Conbustìbiłe

Un conbustìbiłe el ze na sostansa chìmega che ła vien osidada inte el proceso de conbustion, na reasion chìmega de osidasion, produzendo enerzia tèrmega. I conbustìbiłi par motori tèrmeghi de inpisamento comandà (a siclo Oto) caraterizai da na erlevada vołatiłità, cofà łe benzine, i vien diti anca carburanti. Par estension i vien diti conbustibiłi nucleari cuełe sostanse co łe cuałe se produze enerzia traverso na reasion nucleare.

Conbustibiłi tradisionałi

Inte ła strutura de un conbustibiłe tradisionałe ła vien cumułada enerzia chìmega de alta consentrasion, che in condision normałi inte el nostro anbiente ła tende a restar prategamente co nisuna o cuazi nisuna mudasion. In partegołari condision de alta tenperatura e adeguada prezensa de sostansa conburente ła avien na reasion ezotèrmega, o sia co produsion de całore pì o manco viołenta, che ła połe eventualmente èsare sfrutada. Cofà sotoprodoto de sto proceso de conbustion se ghene recava sostanse de pì baso liveło enerzètego che łe se sperde inte l'anbiente. La conbustion ła ze donca na reasion de osidasion intd ła cuała el conbustibiłe el reasiona co un conburente: el conburente pì comun el ze l'osìzeno de l'ària.

Destinsion conbustibiłi

In rełasion al stato fìzego inte el cuało i se prezenta, i conbustibiłi i vien clasifegai in sòłidi, lìcuidi e gasozi. On altra inportante destinsion dei conbustibiłi ła ze intrà "naturałi" e "derivai", in rełasion a łe condision inte ła cuała i vien doparai: naturałi (es.: gas metan) se i vien doparai cusita cofà che i vien catai in natura o derivai (ez.: benzine, GPL) se i vien fornii cofà prodoti de trasformasion de conbustibiłi naturałi o de partegołari lavorasion industriałi. O sia:

• sòłidi naturałi: ez. legno, carboni fosiłi (torbe, antrasii, litantrai), etc
• sòłidi artìfisałi: ez. coke e carbon de legno
• lìcuidi naturałi: ez. petrojo e betun
• lìcuidi artìfisałi: ez. benzine e altri destiłai dal petrojo, àlcol, etc
• gasozi naturałi: ez. metan
• gasozi artìfisałi: ez. gas iłumenante, gas de alto forno, idròzeno (gas d'àcua), acetiłen (o acetile)

I lìcuidi e i sòłidi catàndose inte un stato de agregasion difarente dal reazente gasozo, i desviłupa conbustion eterozènee par łe cuałe el ze dimandà un streto contato intrà łe parte chimegamente ative; inte el cazo invese dei gas e vapori de licuido, tratàndose de sistemi omozènei invese, el proceso el avegne traverso el misełamento de reazenti.

Poder całorìfego

Na caraterìstega fondamentałe de ogni conbustibiłe el ze el so podere całorìfego, che el ze ła cuantità de całore produzesta da un chiłogramo de conbustìbiłe, co che el bruza totalmente, cofà par ezénpio ła carta.

Inte i conbustibiłi tradisionałi i ełementi ùtiłi a ła conbustion i ze el carbònio (C) e l'idròzeno (H). Sti cuà, de fato, i ga ła caraterìstega de desviłupar całore in granda cuantità co un liveło variàbiłe de incuinamento anbientałe. De fato, reazendo co l'osìzeno de l'ària, l'idròzeno el se trasforma in àcua (H₂O) e el carbònio el se trasforma in anidride carbònega (CO₂) che no ła ze tosega, ma incuinante (efeto sera).

Un altro ełemento de ła conbustion el ze el zolfo (S), che el se cata in picenine cuantità inte i conbustibiłi fòsiłi tradisionałi. Naturalmente el contribuise par ła so picenina cuota al podere całorìfego, ma el produze anidride solforoza (SO₂), un gas iritante par ła respirasion anca in picenine consentrasion, e co sensìbiłi efeti incuinanti par l'anbiente.

Inte el confrontar łe potensiałità de conbustìbiłi vari se ga da atensionar a łe unità de mezura e a łe condision de referimento. De fato se costuma far referimento al podere całorìfego inferior (Hi) par unità de masa (kg), ma par i conbustibiłi gasozi, se fa invese referimento al podere całorìfego inferiore par metro cubo, in condision normałi (Nm³). Le condision stàndar łe prevede na tenperatura de 0°C e ła presion atmosfèrega stàndar de 760 mHg (1,013 bar). Tuta-via, inte łe tranzasion comersałi, se fa invese referimento a un m³ stàndar, che el considera ła presion normałe e na tenperatura anbiental de 15°C (talvolta 20°C).

No el vien cuazi mai doparà el podere całorìfego superior (Hs). Ma se ga da tegner conto che łe tołe chìmeghe, che łe reporta i bałansi enerzèteghi de łe reasion, normalmente łe referise tuto a ła tenperatura anbiente de 25°C (298 K), o sia inte łe condision inte łe cuałe se sfrutaria tuto el podere całorìfego superiore del conbustibiłe.

In linea de màsima se ghe połe catar i seventi vałori par el podere całorìfego:

• Legno: 3000 - 4000 kcal/kg
• Conbustìbiłi licuidi: 9700 - 10300 kcal/kg
• Gas naturałe: 8200 - 9200 kcal/Nm³

Altri projeti

Altri progetti

• Wikimedia Commons

• Wikimedia Commons el detien imàjini o altri file so conbustìbiłe

Linganbi foresti

• CombustibiliTreccani.it – Enciclopedie on line, Istituto de ła Ençiclopedia Italiana.
• Giorgio Roberti, COMBUSTIBILE, in Ençiclopedia Italiana, Istituto de ła Ençiclopedia Italiana, 1931.
• CombustìbileVocabolario Treccani, Istituto de ła Ençiclopedia Italiana.
• combustìbilesapere.it, De Agostini.
• (EN) fuelEnçiclopedia Britannica, Encyclopædia Britannica, Inc.
• (EN) Opere riguardanti FuelOpen Library, Internet Archive.