Sengiałe

Da Wikipedia, l'ençiclopedia libara.
Cinghiale
Errore Lua in Modulo:Imajine_sinotego alla linea 37: Tried to read nil global catNonCompatibile.
Stato de conservasion
Status iucn3.1 LC.svg
ris-cio mìnemo[1]
Clasifegasion sientìfega
SotoregnoEumetazoa
SuperphylumDeuterostomia
PhylumChordata
SubphylumVertebrata
ClaseMammalia
SotórdeneSuiformes
FamejaSuidae
ZènaroSus
SpeceS. scrofa
Nomenclatura binomenałe
Sus scrofa
Linneo, 1758
Sottospecie
* S. scrofa scrofa
  • S. scrofa algira
  • S. scrofa attila
  • S. scrofa cristatus
  • S. scrofa davidi
  • S. scrofa cristatus
  • S. scrofa leucomystax
  • S. scrofa libycus
  • S. scrofa majori
  • Sus scrofa meridionalis
Sus scrofa range map.jpg


El cinghiałe (o sengiałe, zengiałe o zengial) el xe un mamìfero de ła fameja dei Suidae (Sus scrofa). In todesco se dixe Wildschwein, in inglexe wild boar, in sloveno dívji prášič, in tałjan cinghiale. El xe onivoro, che vol dir che el magna de tuto; El da na dentadura fortisima, co 44 denti; in ogni mexa ganasa el ga 3 denti incixivi, un canino, 4 premołari e 3 mołari. I canini de sora e de soto inte i mas-ci i se piega in avanti. 'Ntełe femene pol sucedere soło quando che łe diventa vece. I canini de soto inte i mas-ci i xe longhi 20 cm, ma i pol rivare anca a 30.

Dimension e cołor del peło[canbia | canbia el còdaxe]

Ste bestie łe xe longhe da 130 a 180 cm e łe pol pexare, inte i mas-ci, anca fin a 200 kg.

Na femena de cinghiałe coi so picołi

El peło xe de cołor blu-grixo o maron-nero fato de tanti pełi łanoxi fisi fisi che i serve par ła termoregołasion del corpo, visto che i trategne cusì l'aria in mexo. I picołi pena nati i ga un peło maron ciaro co 4- 5 strise xałe che łe core parałele par tuto el tronco; dopo 3- 4 mexi el cołor el diventa kueło dei grandi. Coi so denti el cinghiałe el raspa ła tera, magnando raixe, bigati, baùti e erba, ma el magna anca oxełeti che casca xo dai gnari, bisi, funghi, perle e fruti. El sa noàr ben e in aqua el magna tuto kueło che el trova: gransi, garùsołi e piante aquatiche.

Difuxion inte el mondo[canbia | canbia el còdaxe]

Co ste premèse e tegnendo conto che ogni femena ła fa 7 picołi ła volta, col so peło che ło protege dal'umido e dal fredo, el cinghiałe el se ga difondesto in tuta Eoropa, dal Mediteraneo fin a ła latitudine del lago Ladoga, in Rusia, e in Maroco. Dai 60° nord del Lago Ladoga, l'areałe de distribusion el piega ałora in xo, verso sud, traversando el Volga e rivando ai Urałi del sud. El vive anca in Siberia, ma no in Mongolia, in Cina a ovest del Sezuàn e in India sul'Himalaya. Ło trovemo anca in Giapon, Taiwan, Vietnam, Hainan, Sri Lanka, Sumatra, Giava, Lombock, Bali, Sumbawa e Komodo. El cinghiałe xe sta introdoto anca inte i Stati Unii d'America, Argentina, andove che el vive intrà i 40 ei 44° sud, Nova Xełanda, Hawaii, ìzołe Sałomon, Bismarck, del'Amirajato, Nova Ghinea e in Australia, dove che el xe diventà na peste parkè el magna fora tute łe verdure e łe piante dei canpi.

Areałe de distribusion del cinghiałe (in verde dove che el xe rivà par conto suo e in blu dove che el xe sta introdoto)

Cosa che el magna de gusto[canbia | canbia el còdaxe]

El cinghiałe magna de gusto tuto, ma in spece łe giande del roare e i fruti del fagaro, ma anca patate, carote, rave e altre verdure dei canpi, ua e fruti.

Anbiente andove che el vive ben[canbia | canbia el còdaxe]

Tuti i boschi cedui (magari co roari e fagari) o misti co conifere, anca se umidi, i va ben. In tuta l'Italia apeninica se pol trovare posti del genare, ma spece 'ntełe vałi de łe Prealpi Venete (Łesinia, Val Posina, Valdastego), Altopian dei sete comuni, Valsugana, Alto Trevixan, Bełunexe), e furlane (Pordenonexe, Carnia, pianura tacà Ùdine), sul Carso de Trieste e sui Cołi Euganei el cinghiałe el xe diventà na peste.

El cinghiałe come peste par i canpi inte ła mitołogia[canbia | canbia el còdaxe]

Xa el poeta Omero el dixeva che ła dea greca de ła cacia, Artemide, ła ga mandà par vendeta suła tera un cinghiałe par rovinare canpi e vixełe. El poeta roman Ovidio el raconta dei malan par i contadini portà dai cinghiałi, bestie che no se xe boni de mandar via, rexistenti a tuto. Al riguardo, ła racolta de saghe germaniche Edda ła dixe che ogni dì i eroi germanici i va a cacia e i copa el cinghiałe Sährimnier, che el risorge ła matina dopo par far ricuminsiare ła cacia.

El cinghiałe in cuxina[canbia | canbia el còdaxe]

El cinghiałe in tecia col pinot nero[canbia | canbia el còdaxe]

Par 6 persone ghe vol:

Metare ła carne in na pignata, lavare e netare verdure e zeola, lavare el timo e tajarlo a toketi. Xontare a ła carne verdure, zeola, timo, keno, axedo, grani de pevare e doraro. Far marinare in frigo par 24 ore. Far pasare par un criveło ła carne e sugarla co carta asorbente da cuxina. Tegner da parte el resto de ła marinada. Cavar via dai pomodori scataroni e grani. Tajare a cubeti metà de łe verdure (fora che el parsemoło); spełare scałogni e ajo, lavare el rosmarin. Scaldar l'ojo su na tecia e cuxinare ła carne a fogo forte, mis-ciando i toki cfinkè no i ga ciapà el so cołor maron. Xontarghe scałogno e ajo. Mis-ciare insieme el concentrato de pomodoro e cuxinare oncora par 4-5 minuti. Versare e mis-ciare pomodori, verdure e rosmarin e regołare de sałe e pevare. Xontare ła metà de ła marinada e cuxinare a fogo baso par 2 ore. In caxo, se pol xontare altra marinada versandoghine un poca a ła volta suła carne e mis-ciando. Tajar ła carne a fete e metarla al caldo. Lasar cuxinar el sugo a fogo forte in modo che el vegna fiso; versarghine un poco sułe fete de carne e el resto metarlo in na scudełeta par sughi. Insieme va ben połenta e/o patate rosto, ma anca radici de canpo (pisacan) coti o radici de Trevixo a ła griłia. El keno giusto xe un Amaron, un Ripàso de ła Valpołiceła o un Cabernet superiore de Breganze.

Note[canbia | canbia el còdaxe]

  1. Oliver, W. & Leus, K., 2008. Sengiałe. In: 2008 IUCN Red List of Threatened Species. IUCN 2008.
Controło de autoritàLCCN (ENsh85146670 · GND (DE4066129-5
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Sengiałe&oldid=1015720"