, de tendare inboscade ai guerijeri e a łe trupe cubane ogni volta inte ła cuała i tentava de atacar, de interonpare łe łinee de rifornimento de Guevara.[19][20] El propoxito de Guevara el zera queło de esportar ła rivołusion cubana indutrinando i Simba a l'ideołogia comunista insegnàndoghe łe stratexìe de ła guerija. Ł'inconpetensa, el setarismo e łe łote intestine de łe varie fasion congołexi łe zera sta indicae da Guevara come łe prinsipałi raxon del fałimento de ła rivolta.

Dopo sete mixi, małà, sofarente par l'asma e zo de moral par łe aversità, Guevara el ga abandonà el Congo co i cubani sopravisi. A on çerto punto, Guevara el zera sta tentà de rimandare a Cuba soło i ferìi, restando a conbatare da łu soło in Congo fin a ła fine, par ofrir on exenpio ai rivołusionari. I so conpagni d'arme e du emisari de Fidel Castro i ło ga convinto parò a łasare el canpo de bataja.

Dal momento che Fidel Castro el gaveva meso de dominio publico ła łetara che Guevara el ghe gaveva mandà, indove el rivołusionario argentin el ghe scrito de ła so intension a tajar tuti i łigami co Cuba par dedicarsi intieramente a ła rivołusion inte łe altre parte del mondo, el Che non ła se ga sentìa moralmente de tornar indrio e el ga pasà i sucesivi siè mixi vivendo da clandestin a Dar-es-Salaam, Praga e inte ła Republica Democratega Todesca. Durante sto periodo, el ga scrito łe so memorie so l'esperiensa in Congo e el ga tacà a ełaborar altri du livri, uno de fiłoxofia (Apuntes Filosóficos) e uno de economia (Notas Económicas).
In tuti sti mexi, Castro el ga sercà de convinsarlo afinché el tornase indrìo, ma Guevara el ga acetà soło quando el vołeva aprofitar par preparar na nova inpresa rivołusionaria in America Łatina e che ła so presensa ła sarìa sta sconta.

In Bołivia[canbia | canbia el còdaxe]

Ła guerija[canbia | canbia el còdaxe]

Łe ipotexi so dove Guevara el podese esare finìo łe xe sta ojeo de dibatito par tuto el 1966 e i primi mixi del 1967. El zera sa visto ai scuminsi del 1967 a Dar el Salaam co i rappresentanti del movimento indipendentista moxanbican FRELIMO. Inte on discorso del 1° de majo 1967 a l'Avana, el ministro de łe forse armade faxente funsion, magior Juan Almeida, el ga dito che Guevara el zera drio "servir ła rivołusion da qualche parte inte l'America Latina".

So domanda de Fidel Castro, on toco de tera inte na zona distante el zera sta conpra dai comunisti bołiviani parché Guevara ło doparasse come baxe e canpo d'adestramento. Probabilmente, par Guevara e i cubani che i ło aconpagnava, la sielta de non tacare a conbatare subito, ma de adestrarse inte sto canpo inte ła rejon de Ñancahuazú el ga conportà pareci ris'ci.

El reparto de Guevara, conposto da sirca 50 combatenti e ciamà ELN (Ejército de Liberación Nacional de Bolivia), el zera ben equipajà e in scuminsio el ga conseguìo on serto numaro de sucesi contro łe forse bołiviane, sora on teren difisiłe e montagnoxo de ła rejon de Camiri. In setenbre, tutavia, l'exercito el xe riusìo a ełiminar du grupi guerijeri, copandoo uno dei cai.

Nonostante ła natura viołenta del conflito, Guevara el ga dà cure mediche a tutti i miłitari bołiviani che i guerijeri i ga ciapà prexonieri e, de seguito, i łi ga łassà 'ndar. Anca dopo l'ultima bataja de Quebrada del Yuro, indove el xe sta ferìo e ciapà, quando el xe sta condoto inte on sentro de detension provisoria e el ga visto che lì a se catava difarenti miłitari bołiviani restai ferìi inte el conbatimento, el se ga oferto de fornirghe asistenza medica (oferta rifiutada da l'ufisial bołivian in comando)[21]

In reałtà l'ipotexi che el Che el fusse drio preparar ła rivołusion in Bołivia ła pare non esare coreta. A xe pì probabiłe, come a conferma anca łe ricerche del giornałista bołiviano José Luis Alcázar, che el fusse drio preparar na scoła d'adestramento par guerijeri, par portar inte on secondo tenpo ste forse a sud e 'ndar drento el so Paexe d'orijine, l'Argentina. [22]

Catura e execusion[canbia | canbia el còdaxe]

Zà da pì de on mexe, dal 31 de agosto, l'avanguardia de Guevara ła zera resta da soła dopo l'anientamento da parte de l'exercito de ła retroguardia comandada da Joaquin, a Puerto Mauricio, sol rio Grande.

