Colpo de stato in Cecoslovàchia (1948)

Colpo de stato in Cecoslovàchia
Guera Freda
Tipo	colpo de stato
Data	25 de febraro del 1948
Liogo	Prague
Stato	Tersa Repùblega cecoslovaca
Schieraminti
Anti-comunismo ; Partio Nasionałe Sociałe Ceco ; Union Cristiana e Democràtega - Partio Popołare Cecoslovaco ; Partio Democràtego Cecoslovaco ; Partio Socialdemocràtego Cecoslovaco	Fiło-comunismo ; Partio Comunista de Cecoslovàchia ; Partio Socialdemocràtego Cecoslovaco Co suporto: ; Union Soviètega
Comandanti
; Edvard Beneš ; Petr Zenkl ; Jan Šrámek ; Jozef Lettrich ; Bohumil Laušman	; Klement Gottwald ; Rudolf Slánský ; Zdeněk Fierlinger

El colpo de stato cecoslovaco del 1948, de frecuente ciamà el colpo de stato ceco, (el febraro vitoriozo inte ła storiografia soviètega) el ze sta un avegnimento de fin febraro inte el cuało el Partio Comunista de ła Cecoslovàchia, col sostegno soviètego, el ghea ciapà el controło, indiscurìbiłe sul goerno de ła Cecoslovàchia.

El 25 de febraro del 1948, el presidente de ła Repùblega cecoslovaca, Edvard Beneš, el ghea pasà tuto el podere ai comunisti Klement Gotwald e Rudolf Slansky, dopo do stimane de intense presion da parte de l'Union Soviètega. I tacarà co sto avegnimento cuatro dècade de ditatura soto el domìnio comunista.

Contesto

De tuti i paezi de l'Eoropa sentrałe libarai dai nazisti e ocupai dai sovièteghi, ła Cecoslovàchia ła zera l'ùgnoło a vere na ciara tradision democràtega e un partio comunista de moda. I comunisti del KSČ, de fato, i gaveva otegnesto el 38% dei voti inte łe ełesion del 1945, partesipando al goerno in coałision co altri partii democràteghi.

Inte el 1947 ła Cecoslovàchia ła ghea acetà el Pian Marshall, ma ła ze sta costrinzesta da l'Union Soviètega a renunsiarghe poco dopo. Sto fato, unio a ła posibiłità che el cresimento del Partio Comunista el podese vegner rałentà inte łe ełesion del 1948, ła ghea fato sucédar un colpo de stato comunista.

Ła crize

La crize ła zera tacada el 21 de febraro del 1948 cuando che el ministro dei Interni el ghea ełezesto oto novi comisari de l'ezèrsito a Praga, tuti comunisti, rezaltando el controło che ła parte comunista del goerno cecoslovaco ła gaveva su łe forse de seguresa del stato. Sto fato el ghea erlevà-sù proteste, seguie da łe demision par protesta dei ministri Sociałisti, seguii dopo dai ministri del Partio Popołare Catòłego e del Partio Democràtego Slovaco. I demisionari i pensava che łe so demision łe garia portà a na crize pułìtega che ła garia sucesivamente portà a ełesion zenerałi antisipae, fazendo cusita fałir el Partio Comunista par via de l'inpopołarità de ła so pozision de renùnsia al Pian Marshall.

Tutavia, i menbri che i se gaveva dimetesto i zera stai sostituii da altri menbri ma del Partio Comunista, e col sostegno de Josif Stałin, el lìder comunista ceco Klement Gotwald el ghea declarà un siòparo zenerałe el 24 de febraro, co ła consevente creasion de na sèrie de Comitai d'asion, col sostegno a so volta de miłìsie operare che łe ghea frenà ogni rezistensa de łe forse democràteghe. Dopo sta epurasion goernadiva a favore dei comunisti, el Parlamento el ghea aprovà el novo goerno, e Edvard Beneš, brincà da un'enbołia serebrałe, el ze sta obligà a demétarse el 7 de zugno del 1948, morindo inte el setenbre de l'steso ano.

De consevensa, i partii de drita e sentrodrita de ispirasion agrària, popołare e democristiana i se ghea lià inte un Fronte Nasionałe domenà dal Partio Comunista che a so volta el se zera fodesto col Partio Socialdemocràtego. Inte el 1948 se ga avesto łe ełesion, inte łe cuałe ła zera pusibiłe l'espresion de voto verso na soła lista sensa opozision consentia, dando tuto el podere al Partio comunista Ceco.

Consevense

L'inportansa del colpo de stato el se ghea espandesto belché oltre i confini del paeze, al scumìsio de cueła che sararia devegnesta dopo conosesta cofà ła Guera Freda.

El controcolpo cauzà da sto avegnimento, el ga contribuio a métar presa ai Stati osidentałi a adotar el Pian Marshall, ła creasion de un stato inte ła Repùblega federałe de Zermània par tegner fora dal podere i comunisti in Fransa e Itàlia e, sora de tuto, l'istitusion de acordi de mùtua seguresa che i ghea portà a ła creasion de organizasion cofà ła NATO e al dizegno finałe de ła cortina de fero fin a ła decadesta del comunismo inte el 1989.