Guevara, durante i primi dì de otobre, ormai co poche informasion, senza vivari e co scarse vie de scampo, el se gheva rifujà inte on canałon (quebrada) dove el xe sta sircondà da forse miłitari preponderanti. Chi Guevara el xe sta caturà da l'exercito bołivian, insieme a altri guerijeri, l'8 de otobre del 1967 inte ła quebrada del Yuro, a pochi km dal viłajo de La Higuera. El se ga 'rendù dopo esar sta ferìo a łe ganbe e dopo che el so fuxiłe el zera sta distruto da on projetiłe.

Barrientos, apena informà de ła catura, el ga dà l'ordene de coparlo, ma el ga fato girar on comunicato indove el afermava che Che Guevara el zera morto in conbatimento. Guevara el xe sta sarà drento ła scoła del paexe, dove el ga pasà ła note. El xe sta copà inte el primo pomerijo sucesivo da Mario Terán, on sergente de l'exercito sièlto a sorte tra i vołontari. Guevara el ga dito diverse parołe prima de ła morte. A se ga dito che el gavarìa acolto cusì el so asasìn: "A so ca te si chi par coparme. Spara dunque, codardo, i te si soło drio copar on uomo".[23] El so corpo el xe sta portà a Vallegrande, dove a l'ospedałe el xe sta mostrà a ła stanpa.[24] Łe fotografie fate ałora łe ga fato nasare lexende come quełe de San Ernesto de La Higuera e El Cristo de Vallegrande Archivià il 1º de lujo 2006 in Internet Archive. .[25]. Dopo che un dotor miłitar el ga tajà łe man al cadavare, l'exercito bołivian el ga fato sparir el corpo, rifiutandose de dire se i resti i fuse sta sepełìi o bruxà.

Ła cacia a Guevara in Bołivia ła xe sta guidà da Félix Rodríguez, on agente de ła CIA che el zera sta infiltrà a Cuba par ciapar contato coi rebełi dei Monti Escambray e co anbienti anti castristi de l'Avana prima de l'invaxion a ła Baia dei Porci e che el zera sta co suceso fato 'ndar fora da l'ìzoła dopo el fałimento del sbarco.[26][27] Rodríguez el ga riferìo ła notisia de ła catura al quartier general de ła CIA a Langley, in Virginia, servendose de diverse stasion de l'Agenzia situàe in Sud America. Dopo l'execusion, Rodríguez el se ga tegnù l'orołojo de Che Guevara.

On altro fato, de minor riłevanza, łigà a ła catura e a ła morte de Guevara el xe sta l'aresto de Régis Debray. Inte l'avril del 1967 łe forse governative bołiviane łe ga caturà Debray, on xovane fransexe, profesor de fiłoxofia a l'Università de l'Avana, che el gaveva studià a l'Ecole Normale Supérieure col fiłoxofo marxista Louis Althusser,[28] acusandoło de cołaborar a ła guerija. Debray el ga dichiarà co forsa de laorar soło come xornałista e el ga rivełà che Guevara, sconparso da tempo, el zera drio guidar ła guerija. El proceso a Debray (che el xe diventà on caxo internasional) el zera apena tacà quando łe autorità bołiviane, l'11 de otobre, łe gheva riportà (falsamente) che Guevara el zera sta copà inte ło scontro co łe forse governative dei dì prima.

El 15 de otobre Castro el ga riconosesto publicamente ła morte de Guevara e el ga proclamà tre dì de luto nasional. Ła morte del Che ła xe sta vista come on grave fałimento par i movimenti rivołusionari d'inpronta sociałista operanti inte l'America łatina e inte el resto del terzo mondo.

El mauxołeo de Che Guevara

Inte el 1997 i resti del cadavare de Guevara i xe sta exumà visin a ła pista de voło a Vallegrande e riportài a Cuba. El 17 de otobre 1997, i suoi resti, asieme a quełi de siè altri combatenti cubani morti durante ła canpagna in Bołivia, i xe sta tumułai co tuti i onori miłitari inte on mauxołeo costruìo apoxitamente inte ła sità de Santa Clara, dove trentanove ani prima el gaveva vinto queła che zera sta ritegnùa ła bataja decixiva de ła rivołusion cubana.

El monumento el xe coredà da na grande statua co ła scrita "Hasta la victoria siempre" e da na łapide recante ła parte inisiałe del testo del famoxo ordene de servizio firmà da Fidel Castro el 21 de agosto 1958, col cuało a vegneva comunicae łe istrusion operative par ła cołona numaro 8, comandà da Guevara: "Se asigna al comandante Ernesto Guevara la mision de conducir desde la Sierra Maestra hasta la provincias de Las Villas una Columna rebelde y operar in dicho teritorio de acuerdo co el plan estratégico del Ejército rebelde".

So ła guerija[canbia | canbia el còdaxe]

El livro del Che "Sulla Guerriglia" el xe sta considerà par on serto tenpo come on testo definitivo inte ła strategia par conbatare guere iregołari. Secondo altri, invese, ła so catura in Bołivia ła testimonia come, in materia, a non exista strategie rixołutive. Che Guevara el zera convinto che el consenso popołar el fuse indispensàbiłe par ła rivołusion, e che sensa questo a non fuse posìbiłe portar avanti nisun movimento rivołusionario. In realtà, specialmente in Bołivia, l'idealismo del Che el se ga scontrà co na realtà pì conplesa de queła che ła podeva parer inte on primo momento. I contadini de frecuente i vardava co difidensa i foresti che i dixeva de conbatare par luri, e el grupo de Guevara el xe restà progresivamente senpre pì ìzołado.

So łe cause de l'insuceso bołivian a xe pexà anca el contesto internasional: i partii comunisti bołiviani no i ga cołaborà a ła insuresion projetà, e in cheła faxe dełicada de ła guera freda ogni tentativo de ripropore ła "rivołusion mondiałe" no el zera ben visto inte i pì grandi paexi del bloco sociałista.

Poeta e sagista. El Guevara "sconosesto"[canbia | canbia el còdaxe]

Sicuramente manco conosesto, esiste anca un Guevara autor de poexie, saji letarari e storeghi. Sti ultimi in particołar no i manca de acutesa, e i se aconpagna a inportanti oservasion połiteghe, come a xe posìbiłe par exenpio riscontrar inte el comento che el ga scrito sol livro de Pablo Neruda "Canto Generale". Infati, al contrario de pareci miłitari e omani d'armi, el Che el zera estremamente colto e el pol esare definìo on fiłoxofo. Tutavia el zera pì on omo d'asion che on poeta e on fiłoxofo. Riguardo a ła so pasion par ła łeteratura e ła poexia, a xe sta catà on so quaderno de racolte de citasion e publicà col titoło Prima di morire - Appunti e note di lettura

Icona rivołusionaria[canbia | canbia el còdaxe]

File:100 4578.JPG
Monumento al Che - La Higuera (Bołivia)

Ała fin dei ani '60 Guevara el diventa on'icona mondial par queła parte de xoventù che ła se riconose inte i so ideałi rivołusionari. Anca adeso Ernesto Guevara el xe visto come ła figura de l'eroe ideal, na sorta de eroe sofocleo, che no el xe bon de far conpromesi a costo de ła so stesa vita.

Guevara el xe sta interpretà al cinema da Francisco Rabal (1968), Omar Sharif (1969), Antonio Banderas (1996), Alfredo Vasco (1999), Gael García Bernal (2002) e (2003) e Eduardo Noriega (2005).

Riferimenti e note[canbia | canbia el còdaxe]

  1. Ła data de nàsita registrada sol so sertificato de nàsita ła xe 14 de zugno 1928, anca se na fonte tersiaria (Julia Constenla, cità da Jon Lee Anderson) ła aferma che in realtà el zera nato el 14 de majo del steso ano. (Constenla ła ga dito che sta informasion ła ghe zera sta dà da na figura non identificà che so madre, Celia de la Serna, ła zera xà insinta quando eła e Ernesto Guevara Lynch i se zera maridà e pertanto ła data de nàsita de so fioło ła xe sta spostada on mexe pì tardi par evitar on scandało). Fonte: Anderson, Jon Lee. Che Guevara: A Revolutionary Life, New York: 1997, Grove Press, pp. 3 and 769.
  2. U.S. Department of State, "Foreign Relations, Guatemala, 1952-1954". Online, visionà el 4 de marso 2006
  3. Ernesto Che Guevara, "Suicide Squad: Example Of Revolutionary Morale (brano trato da Episodes of the Cuban Revolutionary War - 1956-58). The Militant Online, vixionado el 27 de marso2006.
  4. Anderson, Jon Lee. Che Guevara: A Revolutionary Life, New York: 1997, Grove Press, p. 372 and p. 425
  5. Alvaro Vargas Llosa, "Così il Che ze diventato il logo del caitalismo", Corriere della Sera, 16 de lujo 2005.
  6. "Un bastardo allo scoperto" de Orlando Borrego Archivià il 23 de marso 2008 in Internet Archive.
  7. Cuban Information Archives, "La Coubre explodes in Havana 1960". Online, vixionà el 26 de febraro 2006. A se pol vedar łe fotografie sol sito cubàn fotospl.com Archivià l'11 de otobre 2007 in Internet Archive. .
  8. Defensa Nacional, "SABOTAJE AL BUQUE LA COUBRE" Online Archivià il 12 de marso 2011 in Internet Archive. , vixionà el 26 de febraro 2006
  9. The Miami Herald, "Dockworker set ship blast in Havana, American claims". Online, vixionà el 26 de febraro 2006
  10. Guaracabuya.org, "Recuento Histórico:El porque el PCC ordenó volar el barco "La Coubre".Online Archivià il 17 de majo 2011 in Internet Archive. , vixionà el 26 de febraro 2006
  11. Montreal Gazette, "Liberals picked the wrong issue". Online Archivià il 14 de aprile 2006 in Internet Archive. , visionà el 26 de febraro 2006
  12. Guaracabuya.org, "TERRORISTS CONNECTED TO CUBAN COMMUNIST GOVERNMENT". Online Archivià il 25 de agosto 2006 in Internet Archive. , visionà el 26 de febraro 2006
  13. Ernesto Che Guevara (curadori Rolando E. Bonachea e Nelson P. Valdés), Che: Selected Works of Ernesto Guevara, Cambridge, MA: 1969, p. 350.
  14. Ernesto Che Guevara, "English Translation of Complete Text of Algiers Speech", Online su Sozialistische Klassiker Archivià l'11 de majo 2006 in Internet Archive. , visionà e 4 de genaro2006
  15. Ernesto Che Guevara, (curadori Rolando E. Bonachea e Nelson P. Valdés), Che: Selected Works of Ernesto Guevara, supra, pp. 352-59.
  16. Ernesto Che Guevara, "English Translation of Complete Text of Algiers Speech", Online su Sozialistische Klassiker Archivià l'11 de majo 2006 in Internet Archive. , visionà el 4 de genaro 2006.
  17. Ernesto Che Guevara, "Che Guevara's Farewell Letter", 1965. Tradusion inglexe: Su Wikisource.
  18. BBC News,"Profile: Laurent Kabila", 26 May 2001. Online at BBC News, visionà el 7 de agosto 2006.
  19. African History Blog, "Che Guevara's Exploits in the Congo", Che Guevara's Exploits in the Congo Online at African History Archivià il 14 de setenbre 2007 in Internet Archive. , visionà el 5 de genaro 2006.
  20. Sito de "Mad" Mike Hoare, "Mad Mike". Online at Geocities.com, visionà el 5 de genaro 2006.
  21. Taibo, Paco Ignacio II. Ernesto Guevara, también conocido como el Che, Barcelona, 1999: Editorial Planeta, p 726.
  22. José Luis Alcázar. Ñacahuasu, la Guerrilla del Che in Bolivia.
  23. Anderson, Jon Lee. Che Guevara: A Revolutionary Life. New York: Grove Press, 1997.
  24. Richard Gott, "Bolivia on the Day of the Death of Che Guevara". Online at Mindfully.org Archivià il 26 de novenbre 2005 in Internet Archive. , visionà el 26 de febraro 2006
  25. El Nuevo Cojo Ilustrado, "Galeria Che Guevara". Online Archivià il 1º de lujo 2006 in Internet Archive. , visionà el 27 de apriłe 2006
  26. Rodriguez, Felix I. and John Weisman. Shadow Warrior/the CIA Hero of a Hundred Unknown Battles (Hardcover), New York: 1989, Publisher: Simon & Schuster
  27. MaxNews, "Félix Rodríguez:Kerry No Foe of Castro". Online Archivià il 18 de aprile 2007 in Internet Archive. , visionà el 27 de febraro 2006
  28. marxists.org website, "Louis Althusser" Online, visionà l'11 de marso 2006.


Opare de Che Guevara[canbia | canbia el còdaxe]

Varda anca[canbia | canbia el còdaxe]

Persone[canbia | canbia el còdaxe]

Film so Che Guevara[canbia | canbia el còdaxe]

  • I diari della motocicletta (ARG/USA 2004) de Walter Salles co Gael García Bernal
  • Che Guevara (USA 2005) de Josh Evans co Eduardo Noriega

Cansoni su Che Guevara[canbia | canbia el còdaxe]

Altri projeti[canbia | canbia el còdaxe]


Łigamenti foresti[canbia | canbia el còdaxe]

- Rasegna de avegnimenti in ocasion del 40° aniversario de ła morte de Ernesto Che Guevara (1967-2007)
- Parla Camillo Che Guevara, el fioło
- Racolta de imagini, video, łetare e cansoni dedicade al Che


Note[canbia | canbia el còdaxe]


Controło de autoritàVIAF (EN31991306 · ISNI (EN0000 0001 2095 861X · El vałore CFIV069244 de SBN no el xe mija bon. · LCCN (ENn79018345 · GND (DE118543369 · BNF (FRcb11886483d (data) · BNE (ESXX890987 (data) · NLA (EN35156105 · NDL (ENJA00441936 · WorldCat Identities (ENn79-018345
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Che_Guevara&oldid=1165705"